ពោធិ៍សាត់៖ ២ថ្ងៃ មានអ្នកធ្វើអត្តឃាត ដោយចងក២នាក់ នៅស្រុក២ផ្សេងគ្នា ម្នាក់ចង់កមូលហេតុវិកលចរិត ម្នាក់ទៀតចងកសម្លាប់ខ្លួនឯងដោយសារជាប់បំណុលមីក្រូហិរញ្ញវត្ថុ។
ហេតុការណ៍នេះ បានកើតឡើងនៅវេលាម៉ោង១២និង០០នាទីថ្ងៃទី១៧ ខែកញ្ញា ឆ្នាំ២០១៨ ត្រង់ចំណុចដើមស្វាយ ម្ដុំក្បែរផ្ទះស្ថិតនៅភូមិឃុំស្វាយដូនកែវ ស្រុកបាកាន ខេត្តពោធិ៍សាត់ និងមួយកន្លែងទៀតវេលាម៉ោង៧និង៣០នាទីព្រឹកថ្ងៃទី១៨ ខែកញ្ញា ឆ្នាំ២០១៨ ត្រង់គំនាបលើផ្ទះស្ថិតក្នុងភូមិកណ្ដាល ឃុំផ្ទះរុង ស្រុកភ្នំក្រវាញ ខេត្តពោធិ៍សាត់។
បើតាមមន្ត្រីនគរបាលប៉ុស្តិ៍ស្វាយដូនកែវបានឲ្យដឹងថា ជនរងគ្រោះមានឈ្មោះ ងិន សុភក្រ អាយុ៣៦ឆ្នាំ ភេទប្រុស រស់នៅភូមិឃុំកើតហេតុខាងលើ។ បុរសរងគ្រោះរូបនេះ បានខ្ចីលុយមីក្រូហិរញ្ញវត្ថុចំនួន(១១.០០០ដុល្លារអាមេរិក) ដោយបានសងលុយអង្គការនោះជិតរួចអស់ហើយ។ លុះដល់ថ្ងៃកំណត់សងលុយជំពាក់បំណុលអង្គការមីក្រូហិរញ្ញវត្ថុ ចុងក្រោយត្រូវសងបំណុលទាំងដើមសងទាំងលុយប្រាក់ការ ខ្វះតែ(២លានរៀលគត់ប៉ុណ្ណោះ) រកលុយសងមិនបាន ក៏គិតខ្លីទាញចងអង្រឹងនីឡុងដើរទៅដើមស្វាយក្បែរមាត់ស្រះក្បែរផ្ទះចម្ងាយប្រមាណជា៥០ម៉ែត្រចងកនឹងមែកស្វាយស្លាប់តែម្ដង។
ដោយឡែកមួយករណីទៀតនៅស្រុកភ្នំក្រវាញ គឺជនរងគ្រោះឈ្មោះ ញ៉ រុន ភេទប្រុស អាយុ ២៤ ឆ្នាំរស់នៅភូមិឃុំខាងលើ។ មន្ត្រីរដ្ឋបាលប៉ុស្តិ៍ផ្ទះរុងបានឲ្យដឹងថា បុរសនោះជាមនុស្សវិកលចរិត ដោយគេបានអត្តឃាត២លើកមកហើយ តែមិនបានសម្រេច ដោយបងប្អូនដឹងជួយទាន់។ រហូតដល់លើកចុងក្រោយគ្មានក្រុមគ្រួសារនៅផ្ទះរវល់ធ្វើការ បុរសនោះ បានទាញ យកខ្សែអង្រឹង ចង ក ទៅនឹងគំនាបលើផ្ទះ បណ្តាលឲ្យស្លាប់តែម្ដង។
ក្រោយពេលកើតហេតុទាំង២ករណីនេះរួច កម្លាំងជំនាញបានចុះដល់ទីតាំងកើតហេតុហើយពិនិត្យឃើញថា បុរសទាំង២នេះស្លាប់ដោយអត្តឃាតពិតមែន ក៏ប្រគល់ជូនសាច់ញាតិធ្វើបុណ្យតាមប្រពៃណីខ្មែរ៕
Source: Kampuchea Thmey Daily
0 Comments