ប្រធានាធិបតីអាមេរិកលោក Donald Trump បានលើកឡើងកាលពីថ្ងៃអង្គារថា ការចរចាជាមួយមេដឹកនាំអ៊ីរ៉ង់ដែលជាគូសត្រូវគឺជិតមកដល់ហើយ ថ្វីបើមានភាពស្ងប់ស្ងាត់ពីមេដឹកនាំរបស់សាធារណរដ្ឋឥស្លាមមួយនេះចំពោះសំណើរបស់លោក Trump សម្រាប់កិច្ចប្រជុំមួយក៏ដោយ។
មានការសង្ស័យអំពីវត្តមានរបស់ប្រទេសអ៊ីរ៉ង់ជុំវិញកិច្ចពិភាក្សាដែលអាចធ្វើទៅបានខណៈដែលមានសមាជិកសភាមួយរូបបាននិយាយថា ការចរចារគឺជា “ភាពអាម៉ាស់”។
មេដឹកនាំជាន់ខ្ពស់របស់ប្រទេសនេះមិនបានឆ្លើយតបភ្លាមៗចំពោះសេចក្តីថ្លែងការណ៍របស់លោក Trump កាលពីមួយថ្ងៃមុននោះទេដែលថា លោកនឹងជួបពួកគេ “នៅពេលណាមួយ” ដោយគ្មានការដាក់លក្ខខណ្ឌជាមុន។
លោក Trump បានប្រាប់ការជួបជុំមួយនៅទីក្រុង Tampa ក្នុងរដ្ឋ Florida ថា “ខ្ញុំមានអារម្មណ៍ថា ពួកគេនឹងនិយាយជាមួយយើងក្នុងពេលឆាប់ៗហើយពួកគេប្រហែលជាមិនបដិសេធទេ”។
លោកក៏បានយកឱកាសនេះដើម្បីរិះគន់ជាថ្មីម្តងទៀតដល់កិច្ចព្រមព្រៀងនុយក្លេអ៊ែរឆ្នាំ២០១៥រវាងប្រទេសអ៊ីរ៉ង់និងមហាអំណាចពិភពលោកផងដែរដែលកិច្ចព្រមព្រៀងនេះត្រូវបានប្រធានាធិបតីអាមេរិកដកខ្លួនចេញ។
លោក Trump បាននិយាយថា “វាជាការបង្ហាញពីភាពភ័យរន្ធត់។ ខ្ញុំសង្ឃឹមថាវានឹងដំណើរការល្អជាមួយប្រទេសអ៊ីរ៉ង់។ ពួកគេកំពុងមានការលំបាកជាច្រើននាពេលឥឡូវនេះ”។
អាមេរិកគ្រោងនឹងចាប់ផ្តើមការដាក់ទណ្ឌកម្មពេញលេញជាថ្មីលើអ៊ីរ៉ង់ចាប់ពីថ្ងៃទី៦ខែសីហាទៅដែលជាវិធានការមួយបានរួមចំណែករួចទៅហើយដល់វិបត្តិរូបិយប័ណ្ណដ៏សំខាន់មួយ។
បុគ្គលសាធារណៈអ៊ីរ៉ង់ជាច្រើនបាននិយាយថា វាមិនអាចទៅរួចទេក្នុងការស្រមៃអំពីកិច្ចចរចាជាមួយក្រុងវ៉ាស៊ីនតោនបន្ទាប់ពីខ្លួនបានបញ្ចប់កិច្ចព្រមព្រៀងនុយក្លេអ៊ែរកាលពីខែឧសភា។
អនុប្រធានសភាលោក Ali Motahari បានឲ្យដឹងថា “ជាមួយនឹងសេចក្តីថ្លែងការណ៍ដែលប្រមាថដល់អ៊ីរ៉ង់ គំនិតនៃការចរចារគឺមិនអាចយល់បានទេ។ វានឹងក្លាយជាភាពអាម៉ាស់មួយ”។
ចំណែករដ្ឋមន្ត្រីក្រសួងមហាផ្ទៃលោក Abdolreza Rahmani Fazli បាននិយាយថា “អាមេរិកមិនគួរឲ្យទុកចិត្តទេ។ បន្ទាប់ពីខ្លួនបានដកខ្លួនចេញពីកិច្ចព្រមព្រៀងនុយក្លេអ៊ែរជាឯកតោភាគី តើវាអាចត្រូវបានគេទុកចិត្តយ៉ាងដូចម្តេចទៅ?”៕ AFP
Source: Kampuchea Thmey Daily
0 Comments