ព្រលានយន្តហោះដ៏ធំមួយ ដែលត្រូវបានកាត់ផ្តាច់នៅពេលព្យុះទីហ្វុងដ៏សាហាវមួយវាយប្រហារផ្លូវចូលតែមួយគត់របស់ខ្លួននោះគឺបានជម្លៀសមនុស្សចេញកាលពីថ្ងៃពុធ ខណៈប្រទេសជប៉ុនជួបប្រទះនឹងការបំផ្លិចបំផ្លាញ ដែលបង្កឡើងដោយព្យុះដ៏មានឥទ្ធិពលបំផុតក្នុងរយៈពេល២៥ឆ្នាំមកនេះ។
ទូកជាច្រើនបានដឹកអ្នកដំណើរដែលជាប់គាំងចេញពីអាកាសយានដ្ឋានអន្តរជាតិ Kansai បន្ទាប់ពីមនុស្សរាប់ពាន់នាក់ត្រូវបានបង្ខំឲ្យចំណាយពេលមួយយប់នៅក្នុងកន្លែងដែលលិចទឹក។
មនុស្សយ៉ាងតិច១០នាក់បានស្លាប់និងរាប់រយនាក់ទៀតរងរបួសដោយសារព្យុះទីហ្វុង Jebi ខណៈដែលវាបានរាលដាលទៅដល់តំបន់ផលិតកម្មធំៗនៅជុំវិញទីក្រុងអូសាកាដែលជាទីក្រុងលំដាប់ទី២របស់ប្រទេសជប៉ុនដែលបំផ្លាញហេដ្ឋារចនាសម្ព័ន្ធនិងផ្ទះសម្បែង។
ល្បឿនខ្យល់រហូតដល់២១៦គីឡូម៉ែត្រក្នុងមួយម៉ោងបានបំប៉ើងដំបូលផ្ទះ បំបះរថយន្តដឹកទំនិញនៅលើស្ពាននិងបំប៉ើងនាវាដឹកប្រេងទម្ងន់២,៥០០តោនមួយគ្រឿងឲ្យទៅបុកស្ពានមួយដែលជាផ្លូវនាំទៅព្រលានយន្តហោះដែលជាច្រកផ្លូវអន្តរជាតិដ៏សំខាន់និងជាមជ្ឈមណ្ឌលដឹកជញ្ជូនជាតិ។
ការខូចខាតដល់ស្ពាននេះបានបណ្តាលឲ្យផ្លូវទៅកោះសិប្បនិម្មិតត្រូវបានកាត់ផ្តាច់ហើយធ្វើឲ្យភ្ញៀវទេសចរប្រមាណ៣,០០០នាក់និងបុគ្គលិកបន្ថែមទៀតត្រូវជាប់គាំងពេញមួយយប់។
ផ្លូវក្រោមដីត្រូវបានជន់លិចខណៈដែលរលកខ្ពស់បានបោកចូលក្នុងព្រលានយន្តហោះកាលពីថ្ងៃអង្គារដែលជាហេតុធ្វើឲ្យបង្គោលភ្លើងត្រូវដួលរលំនិងជន់លិចអគារនោះ។
គិតត្រឹមថ្ងៃពុធ មនុស្សរាប់រយនាក់ត្រូវបានគេដឹកទៅទីក្រុង Kobe តាមទូកដែលជួលពិសេសប៉ុន្តែមនុស្សជាងពីរពាន់នាក់ទៀតនៅតែកំពុងរង់ចាំការជួយសង្គ្រោះ។
ទោះបីជាយ៉ាងណាក៏ដោយ មិនមានការចង្អុលបង្ហាញនៅឡើយទេថាតើនៅពេលណាទើបព្រលានយន្តហោះដែលដំណើរការជាង៤០០ជើងហោះហើរក្នុងមួយថ្ងៃមួយនេះអាចនឹងបើកឡើងវិញ។
អ្នកនាំពាក្យរដ្ឋាភិបាលលោក Yoshihide Suga បាននិយាយថា អ្នកស្លាប់ដោយសារព្យុះនេះមានចំនួន១០នាក់ហើយ៣០០នាក់បានរងរបួស៕ AFP
Source: Kampuchea Thmey Daily
0 Comments