តាកែវ ៖ យ៉ាងហោចណាស់តូបលក់ដូរប្រមាណជាង១០០តូប ត្រូវបានអគ្គិភ័យឆេះបំផ្លាញស្ទើរតែអស់គ្មានសល់កាលពីយប់ថ្ងៃទី០៥ ខែសីហា ឆ្នាំ២០១៨ វេលាម៉ោង២និង០០នាទី រំលងអធ្រាត្រនៅក្នុងផ្សារព្រៃល្វា ស្ថិតក្នុងភូមិព្រៃល្វាកើត ឃុំព្រៃល្វា ស្រុកព្រៃកប្បាស ខេត្តតាកែវ។
ករណីនេះដែរលោក ជុំ ឈឿន អធិការនគរបាលស្រុកព្រៃកប្បាស បានឲ្យដឹងថា តូបលក់ដូរ ដែលត្រូវអគ្គិភ័យបានឆាបឆេះគឺតូបលក់អីវ៉ាន់ចាប់ហួយនិងសម្ភារៈ ចម្រុះដែលខូចខាតប្រហែល៥% នៃចំនួនតូបផ្សារទាំងអស់ រីឯទីតាំងដែលឆាបឆេះដំបូងគេ ខូចខាតប្រហែល៩០% ចំពោះតូបដែលឆេះសម្ភារៈខូចខាត នោះមានចំនួន១២០តូប។ ចំពោះមូលហេតុគឺទុស្សេខ្សែភ្លើងចេញពីតូបរបស់ឈ្មោះ សួយនិងឈ្មោះ ជា ហើយនៅមុនពេលមានអណ្តាតភ្លើងឆាបឆេះគឺមានឮសូសំឡេងផ្ទុះឆេះរីករាលដាល។ បន្ទាប់ពីមានករណីអគ្គិភ័យឆាបឆេះតូបក្នុងផ្សារភ្លាម លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានដឹកនាំកម្លាំងនគរបាលខេត្ត-ស្រុក សហការជាមួយអាជ្ញាធរពាក់ព័ន្ធ ចុះអន្តរាគមន៍ជួយពន្លត់អគ្គិភ័យខាងលើ ដោយប្រើប្រាស់រថយន្តពន្លត់អគ្គិភ័យចំនួន០៣គ្រឿងនិងប្រើប្រាស់ទឹកអស់ចំនួន១៥រថយន្ត ទើបពន្លត់បានជាស្ថាពរ។
លោកអធិការនគរបាលស្រុកបានបញ្ជាក់ថា ចំពោះចំនួនតូបទាំងអស់មាន១២០តូប តែមានក្រុមអាជីវករលក់ដូរក្នុងផ្សារមានតែ៣៩អាជីវករប៉ុណ្ណោះ ដោយតូបមួយចំនួនធំត្រូវអាជីវករទិញសម្រាប់ស្តុបទុកអីវ៉ាន់របស់ពួកគាត់ហើយបើគិតពីចំនួនការខូចខាតជាថវិកាវិញមានប្រមាណជាង២៩ម៉ឺនដុល្លា៕
Source: Kampuchea Thmey Daily
0 Comments