ព្រឹត្តិការណ៍ប្រកួតកីឡាប៉េតង់ជ្រើសរើសជើងឯកពិភពលោកលើកទី៤៨ ឆ្នាំ២០១៨ផ្នែកបុរស នឹងចាប់ផ្ដើមពីថ្ងៃទី១៣ រហូតដល់ ថ្ងៃទី១៨ ខែកញ្ញា ឆ្នាំ២០១៨ នៅទីក្រុងកេបិក( Quebec) ប្រទេសកាណាដា។
សហព័ន្ធកីឡាប៉េតង់ និងប៊ូលកម្ពុជា ប្រកាសថា នឹងបញ្ជូនក្រុមកីឡាករប៉េតង់របស់ខ្លួនចំនួន៤នាក់ និងគ្រូបង្វឹកមួយរូប ទៅចូលរួមព្រឹត្តិការណ៍នៃការប្រកួតកីឡាប៉េតង់ជ្រើសរើសជើងឯកពិភពលោកលើកទី៤៨ ឆ្នាំ២០១៨ផ្នែកបុរសនេះ។
លោក អ៊ឹម ផាត គ្រូបង្វឹកក្រុមបុរសបានមានប្រសាសន៍ថាការប្រកួតជើងឯកពិភពលោកលើកនេះ ខាងសហព័ន្ធកីឡាប៉េតង់និងប៊ូលកម្ពុជា នឹងបញ្ជូនក្រុមកីឡាករចំនួន៤នាក់ រួមមានកីឡាករ សុខ ចាន់មាន កីឡាករ យឹម សុភ័ណ្ឌ កីឡាករ ថោង ឈឿន និងកីឡាករ ស៊ីន វង់។
លោក អ៊ិន គឹមស្រ៊ុន ដែលជាអគ្គលេខាធិការ សហព័ន្ធសហព័ន្ធកីឡាប៉េតង់ និងប៊ូលកម្ពុជា គឺជាប្រធានប្រតិភូដឹកនាំ ដែលនឹងចេញដំណើរនៅថ្ងៃទី១០ ខែកញ្ញា ឆ្នាំ២០១៨ខាងមុខ ។សម្រាប់ការប្រកួតមានតែ២វិញ្ញាសាប៉ុណ្ណោះ គឺវិញ្ញាសាវាយយកពិន្ទុនិងវាយ៣នាក់ទល់៣នាក់បុរស។
សូមបញ្ជាក់ថា សុខ ចាន់មាន គឺជាម្ចាស់មេដាយពិភពលោកដែលត្រូវចូលរួមការពារតំណែងរបស់ខ្លួន៕
Source: Kampuchea Thmey Daily
0 Comments