ក្បាលម៉ាស៊ីនក្លិបបាល់ទាត់ខេមបូឌានថាយហ្គឺរ (Cambodian Tiger FC) សមាជិកក្នុងពានរង្វាន់ជម្រើសជើងឯកជាតិ (Metfone Cambodian League 2018) បានចូលជួបជាមួយអភិបាលខេត្តសៀមរាប ម្តងទៀតកាលពីពេលថ្មីៗ ដើម្បីពង្រឹងសក្តានុពលរបស់ខ្លួននៅថ្ងៃអនាគត ខណៈក្លិបមួយនេះកំពុងយកខេត្តនេះធ្វើជាមូលដ្ឋានរបស់ខ្លួន។
នៅព្រឹកថ្ងៃព្រហស្បតិ៍ ថ្ងៃទី០៦ ខែកញ្ញា ឆ្នាំ២០១៨ សប្តាហ៍នេះក្រុមការងារក្លឹបបាល់ទាត់ អង្គរថាយហ្គឺរ បានចូលជួបសំដែងការគួរសម ជាមួយអភិបាលរងខេត្តសៀមរាប លោកទៀ សីហា និង តំណាង សហភាពសហព័ន្ធយុវជនកម្ពុជា ខេត្តសៀមរាប ស្តីអំពីការប្ដេជ្ញាជួយជ្រោមជ្រែងអភិវឌ្ឍន៍ខេត្តសៀមរាប តាមរយៈវិស័យបាល់ទាត់ ក៏ដូចជាកិច្ចការសង្គមនានាផងដែរ។
កន្លងមកថ្នាក់ដឹកនាំក្លិបនេះ ធ្លាប់បានចូលជួបជាមួយលោកបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា ពិភាក្សាពីរឿងសាងសង់ទីលានកីឡដ្ឋានខេត្តសៀមរាប ដើម្បីធ្វើជាទឹកដីក្នុងការប្រកួតនៅថ្ងៃខាងមុខ។ កីឡដ្ឋាននេះត្រូវបានក្រសួងអប់រំយុវជននិងកីឡា អនុញ្ញាតិឲ្យក្លិបខេមបូឌានថាយហ្គឺរ ប្រើប្រាស់ជាទឹកដីរបស់ខ្លួនចាប់ពីរដូវកាល២០១៧នេះតទៅ ទាំងប្រកួតលីគ ក៏ដូចជាពានរង្វាន់សម្តេចតេជោ ហ៊ុន សែន និងការប្រកួតផ្សេងៗ។
សូមបញ្ជាក់ថា លោកAkihiro Kato ក៏បានប្រកាសថា ក្លិបរបស់លោកនឹងប្តូរឈ្មោះពីខេមបូឌានថាយហ្គឺរ (Cambodian Tiger FC) ទៅជាក្លិបអង្គរថាយហ្គឺរ (Angkor Tiger FC) វិញ ចាប់ពីរដូវកាល២០១៨តទៅផងដែរ។ ការប្តូរឈ្មោះក្លិបនេះលោកអះអាងថា ព្រោះចង់ឲ្យអ្នកខេត្តសៀមរាប មានមោទនភាព និងចង់ឲ្យរាល់ការប្រកួតរបស់ខេមបូឌានថាយហ្គឺរ មានអ្នកគាំទ្រស្រលាញ់ក្លិបកាន់តែច្រើន។ លើសពីនេះទៅទៀតដោយសារពាក្យថា «អង្គរ»គឺជាពាក្យដូចតំណាងឲ្យជាតិខ្មែរអីចឹងបានន័យថា ការដូរឈ្មោះធ្វើឲ្យគេស្គាល់ខ្មែរឲ្យបានច្រើន ក៏ដូចជាស្គាល់ក្លិបឲ្យបានច្រើន ដែរ៕
Source: Kampuchea Thmey Daily
0 Comments