ក្លិបបាល់ទាត់វិសាខា សមាជិកក្នុងពានរង្វាន់លីគកំពូលកម្ពុជា (Metfone Cambodian League 2018) បានប្រកាសស្វែងរកកីឡាករយុវជនដែលមានសមត្ថភាព ដើម្បីចូលរួមធ្វើតេស្តចូលរួមក្នុងក្រុមយុវជនថ្នាលក្រោមអាយុ១៧ឆ្នាំ(U17) ដែលនឹងធ្វើឡើងនៅចុងសប្ដាហ៍នេះ។
យោងតាមសេចក្តីប្រកាសរបស់ក្លិបដែលមានមូលដ្ឋាននៅរាជធានីភ្នំពេញ មួយនេះបានបញ្ជាក់នៅលើហ្វេសប៊ុកផ្លូវការរបស់ខ្លួនថានៅថ្ងៃសៅរ៍ ទី៨ ខែកញ្ញា ឆ្នាំ ២០១៨ នេះ ក្លិបកីឡាបាល់ទាត់ វិសាខា នឹងបើកការធ្វើតេស្ត សមត្ថភាព សម្រាប់ប្អូនៗដែលមានអាយុក្រោម ១៧ឆ្នាំ (U-17)។
បេក្ខជនដែលចាប់អារម្មណ៍សូមភ្ជាប់ឯកសារមួយចំនួនដូចជា អត្តសញ្ញាណប័ណ្ណ ឬ សំបុត្រកំណើត (ច្បាប់ដើម) និងត្រូវមានសំលៀកបំពាក់ និងសម្ភារៈផ្ទាល់ខ្លួនដូចជា សំលៀកបំពាក់ កីឡាពណ៌ខៀវ និងស្រោមជើង ស្បែកជើងកីឡាបាល់ទាត់ (ការ៉ាមប៉ុង) សម្រាប់ការពារស្មង ស្រោមដៃ (អ្នកចាំទី)។ បេក្ខជននីមួយៗត្រូវមានឆ្នាំកំណើត ចាប់ពីឆ្នាំ២០០២។
សម្រាប់ការធ្វើតេស្តនេះនឹងចាប់ផ្តើមពីម៉ោង ៨និង០០នាទីព្រឹក តទៅនៅកីឡដ្ឋាន វិសាខា ដែលមានទីតាំងនៅហ្គ្រេនភ្នំពេញ ផ្លូវ វិថីព្រះហង្ស សង្កាត់ ឃ្មួញ ខណ្ឌសែនសុខ ភ្នំពេញ។ សម្រាប់ព័ត៌មានបន្ថែម ដែលបេក្ខជនចង់បញ្ជាក់បន្ថែមសូមទាក់ទងទៅកាន់លេខទូរស័ព្ទ ០៩២ ២០៦ ០០០/០១៧ ៩៦៦ ៥៥៧/០៨៦ ២៣២ ៩៦៣។
ក្រុមវិសាខា បានបង្កើតឡើងពីថ្ងៃទី៥ ខែកុម្ភៈ ឆ្នាំ២០១៧ ក្រោមការឧបត្ថម្ភគាំទ្រពីសំណាក់ឯកឧត្ដម ស សុខា ។ បច្ចុប្បន្នក្លឹបមានកីឡាករជិត៣០នាក់ ដែលមានលោក ហុក សុចិត្រា អតីតគ្រូបង្វឹកក្រុមជម្រើសជាតិកម្ពុជា ដើរតួធ្វើជាអ្នកចាត់ការទូទៅរបស់ក្រុម ខណៈលោក ហុក សុជីវ័ន ជាប្អូនប្រុសបង្កើតធ្វើជាគ្រូបង្វឹក។ ក្រុមវិសាខា បានកសាងកីឡដ្ឋានថ្មីផ្ទាល់ខ្លួន ដែលអាចផ្ទុកទស្សនិកជនប្រមាណជាង៥០០០នាក់ ដែលមានទីលានជាស្មៅធម្មជាតិ៕
Source: Kampuchea Thmey Daily
0 Comments