ភ្នំពេញ ៖ ការស្នើនេះ បានធ្វើឡើងក្នុងជំនួបរវាងថ្នាក់ដឹកនាំ គ.ជ.ប ដឹកនាំដោយលោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ជាមួយគណៈប្រតិភូសមាគមគ្រឹះស្ថានឧត្តមសិក្សាកម្ពុជា ដែលបានចូលរួមសង្កេតការណ៍បោះឆ្នោតជ្រើសតាំងតំណាងរាស្ត្រ នីតិកាលទី៦ ដឹកនាំដោយលោកបណ្ឌិត ហេង វ៉ាន់ដា កាលពីព្រឹកថ្ងៃទី០៧ ខែកញ្ញា ឆ្នាំ២០១៨ នៅការិយាល័យកណ្ដាលថ្មីរបស់ គ.ជ.ប ស្ថិតនៅសង្កាត់ទន្លេបាសាក់ ខណ្ឌចំការមន។
ថ្លែងទៅកាន់ថ្នាក់ដឹកនាំ គ.ជ.ប នៅក្នុងជំនួបនោះ លោកបណ្ឌិត ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជាបានលើកឡើងថា សមាគមគ្រឹះស្ថានឧត្តមសិក្សាកម្ពុជា បានសង្កេតឃើញជារួមថា គណៈកម្មការរៀបចំការបោះឆ្នោតគ្រប់កម្រិត រួមទាំងអគ្គលេខាធិការដ្ឋាន ពិតជាមានសមត្ថភាពគ្រប់គ្រាន់ក្នុងការអនុវត្តតាមរដ្ឋធម្មនុញ្ញ ច្បាប់បោះឆ្នោត លិខិតបទដ្ឋានគតិយុត្តិរបស់កម្ពុជា ប្រតិទិនការងារ បច្ចេកទេស បទពិសោធន៍ និងជំហរអព្យាក្រឹត យុត្តិធម៌ ស្អាតស្អំ និងតម្លាភាព ហើយដំណើរការបោះឆ្នោតវិញ ពិតជាប្រព្រឹត្តិដោយរលូន តម្លាភាព សេរី និងយុត្តិធម៌។
នៅក្នុងឱកាសនោះ សមាគមក៏បានដាក់របាយការណ៍ពិស្តារ ប្រកបដោយវិជ្ជាជីវៈ អំពីការសង្កេតការណ៍របស់ខ្លួនចាប់ផ្តើមពីថ្ងៃទី៨ ខែមិថុនា ដល់ថ្ងៃទី១៥ ខែសីហា ឆ្នាំ២០១៨ ជូន គ.ជ.ប ផងដែរ។ ទន្ទឹមនឹងនេះ គ្រឹះស្ថានឧត្តមសិក្សាកម្ពុជា បានផ្តល់អនុសាសន៍មួយចំនួនដល់ គ.ជ.ប ដូចជា ទី១- គួរបង្កើនកញ្ចប់ថវិកាជូនមន្ត្រីកម្រិតគណៈកម្មការការិយាល័យបោះឆ្នោត ដើម្បីជ្រើសបាននូវមន្ត្រី ដែលមានសមត្ថភាពបង្គួរ ដែលមានការយល់ដឹងស្រាប់ពីច្បាប់ លិខិតបទដ្ឋានគតិយុត្តិ… ទី២- គួរបណ្តុះបណ្តាលបច្ចេកទេសបោះឆ្នោតឲ្យបានស្ទាត់សមស្របល្មម ទី៣- គួរមានឯកសណ្ឋាន ដើម្បីមានភាពងាយស្រួលដល់ការបម្រើសេវា ទី៤- គួរជ្រើសរើស ឬរៀបចំការិយាល័យបោះឆ្នោតឱ្យមានបរិស្ថានល្អ និងសុវត្ថិភាព ជៀសវាងគ្រាន់តែប្រើបោះតង់ដូចមាត់ទន្លេជាដើម…។ល។ ទី៥- គួរប្តូរថ្ងៃបោះឆ្នោតពីខែកក្កដា មកខែ ដែលអំណោយផលពីកត្តាធម្មជាតិ។
