ភ្នំពេញ ៖ ទូហ្គេមបាញ់ត្រីមួយកន្លែងស្ថិតនៅក្នុងភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ ដែលបើកដំណើរការរកស៊ីចង់ប្រេះពោះទៅហើយនោះ មកដល់ពេលនេះទើបត្រូវបានលោក ឃឹម ស៊ុនសូដា អភិបាលរងខណ្ឌពោធិ៍សែនជ័យ ដឹកនាំកម្លាំងចុះទៅបង្ក្រាបដោយស្ងាត់ៗហើយមិនអនុញ្ញាតឲ្យអ្នកសារព័ត៌មានថតរូបភាពផ្សាយឡើយមិនដឹងថា មានអាថ៌កំបាំងអ្វីនោះទេ ដែលប្រតិបត្តិការដ៏អាថ៌កំបាំងនេះបានធ្វើឡើងកាលពីវេលាម៉ោង១០ព្រឹកថ្ងៃទី០៥ ខែកញ្ញា ឆ្នាំ២០១៨ ដកហូតបានទូហ្គេមបាញ់ត្រីចំនួន១គ្រឿង។
ជុំវិញករណីបង្ក្រាបខាងលើ អាជ្ញាធរ មិនបានបំភ្លឺឡើយបន្ទាប់ពីដឹងថា មានអ្នកសារព័ត៌មានទៅដល់ទីនោះដែរ ដាក់បម្រាមហាមថត កិច្ចប្រតិបត្តិការ បង្ក្រាបធ្វើឲ្យមហាជនងឿងឆ្ងល់ អាជ្ញាធរបង្ក្រាបចាប់មែនទែន ឬមួយយ៉ាងណាក៏មិនដឹង ឬ មួយទូហ្គេមនោះចាស់ពេកមិនចង់ឲ្យថត ឬ ត្រូវបានគេមកដឹកយកទៅដូរ ឬ មួយយកទៅជួសជុលក៏មិនដឹងកាលបើថតរូបមិនបានផង កុំថាឡើយសាកសួរជុំវិញរឿងបង្ក្រាបនោះ។
បើយោងតាមពលរដ្ឋរស់នៅក្បែរនោះបានបង្ហើបថា ទូហ្គេមនេះគេបានមកដាក់រកស៊ីនៅទីតាំងខាងលើជាយូរមកហើយ មិនមែនទើបតែដាក់នោះទេដោយគេបានរកស៊ីដោយរលូន ប៉ុន្ដែពេលនេះទើបអាជ្ញាធរថ្នាក់ខណ្ឌចុះមកបង្ក្រាប ហើយលាក់លាមហាមឃាត់មិនឲ្យក្រុមអ្នកសារព័ត៌មានថតផ្សាយទៀតផង ពលរដ្ឋមានការសង្ស័យថា ប្រហែលលោកអភិបាលរងខ្លាចម្ចាស់ទូហ្គេមទម្លាយរឿងអាថ៌កំបាំងអ្វីមួយប្រាប់ក្រុមអ្នកកាសែតទេដឹង ទើបបានជាលោកហាមបែបនេះ៕
Source: Kampuchea Thmey Daily
0 Comments