ភ្នំពេញ ៖ ម្ចាស់រថយន្តស៊េរីទំនើបម៉ាកហ្វើវ៉ារីមួយគ្រឿងបានរារាំងអ្នកយកព័ត៌មានមិនឲ្យថតផ្តិតយករូបភាពខណៈខ្លួនបើកបរក្នុងល្បឿនលឿនដូចហោះហើយ រេចង្កូតពេញផ្លូវឡើងខឿនថ្មចិញ្ចើមផ្លូវ ជ្រុលទៅបុករឺហ្គាលូ នៅតាមចិញ្ចើមផ្លូវមុខផ្ទះលោកជា សុផារ៉ា ទៅមុខលែងរួចរងការខូចខាតយ៉ាងដំណំតែសំណាងល្អអ្នកបើកបររងរបួសស្រាល កាលពីវេលាម៉ោង១១នឹង៥៥នាទីថ្ងៃត្រង់ថ្ងៃទី០៧ ខែកញ្ញា ឆ្នាំ២០១៨ ស្ថិតតាមបណ្តោយផ្លូវលេខ៥៩៨ត្រង់ចំណុចមុខផ្ទះលោកជាសុផារ៉ា ភូមិទួលពពែ សង្កាត់ទួលសង្កែ២ ខណ្ឌឫស្សីកែវ។
រថយន្តខាងលើស៊េរីទំនើបនោះ ម៉ាកហ្វើវ៉ារី ពណ៌ក្រហម ពាក់ស្លាកលេខ ភ្នំពេញ2AJ-7777អ្នកបើកបរមិនត្រូវបានស្គាល់អត្តសញ្ញាណនោះឡើយ។
ប្រភពព័ត៌មានពីអ្នកឃើញហេតុការណ៍បានឲ្យដឹងថា នៅមុនពេលកើតហេតុរថយន្តខាងលើបើកដោយបុរសម្នាក់បានធ្វើដំណើរតាមបណ្តោយផ្លូវ៥៩៨ ទិសដៅពីជើងទៅត្បូង ខណៈមកដល់ចំណុចកើតហេតុបានរេចង្កូតទៅឆ្វេងដៃបន្តិចភ្លាមៗនោះរថយន្តបានរេមកស្តាំដៃ ក៏ជ្រុលទៅបុកគម្របលូ ដែលនៅអែបចិញ្ចើមផ្លូវបណ្តាលឲ្យរថយន្តទៅមុខលែងរួចតែម្តង។
ក្រោយពេលកើតហេតុសមត្ថកិច្ចប៉ុស្តិ៍និងសមត្ថកិច្ចជំនាញក្រុង បានមកដល់កន្លែងកើតហេតុពិនិត្យមើលដោយឃើញរថយន្តខាងលើមិនបង្កឲ្យប៉ះពាល់រងការខូចខាតទ្រព្យសម្បត្តិរដ្ឋប៉ះពាល់តែសម្បត្តិឯកជនរបស់ខាងផ្ទះលោកជា សុផារ៉ា ហើយម្ចាស់រថយន្តបានចេញមុខមកដោះស្រាយជាមួយតំណាងលោកជា សុផារ៉ា ដោយធ្វើការជួសជុលឲ្យទាំងស្រុងដើម្បីបញ្ចប់រឿងនៅកន្លែងកើតហេតុ។
បន្ទាប់ពីរថយន្តបើកលឿនហាក់ដូចជាប្រណាំងហើយ រត់ហក់ឡើងទៅលើគំរបលូទៅមុខលែងរួចម្ចាស់ក៏បានរត់ទិញតង់យកមកគ្របហើយរារាំងអ្នកកាសែតមិនឲ្យថតទៀតផង៕
Source: Kampuchea Thmey Daily
0 Comments