សៀមរាប ៖ សត្វព្រៃ ប្រមាណជិត២០០ក្បាល ដែលមានចំនួន៤ប្រភេទនោះ ត្រូវបានឈ្មួញដឹកយកមកជួញដូរតាមហាងផឹកស៊ីនៅកណ្ដាលក្រុងទេសចរណ៍សៀមរាប។ ប៉ុន្តែសំណាងល្អបានជួយសង្គ្រោះ ដោយក្រុមមន្ត្រីជំនាញ។
ហេតុការណ៍ចុះបង្ក្រាបនេះ ធ្វើឡើងនៅថ្ងៃទី៤ ខែកញ្ញា ឆ្នាំ២០១៨ នៅចំណុចព្រះអង្គចេកព្រះអង្គចម ក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប។
សមត្ថកិច្ចបានឲ្យដឹងនៅព្រឹកថ្ងៃទី០៥នេះថា ប្រតិបត្តិការនេះ មានកម្លាំងសង្កាត់រដ្ឋបាលព្រៃឈើបាគង និងផ្នែករដ្ឋបាលព្រៃឈើបន្ទាយស្រី សហការជាមួយកម្លាំងអាវុធហត្ថខេត្ត ព្រមទាំងក្រុមអន្តរាគមន៍បង្ក្រាបបទល្មើសសត្វព្រៃ បានធ្វើការចាប់ឃាត់សត្វព្រៃ នៅចំណុចព្រះអង្គចេកព្រះអង្គចម ខាងលិចរង្វង់មូលស្ពានថ្ម ហើយធ្វើការដោះលែងចូលព្រៃធម្មជាតិ នៅថ្នាលបណ្តុះកូនឈើស្ពានអង្គរ។
សមត្ថកិច្ចបន្តថា សត្វព្រៃដែលបានបង្ក្រាបនោះរួមមាន ៖ គ្រលីងគ្រលោងរស់ចំនួន៣ក្បាល,សារិកាកែវក្របីរស់ចំនួន៦០ក្បាល,លលកទ្រាំងរស់ចំនួន១១២ក្បាល, លលកបាយរស់ចំនួន៤២ក្បាល។ ក្នុងការបង្ក្រាបនោះ សមត្ថកិច្ចពុំបានដាក់ទោសទណ្ឌ ឬពិន័យទៅលើឈ្មួញ ដែលជាម្ចាស់សត្វព្រៃនោះទេ។ ប៉ុន្តែបានធ្វើកិច្ចសន្យា បញ្ឈប់រាល់សកម្មភាព ការជួញដូរសត្វព្រៃទាំងនេះជាបន្តទៀត។
ទោះជាយ៉ាងនេះក្តីក្រុមអ្នកតាមដានបទល្មើសសត្វព្រៃបានបង្ហាញថា បច្ចុប្បន្ននេះ សត្វព្រៃជាច្រើនប្រភេទ ត្រូវបានក្រុមឈ្មួញដឹកយកមកលក់នៅតាមហាងផឹកស៊ីម្តុំផ្លូវ៦០ម៉ែត្រ និងម្តុំក្រោយស្តាតចាស់ ព្រមទាំងហាងផ្សេងៗជាច្រើនទៀត។ ទង្វើបែបនេះគេដាក់ការសង្ស័យថា សមត្ថកិច្ចជំនាញខ្លះអាចជាប់ពាក់ព័ន្ធ នឹងបទល្មើសទាំងនេះយ៉ាងត្រជាក់ត្រជុំហើយទើបមិនមានការបង្ក្រាបឲ្យដល់ឫសគល់បែបនេះ៕
Source: Kampuchea Thmey Daily
0 Comments