ភ្នំពេញ ៖ ស្ត្រីម្នាក់ បន្ទាប់ពីលួចលុយរបស់ជនបរទេស ខំព្យាយាមគេចខ្លួនបាន១ថ្ងៃរួចមក ក៏ត្រូវ កម្លាំងនគរបាលប៉ុស្តិ៍ផ្សារកណ្ដាលទី១នៃអធិការនគរបាលខណ្ឌដូនពេញកំណត់មុខសញ្ញា ឈានដល់ការឃាត់ខ្លួនជនសង្ស័យរូបនោះនៅថ្ងៃចន្ទ៨កើត ខែភទ្របទ ឆ្នាំ ច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៧ ខែកញ្ញា ឆ្នាំ២០១៨ វេលាម៉ោង១៩យប់។
មន្ត្រី ប៉ុស្តិ៍នគរបាលរដ្ឋបាលផ្សារកណ្តាលទី១នៃអធិការដ្ឋាននគរបាលខណ្ឌដូនពេញបានឲ្យដឹងថាជនសង្ស័យចំនួន០១នាក់ ដែលឃាត់ខ្លួនពីបទ លួច(លុយ ទូរស័ព្ទដៃនិងTAP LET)បានប្រព្រឹត្តកាលពីថ្ងៃទី១៦ខែកញ្ញាឆ្នាំ២០១៨ វេលាម៉ោង១៤ល្ងាចនៅចំណុចក្នុងសណ្ឋាគារ មូន ស៊ូន បន្ទប់លេខ១៦ជាន់ទី២ដែលមានទីតាំងផ្ទះលេខ៥១.៥៣.៥៥ ផ្លូវលេខ១៣០ភូមិទី១៤សង្កាត់ផ្សារកណ្តាលទី១ខណ្ឌដូនពេញរាជធានីភ្នំពេញ។
ជនសង្ស័យត្រូវឃាត់ខ្លួន ឈ្មោះសឿន សុខលី ភេទស្រីអាយុ៣៣ឆ្នាំជនជាតិខ្មែរ មុខរបរនិងទីលំនៅមិនពិតប្រាកដ។ វត្ថុតាងចាប់យកគ្មាន។ ជនរងគ្រោះ ឈ្មោះ PAUL REYNOLD SAIKOVSKI ភេទប្រុសអាយុ៥៩ឆ្នាំជនជាតិអូស្ត្រាលី មុខរបរទេសចរណ៍ កាន់លិខិតឆ្លងដែនលេខPA 4847972 ស្នាក់នៅសណ្ឋាគារមូនស៊ូន បន្ទប់លេខ១៦ជាន់ទី២ទីតាំងផ្ទះលេខ៥១.៥៣.៥៥ ផ្លូវលេខ១៣០សង្កាត់ផ្សារកណ្តាលទី១ខណ្ឌដូនពេញរាជធានីភ្នំពេញ។ សម្ភារៈបាត់បង់មាន លុយចំនួន៦០០ដុល្លា.លុយអូស្ត្រាលីចំនួន១០០០.លុយបាតចំនួន២០០០០បាត.ទូរស័ព្ទដៃម៉ាកHTC10មួយគ្រឿងពណ៌សនិង TAP LETពណ៌ខ្មៅមួយ។
សមត្ថកិច្ចបានឲ្យដឹងទៀតថា កាលថ្ងៃទី១៦ខែកញ្ញាឆ្នាំ២០១៨វេលាម៉ោង០៧និង០០នាទីជនរងគ្រោះបាននាំជនសង្ស័យមកដេកនៅសណ្ឋាគារមូនស៊ូនបន្ទប់លេខ១៦ជាន់ទី២ មានទីតាំងផ្ទះលេខ៥១.៥៣.៥៥ផ្លូវលេខ១៣០សង្កាត់ផ្សារកណ្តាលទី១ ខណ្ឌដូនពេញ ដោយជនរងគ្រោះមានសមភាពស្រវឹងបានដេកលក់ ហើយឆ្លៀតពេលនោះ ជនសង្ស័យបានលួចយកលុយ.ទូរស័ព្ទដៃនិងTAP LET ខាងលើដែលជារបស់ជនរងគ្រោះ រួចគេចខ្លួនបាត់។
ប្រភពព័ត៌មានបានបន្តទៀតថា បន្ទាប់ពីទទួលបានពាក្យបណ្តឹងពីជនរងគ្រោះ កម្លាំងយើងបានធ្វើការស្រាវជ្រាវ ដោយសហការជាមួយជនរងគ្រោះរហូតដល់ថ្ងៃទី១៧ ខែកញ្ញា ឆ្នាំ២០១៨ វេលាម៉ោង១៩យប់ក៏ឃើញជនសង្ស័យកំពុងដើរនៅសួនច្បារមាត់ទន្លេម្តុំកន្លែងហាត់ប្រាណក្នុងសង្កាត់ផ្សារកណ្តាលទី១ខណ្ឌដូនពេញ ក៏បានឃាត់ខ្លួនជនសង្ស័យយកមកប៉ុស្តិ៍នគរបាលរដ្ឋបាលផ្សារកណ្តាលទី១តែម្តង។
បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌដូនពេញដើម្បីកសាងសំណុំរឿងតាមនីតិវិធី៕
Source: Kampuchea Thmey Daily
0 Comments