អនុប្រធានាធិបតីអាមេរិកលោក Mike Pence បានអំពាវនាវដល់ប្រទេសមីយ៉ាន់ម៉ាឲ្យដោះលែងអ្នកកាសែតពីរនាក់ដែលត្រូវបានផ្តន្ទាទោសជាប់ពន្ធនាគាររយៈពេល៧ឆ្នាំពីបទកាន់កាប់អាថ៌កំបាំងរដ្ឋទាក់ទងនឹងការរាយការណ៍របស់ពួកគេអំពីការសម្លាប់រង្គាលប្រឆាំងនឹងជនមូស្លីមរ៉ូហ៊ីងយ៉ា។
លោក Wa Lone និង Kyaw Soe Oo មកពីទីភ្នាក់ងារសារព័ត៌មានរ៉យទ័រត្រូវបានកាត់ទោសកាលពីថ្ងៃចន្ទក្នុងដំណើរការនីតិវិធីដែលត្រូវបានគេរិះគន់យ៉ាងទូលំទូលាយថា មិនយុត្តិធម៌។
ពួកគេបានរាយការណ៍អំពីយុទ្ធនាការបង្ក្រាបដ៏ឃោរឃៅរបស់កងទ័ពដែលបានបណ្ដេញជនជាតិរ៉ូហ៊ីងយ៉ាប្រមាណ៧០០,០០០នាក់ឲ្យរត់ភៀសខ្លួនទៅកាន់ប្រទេសបង់ក្លាដែស។
លោក Pence កាលពីថ្ងៃអង្គារបានបង្ហោះ Twitter ថា ពួកគេគួរតែត្រូវបានគេសរសើរមិនមែនជាប់ពន្ធនាគារទេសម្រាប់ការងាររបស់ពួកគេដែលបង្ហាញពីការរំលោភសិទិ្ធមនុស្សនិងការសម្លាប់រង្គាល។
លោកសរសេរថា “សេរីភាពខាងជំនឿសាសនានិងសេរីភាពសារព័ត៌មានគឺចាំបាច់ណាស់ចំពោះលទ្ធិប្រជាធិបតេយ្យដ៏រឹងមាំមួយ។ យើងសូមអំពាវនាវដល់រដ្ឋាភិបាលមីយ៉ាន់ម៉ាឲ្យលុបចោលសេចក្តីសម្រេចនេះហើយដោះលែងពួកគេភ្លាម”។
ទន្ទឹមនោះ អគ្គលេខាធិការអង្គការសហប្រជាជាតិលោក Antonio Guterres ក៏បានជំរុញផងដែរឲ្យអាជ្ញាធរមីយ៉ាន់ម៉ាពិនិត្យឡើងវិញនូវការសម្រេចចិត្តរបស់ពួកគេ។
ករណីនេះបានទាក់ទាញការយកចិត្តទុកដាក់ពីពិភពលោកថាឧទាហរណ៍មួយអំពីរបៀបដែលកំណែទម្រង់ប្រជាធិបតេយ្យនៅក្នុងប្រទេសមីយ៉ាន់ម៉ាត្រូវជាប់គាំងនៅក្រោមការដឹកនាំរបស់រដ្ឋាភិបាលស៊ីវិលរបស់លោកស្រីអ៊ួងសានសូជីដែលបានកាន់កាប់អំណាចក្នុងឆ្នាំ២០១៦។
បើទោះបីជាយោធាដែលត្រួតត្រាប្រទេសមីយ៉ាន់ម៉ាអស់រយៈពេលពាក់កណ្តាលសតវត្សរ៍នៅតែរក្សាការគ្រប់គ្រងក្នុងក្រសួងសំខាន់ៗជាច្រើនក៏ដោយ ការឡើងកាន់តំណែងរបស់លោកស្រីស៊ូជីក្នុងនាមជាមេដឹកនាំរដ្ឋាភិបាលបានលើកឡើងនូវក្តីសង្ឃឹមសម្រាប់ការផ្លាស់ប្តូរយ៉ាងឆាប់រហ័សទៅរកលទ្ធិប្រជាធិបតេយ្យពេញលេញប៉ុន្តែជំហររបស់លោកស្រីចំពោះវិបត្តិរ៉ូហ៊ីងយ៉ាបានធ្វើឲ្យអតីតអ្នកគាំទ្រជាច្រើនមានការខកចិត្ត៕ AP
[caption id="attachment_971797" align="alignnone" width="960"]
[/caption]Source: Kampuchea Thmey Daily
0 Comments