ឆ្លើយតបទៅនឹងសមាគមគ្រឹះស្ថានឧត្តមសិក្សាកម្ពុជា លោក ស៊ិក ប៊ុនហុក ប្រធាន គ.ជ.ប បានកោតសរសើរដោយស្មោះចំពោះការងារសង្កេតការណ៍បោះឆ្នោត របស់សមាគមគ្រឹះស្ថានឧត្តមសិក្សាកម្ពុជា ដែលបណ្តុំដោយបណ្ឌិត បញ្ញាវ័ន្តនៅទូទាំងប្រទេស ហើយ គ.ជ.ប ទទួលយកអនុសាសន៍ទាំងនេះ ទៅពិចារណាស្វែងរកនូវភាពកែលម្អឲ្យកាន់តែប្រសើរ សម្រាប់ការបោះឆ្នោតខាងមុខ ព្រមទាំងសន្យាបន្តសហការជាមួយសមាគមនេះ។
នាឱកាសនោះផងដែរ លោកប្រធានបានបញ្ជាក់ថា “ខ្ញុំមានទិសដៅច្បាស់លាស់របស់ខ្ញុំក្នុងការរៀបចំស្ថាប័ន គ.ជ.ប ដែលជាស្ថាប័នជាតិកំពូលឲ្យទៅជាស្ថាប័នមួយ ដែលទទួលបាននូវការគោរព និងស្រលាញ់ពីគ្រប់ភាគីទាំងអស់" ។ ទី១. ត្រូវបន្តសហការជាមួយភាគីពាក់ព័ន្ធទាំងអស់ ដើម្បីធ្វើយ៉ាងណាឲ្យការបោះឆ្នោតខាងមុខកាន់តែប្រសើរឡើងថែមទៀត។ ទី២. ត្រូវបន្តធ្វើការកែទម្រង់ ទាំងការគ្រប់គ្រងស្ថាប័ន និងធនធានមនុស្ស និយាយឲ្យចំ គឺទិសដៅសម្រាប់ គ.ជ.ប ដ៏ល្អមួយ។ ទី៣. បញ្ជ្រាបលទ្ធិប្រជាធិបតេយ្យ និងការបោះឆ្នោត ចូលទៅក្នុងកម្មវិធីសិក្សា ដែលចំណុចនេះ គ.ជ.ប ធ្លាប់បានរៀបចំផ្សព្វផ្សាយអំពីលទ្ធិប្រជាធិបតេយ្យដល់គរុសិស្ស គរុនិស្សិត និងសាស្ត្រាចារ្យនៅតាមតំបន់ចំនួន៥ រាជធានី ខេត្ត រួចមកហើយ គឺខេត្តតាកែវ រាជធានីភ្នំពេញ ព្រៃវែង កំពង់ចាម និងខេត្តបាត់ដំបង ហើយដែលក្នុងមួយខេត្តៗ មានគរុសិស្ស គរុនិស្សិត និងសាស្ត្រាចារ្យចូលរួមយ៉ាងច្រើនកុះករ ដោយមានការសហការពីសមាគមគ្រឹះស្ថានឧត្តមសិក្សាកម្ពុជា។
សូមបញ្ជាក់ថា ដំណើរការបោះឆ្នោតជ្រើសតាំងតំណាងរាស្ដ្រ នីតិកាលទី៦ ឆ្នាំ២០១៨ បានប្រព្រឹត្តិទៅកាលពីថ្ងៃទី២៩ ខែកក្កដា ឆ្នាំ២០១៨ ដោយមានគណបក្សនយោបាយចំនួន២០ បានចូលរួមប្រកួតប្រជែង ចំណែកសមាគមគ្រឹះស្ថានឧត្តមសិក្សាកម្ពុជា ដែលមានគ្រឹះស្ថានសិក្សាឯកជនចំនួន១០៣ជាសមាជិក និងបានចាត់បញ្ជូនសមាជិករបស់ខ្លួនចំនួន២៥៩៥នាក់ ដែលជានិស្សិត សាស្ត្រាចារ្យ បញ្ញវ័ន្ត ចូលរួមជាអ្នកសង្កេតការណ៍បោះឆ្នោតទាំង២៥ រាជធានី-ខេត្តទូទាំងប្រទេស ជាលក្ខណៈចល័ត និងអចល័ត នៅក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦៕
Source: Kampuchea Thmey Daily
0 Comments