ព្រឹត្តិការណ៍ប្រដាល់មួយដែលមានអ្នកប្រដាល់ជើងខ្លាំងកម្ពុជា៤រូប និង អ្នកប្រដាល់ជើងខ្លាំងថៃ៤រូប ដើម្បីជួបគ្នាវាយដណ្តើមខ្សែក្រវាត់ខារ៉ាបាវរដូវកាលទី៧ ទម្ងន់៦០គីឡូក្រាមនោះ នឹងចាប់ផ្តើមធ្វើការប្រកួតជម្រុះនៅរសៀលថ្ងៃទី០៨ កញ្ញា ២០១៨នេះហើយ នៅលើសង្វៀនSEA-TV។
សម្រាប់ការវាយជម្រុះថ្ងៃដំបូងនេះ ឃីម បូរ៉ា អ្នកប្រដាល់កម្ពុជាក្លិបរស្មីភូមិគាបខេត្ត បន្ទាយមានជ័យ នឹងជួបប្រកួតជាមួយអ្នកប្រដាល់ថៃ Phat Chhayak Phum ហើយមួយគូ ទៀ តជាការជួបគ្នារវាងសុខ សាវិន ក្លិបឆ្មាសសែនសុខគុនខ្មែរ និង អ្នកប្រដាល់ថៃ Phat Maha ដោយប្រកួតក្នុងទម្ងន់៦០គីឡូក្រាម ។
ឃីម បូរ៉ា និង Phat Chhayak Phum ពួកគេទាំងពីរនាក់នេះ ធ្លាប់ជួបគ្នាម្តងហើយកាលពីថ្ងៃទី០២មិថុនា២០១៨កន្លងមក ដោយឃីម បូរ៉ា ឈ្នះ Phat Chhayak Phum ក្នុងទឹកទី២ ។ តែយ៉ាងណាឃីម បូរ៉ា និង Phat Chhayak Phum នេះ គេមានសមត្ថភាពប្រហាក់ប្រហែលគ្នាទេ ហើយមាឌក៏ប្រហែលគ្នាដែរ គ្រាន់តែបូរ៉ាមានកំនត់ត្រាប្រកួតច្រើនជាងប៉ុណ្ណោះ ។
Phat Chhayak Phum គេមានកំនត់ត្រាប្រកួតចំនួន៨៥លើក ឈ្នះ៧០លើក ចាញ់១៤លើក និងស្មើ០១លើក ។ ចំណែកឃីម បូរ៉ា គេមានកំនត់ត្រាប្រកួត១០៨លើក ឈ្នះ៧៨លើក ចាញ់២៨លើក និងស្មើ០២លើក ។ ឃីម បូរ៉ា គេប្រកួតលើកចុងក្រោយ(០៤សីហា២០១៨) គេវាយចាញ់Soun Tepheap ដោយពិន្ទុ។ ចំណែក ការប្រកួតលើកចុងក្រោយរបស់ Phat Chhayak Phum (០២មិថុនា២០១៨) គឺចាញ់ឃីម បូរ៉ា ដោយពិន្ទុ ។
ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះក៏មិនអាចអ្នកណាមើលស្រាលអ្នកណាបានដែរ ។
ចំពោះការជួបគ្នារវាងសុខ សាវិន និង Phat Maha វិញ ប្រហែលជាមិនពិបាកទស្សន៍ទាយនោះទេ ។ត្បិតថា សាវិន គេមានផ្លែល្អជាងPhat Maha បើតាមកត់សម្គាល់ឃើញ Maha ប្រកួតជាមួយសូត្រ ប៊ុនធី កន្លងទៅថ្មីៗនេះ ដោយMahaត្រូវប៊ុនធីវាយឲ្យសន្លប់ក្នុងទឹកទី៣នោះ ។
Phat Maha គេទើបតែមកប្រកួតនៅស្រុកខ្មែរបានម្តងជាមួយសូត្រ ប៊ុនធីប៉ុណ្ណោះ។គេវាយល្អនិងខ្លាំងគួរសមដែរ។ បើមើលពីប្រវត្តិប្រកួតរបស់គេ គឺប្រកួតបាន៥៧លើក ឈ្នះ៥០លើក និងចាញ់០៧លើក ។
សុខ សាវិន អ្នកប្រដាល់កម្ពុជាយើងនេះ គេមានប្រវត្តិប្រកួត៩២លើក ឈ្នះ៦៧លើកចាញ់២០លើក និងស្មើ០៥លើក ។ យ៉ាងណាសម្រាប់ការប្រកួតជុំដំបូងនេះ គេរំពឹងថាសុខ សាវិន នឹងរកបាន៣ពិន្ទុមិនខាន ក្នុងការជួប Phat Maha នេះ ។
សូមបញ្ជាក់ថា ការប្រកួតជើងឯកខារ៉ាបាវរដូវកាលទី៧ ទម្ងន់៦០គីឡូក្រាមលើកនេះ មានអ្នកប្រដាល់ខ្លាំងៗចំនួន ៨ រូប ចូលរួមប្រកួត គឺខ្មែរ៤នាក់ ថៃ៤នាក់ ។ អ្នកប្រដាល់ខ្មែរទាំង៤នាក់នោះ រួមមានឃីម បូរ៉ា ក្លិបរស្មីភូមិគាបខេត្តបន្ទាយមានជ័យ , សុខ សាវិន ក្លិបឆ្មាសសែនសុខគុនខ្មែរ , លី ភា ក្លិបសំរោងកោងខេត្តបាត់ដំបង និងសូត្រ ខេវិន ក្លិបបក្សីស្លាបដែក។ ឯ អ្នកប្រដាល់ថៃ ៤ នាក់វិញ មាន Phat ChhayakPhum , Phat Maha , Phat Ngenthong និង Phat Thana ។
ចំពោះការការប្រកួតក្រៅពីគូខ្សែក្រវាត់នេះ កូយ ឡាយ អ្នកប្រដាល់ក្លិបកងពលតូចទ័ពឆ័ត្រយោង៩១១ ត្រូវគេផ្គូអោយជួបប្រកួតជាមួយសុខ សុវណ្ណ អ្នកប្រដាល់ក្លិបកងពលធំអន្តរាគមន៍លេខ២ ។ សម្រាប់ការជួបគ្នារវាងអ្នកប្រដាល់ទាំងពីរនាក់នេះ គេមិនរំពឹងថា កូយ ឡាយ អាចវាយឈ្នះសុខ សុវណ្ណ នោះឡើយ ? ព្រោះកូយ ឡាយ មានផ្លែចាញ់ សុខ សុវណ្ណ ទេ ។
លីន សៀម អ្នកប្រដាល់ក្លិបបូរីរាជសីហ៍មានរិទ្ធ នឹងជួបប្រកួតជាមួយគង់ វិរៈ អ្នកប្រដាល់ក្លិបយុវវាលស្បូវខណ្ឌច្បារអំពៅ ។ ពួកគេពីរនាក់នេះ មិនដែលជួបគ្នាទេកន្លងមក ។ពួកគេជួបគ្នាក្នុងទម្ងន់៥១គីឡូក្រាម ។ ចាំមើល រវាង លីន សៀម និង គង់ វិរៈ នេះ តើនរណាឈ្នះ ? ៕
Source: Kampuchea Thmey Daily
0 Comments