ធន់ ចាន់តាក់ អ្នកប្រដាល់សមាគមកីឡាក្រសួងការពារជាតិត្រូវគេផ្គូផ្គងអោយជួបប្រកួតជាមួយអ្នកប្រដាល់ថៃPhat Saifa ដោយប្រកួតគ្នាក្នុងទម្ងន់៦៣,៥០០ គ.ក្រ។ ពីរនាក់នេះ ប្រកួតគ្នានៅលើសង្វៀនSEATV នារសៀលថ្ងៃសៅរ៍ទី១១ ខែសីហា ឆ្នាំ២០១៨។
ចាន់តាក់ ជាអ្នកប្រដាល់ដែលចាត់ទុកថា ជាជើងខ្លាំងស្រករក្រោយម្នាក់ ។ គេបានឆ្លងកាត់ការប្រកួតជាមួយអ្នកប្រដាល់ថៃប្រមាណជាង២០នាក់ទាំងលើកនេះ។ កាលពីជួបប្រកួតជាមួយថៃលើកចុងក្រោយនេះ (១៧កុម្ភះ២០១៨) គេបានផ្តួលថៃSeou Fai អោយសន្លប់ក្នុងទឹកទី១។
ធន់ ចាន់តាក់ មានប្រវត្តិប្រកួតប្រមាណជា៦៨លើក ក្នុងនោះវាយឈ្នះ៥៧ ចាញ់១០ លើក និងស្មើ ០១លើក។ គេជាអ្នកប្រដាល់ជើងខ្លាំងស្រករក្រោយ ដែលមានចិត្តធំ កម្លាំងខ្លាំង វាយមិនសំចៃដៃឡើយ។ ប៉ុន្តែយ៉ាងណាការប្រកួតលើកនេះ មិនដឹងថា ចាន់តាក់អាចយកឈ្នះ Phat Saifa បានឬក៏អត់នោះទេ?។
Phat Saifa ជាជើងខ្លាំង ដែលមានស្នៀតទាត់ និងកណ្តាប់ដៃល្អ។ដូច្នេះធន់ ចាន់តាក់ប្រកួតលើកនេះ អាចនឹងជួបការលំបាកច្រើន ព្រោះអ្នកប្រដាល់ថៃរូបនេះមានស្នៀតប្រដាល់ល្អនិងខ្លាំង។ អ្នកប្រដាល់ថៃរូបនេះ ធ្លាប់មកប្រកួតនៅកម្ពុជាម្តងហើយ កាលពីក្នុងខែវិច្ឆិកាឆ្នាំ២០១៦កន្លងទៅ ដែលកាលណោះគេមកប៉ះជាមួយរឿង សោភ័ណ្ឌ អ្នកប្រដាល់ក្លិបម្កុដរាជសីហ៍ ហើយត្រូវសោភ័ណ្ឌវាយសន្លប់ក្នុងទឹកទី១ ។
អ្នកប្រដាល់ថៃរូបនេះ មានប្រវត្តិប្រកួតចំនួន៥៧លើក ឈ្នះ៤៥លើក ចាញ់១០២លើក មិនដែលស្មើ។ ចាំមើល រវាងធន់ ចាន់តាក់ និង Phat Saifa តើនរណាជាអ្នកឈ្នះនៅក្នុងការជួបគ្នានេះ ?។
ចំណែក នន់ ជំនិត អ្នកប្រដាល់ក្លិបស្វាយរលំឫទ្ធីជ័យដែលជាជើងខ្លាំងជើងចាស់របស់កម្ពុជានោះ នឹងជួបប្រកួតជាមួយអ្នកប្រដាល់ជនជាតិបារាំងឈ្មោះ Naser ដោយប្រកួតគ្នាក្នុងប្រភេទទម្ងន់៧១ គីឡូក្រាម។
នេះជាលើកទី៩ របស់នន់ជំនិត ដែលបានជួបប្រកួតជាមួយអ្នកប្រដាល់បរទេស ។ក្នុង៨ប្រកួតជាមួយថៃកន្លងមកនេះ នន់ ជំនិត វាយឈ្នះ៤លើក និងចាញ់៤លើក។ ការប្រកួតលើកចុងក្រោយរបស់ជំនិត គឺវាយឈ្នះអ្នកប្រដាល់អាល់បានីGenci ក្នុងទឹកទី៥ នាថ្ងៃទ២៤មិថុនា២០១៨កន្លងទៅ ។ ចាំមើល លើកនេះ នន់ ជំនិត អាចយកឈ្នះអ្នកប្រដាល់ជនជាតិបារាំងឈ្មោះ Naser នេះ បានឬអត់ ? ។
នន់ ជំនិត ជាជើងខ្លាំងជើងចាស់ គេមានបទពិសោធន៍ច្រើនក្នុងការប្រកួត ដោយគេវាយជាមួយបរទេស គឺគ្មានញញើតខ្លាចអ្វីបន្តិចទេ ។ គេមានកណ្តាប់ដៃល្អ វាយចេញចូលរហ័ស ហើយស្នៀតទាត់និងជង្គង់ កែង ក៏ល្អថែមទៀត ។ ក្នុងកំនត់ត្រាប្រកួតចំនួន៧៤លើកជំនិតវាយឈ្នះ៥៧លើក ចាញ់១៥លើក និងស្មើ០២លើកប៉ុណ្ណោះ ។
ទោះជាបែបនេះក្តី មិនទាន់ហ៊ានសន្និដ្ឋានថា នន់ ជំនិត ជួបសំណាងល្អនៅក្នុងការប្រកួតជាមួយ Naser នេះឡើយ ? ព្រោះអ្នកប្រដាល់បារាំងរូបនេះ ថ្វីត្បិតតែមានកំនត់ត្រាប្រកួតត្រឹម២៩លើក ឈ្នះ១៧លើកនិងចាញ់១២លើកក្តី តែគេមានស្នៀតប្រដាល់ល្អ មានបច្ចេកទេសវាយល្អ ដែលមិនអាចមើលស្រាលបាន ។ Naser កាលពីថ្ងៃទី០៤សីហានៅលើសង្វៀនSEATVនេះ គេបានវាយឈ្នះជើងចាស់ផុន ផាន់ណា ដោយពិន្ទុ ដូច្នេះគេមិនធម្មតានោះឡើយ៕
Source: Kampuchea Thmey Daily
0 Comments