ខ្សែការពារឆ្វេងរបស់ក្លិបភ្នំពេញក្រោន គឺកីឡាករ សឿត បារាំង ដែលរងរបួសជង្គង់ តែអាចចូលហ្វឹកហាត់ជាមួយក្រុមរបស់ខ្លួនវិញបណ្តើរៗហើយ ខណៈរបួសនោះនៅមិនទាន់ជាសះស្បើយពេញលេញនោះទេ ដើម្បីត្រៀមក្នុងយុទ្ធនាការប្រកួតពានរង្វាន់លីគកំពូលកម្ពុជា Metfone Cambodian League 2018 ដែលនៅសល់ការប្រកួតមួយចំនួនទៀត។
កីឡាករ សឿត បារាំង បានអះអាងជុំវិញរបួសរបស់ខ្លួនថា «ឥឡូវនេះខ្ញុំបានចូលរួមហ្វឹកហាត់ជាមួយមិត្តរួមក្រុមវិញហើយ តែបើទោះបីជាយ៉ាងណាក៏ដោយ ក៏ខ្ញុំគិតថាវាមិនទាន់ជា ១០០ភាគរយនោះទេ ព្រោះខ្ញុំនៅមានការឈឺចាប់បន្តិចបន្តួចនៅបរិវេណជង្គង់នោះ»។ កីឡាកររូបនេះបានប៉ះទង្គិចគ្នាជាមួយកីឡាកររបស់ក្រុមវិសាខា ពេលប្រកួតលីគកំពូលកម្ពុជា កាលពាក់កណ្ដាលខែកក្កដា កន្លងទៅដោយចំជង្គង់។
កីឡាករដែលដុះចេញពីយុវជនថ្នាលក្នុងក្លិបភ្នំពេញក្រោន មួយនេះបានបន្តថា «ខ្ញុំគិតថាមិនយូរទេខ្ញុំនឹងវិលត្រលប់មកវិញ ព្រោះខ្ញុំនឹងសម្រាកព្យាបាលខ្លួនឲ្យបានល្អ ហើយមួយទៀតនោះគឺខ្ញុំនឹងជំនះភាពឈឺចាប់ទាំងនេះ។ ពេលហ្វឹកហាត់ខ្ញុំអត់សូវហ៊ានប្រថុយពេកទេ ដោយសារទើបជាតិចៗអីញ្ចឹង ខ្លាចប៉ះទៀតមានបញ្ហាលើសដើម សូម្បីទាត់ជើងស្ដាំក៏ខ្ញុំអត់ទាន់ហ៊ានទាត់ដែរ។ និយាយទៅយើងរាងស្រៀវៗ ញោចៗ អត់ទាន់វិលដូចដើម១០០%ទេ។ មួយវិញទៀតបញ្ហាកម្លាំង ដោយសារយើងសម្រាកយូរអញ្ចឹង ធ្វើឲ្យបាត់បង់ភាពស៊ាំនឹងការលេង ខ្ញុំគិតថា ការប្រមូលកម្លាំងឥលូវបានប្រហែល៨០%នៅឡើយ»។
របួសនេះមិនអាចឲ្យកីឡាករវ័យ១៨ឆ្នាំរូបនេះ ជួយក្រុមភ្នំពេញក្រោន ក្នុងប្រកួតវគ្គ១៦ក្រុមចុងក្រោយជើងទី២ នៃពានរង្វាន់សម្តេចតេជោ ហ៊ុន សែន ជើងទី២ ពេលប៉ះជាមួយក្រុមអគ្គីសនីកម្ពុជា និងវគ្គ៨ក្រុមចុងក្រោយជាមួយក្រុមអង្គរថាយហ្គឺរ បាននោះទេ។ កីឡាកររូបនេះក៏បានអវត្តមានជាច្រើនប្រកួតក្នុងពានរង្វាន់លីគកំពូលកម្ពុជាផងដែរ។
កីឡាករ សឿត បារាំង គឺចេញពីយុវជនថ្នាលរបស់ក្លិបភ្នំពេញក្រោន ចន្លោះឆ្នាំ២០១១ មកម្ល៉េះហើយរូបគេត្រូវបានគ្រូបង្វឹកកោះហៅឲ្យចូលរួមក្នុងក្រុមឈុតធំនៅឆ្នាំ២០១៦ មកទល់បច្ចុប្បន្ន។ ក្រៅពីប្រកបអាជីពនៅក្នុងក្លិប បារាំង ធ្លាប់ជាប់ឈ្មោះក្នុងក្រុមជម្រើសជាតិកម្ពុជា ផងដែរគឺនៅឆ្នាំ២០១៦ ជាប់ឈ្មោះជួយក្រុម U19កម្ពុជាហើយចាប់ពីឆ្នាំ២០១៧ រូបគេជាប់ឈ្មោះក្នុងក្រុម U22 កម្ពុជា និងក្រុមជម្រើសជាតិកម្ពុជា ឈុតធំផងដែរ៕
Source: Kampuchea Thmey Daily
0 Comments