ស្ទឹងត្រែង ៖ កម្លាំងរដ្ឋបាលព្រៃឈើខេត្តស្ទឹងត្រែងសហការជាមួយកម្លាំងកងរាជអាវុធហត្ថខេត្តបានចុះឃាត់ទូកដឹកឈើប្រណីតប្រភេទធ្នង់ចំនួន ៣២ដុំស្មើនឹង ប្រមាណ២ម៉ែត្រគូប និងបានរឹបអូសយកមករក្សាទុកនៅខណ្ឌរដ្ឋបាលព្រៃឈើខេត្តចំណែកអ្នកបើកបរទូកបានរត់គេចខ្លួន។
ករណីនេះ បានធ្វើឡើងនៅវេលាម៉ោង៣និង ៣០ នាទីថ្ងៃទី ០៤ខែកញ្ញាឆ្នាំ ២០១៨ត្រង់ចំណុច ភូមិ ហាងខូសួន សង្កាត់សាមគ្គី ក្រុងខេត្តស្ទឹងត្រែង។
លោកហ៊ុន សំអឿននាយរងសង្កាត់រដ្ឋបាលព្រៃឈើអូរពងមាន់បានឲ្យដឹងថា ៖ មន្ត្រីជំនាញតែងសហការជាមួយមន្ត្រីកងរាជអាវុធហត្ថខេត្តដើម្បីបង្ក្រាបបទល្មើសខុសច្បាប់ ជាពិសេសនៅរដូវទឹកឡើងនេះ ក្រុមឈ្មួញតែងតែលួចលាក់ដឹកឈើទាំងថ្ងៃទាំងយប់ ខ្លះប្រើរថយន្តខ្លះប្រើទូក។
លោកនាយរងសង្កាត់បន្តថា ករណីបង្ក្រាបនេះ ដោយមានការសហការផ្តល់ព័ត៌មានបងប្អូនប្រជាពលរដ្ឋយើង ពីបទល្មើសដឹកឈើតាមផ្លូវទឹក ហើយកម្លាំងជំនាញក៏បានចុះល្បាតប្រទះឃើញនៅតាមដងទន្លេមេគង្គចំណុច ភូមិ ហាងខូសួន សង្កាត់សាមគ្គី ទើបរឹបអូសយកមករក្សាទុក។
លោកនាយរងបន្តថា ៖ នេះជាលើកទី១នៅក្នុងខែកញ្ញានេះ បន្ទាប់ពីនៅខែសីហាយើងបង្ក្រាបបាន២លើករួចមកនោះ។
បច្ចុប្បន្នឈើនិងវត្ថុតាងមានទូកមួយ និងម៉ាស៊ីន២គ្រឿនត្រូវបានសមត្ថកិច្ចជំនាញយកមករក្សាទុកនៅខណ្ឌរដ្ឋបាលព្រៃឈើខេត្តស្ទឹងត្រែងដើម្បីចាត់ការទៅតាមនីតិវិធី៕
Source: Kampuchea Thmey Daily
0 Comments