ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃកម្ពុជាបានបញ្ជាឲ្យឧបនាយករដ្ឋមន្ដ្រី រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ចុះពិនិត្យសកម្មភាពចាក់ដីរំលោភចូលឆ្នេរសមុទ្រនៅចំណុចឆ្នេរព្រែកត្រែង ភូមិ ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ ដើម្បីឲ្យកាយដីនោះចេញវិញភ្លាមៗ ដោយធ្វើយ៉ាងណាឲ្យឆ្នេរធម្មជាតិនេះឲ្យនៅដូចដើម។ នេះបើតាមសេចក្ដីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និង សំណង់ នៅរសៀលថ្ងៃទី១៨ ខែកញ្ញា ឆ្នាំ២០១៨។
នៅក្នុងសេចក្តីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និង សំណង់ បានបញ្ជាក់ថា « អនុវត្តតាមបទបញ្ជាដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជានៅថ្ងៃទី ១៨ ខែកញ្ញា ឆ្នាំ២០១៨ លោកជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និង សំណង់ បានអញ្ជើញចុះពិនិត្យសកម្មភាពចាក់ដីរំលោភចូលឆ្នេរសមុទ្រ នៅចំណុចឆ្នេរព្រែកត្រែង ភូមិ ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ ដើម្បីឲ្យកាយដីនោះចេញវិញ និងរក្សាឆ្នេរធម្មជាតិដូចដើម» ។
ក្រុមហ៊ុនដែលកំពុងអភិវឌ្ឍន៍នៅតំបន់ឆ្នេរព្រែកត្រែងកំពុងតែបំពានច្បាប់ស្ដីពីការគ្រប់គ្រងឆ្នេរ ដែលចេញដោយរាជរដ្ឋាភិបាលនិងគណៈកម្មការគ្រប់គ្រងឆ្នេរ ដោយអនុញ្ញាតឲ្យរាល់គម្រោងអភិវឌ្ឍន៍នៅតំបន់ឆ្នេរត្រូវមានចម្ងាយយ៉ាងហោចណាស់១០០ម៉ែត្រ ឬឆ្ងាយជាងនេះ។
លោក យន្ត មីន អភិបាលខេត្តព្រះសីហនុ អះអាងថា ក្រុមហ៊ុនដែលបានចាក់ដីលុបឆ្នេរព្រែកត្រែង រហូតធ្វើឲ្យផ្ទុះការរិះគន់ពីប្រជាពលរដ្ឋនេះ មិនមែនជាក្រុមហ៊ុនរបស់ចិននោះទេ ពោលគឺក្រុមហ៊ុនអភិវឌ្ឍន៍របស់ខ្មែរ ដែលត្រូវបានគេដឹងថា គឺជាអ្នករកស៊ីដ៏ល្បីល្បាញម្នាក់នៅកម្ពុជាកាលទសវត្សរ៍៩០។ ក្រោយមកទៀតបានវិនិយោគទិញយកបឹងកក់ មុខជំនួញទាំងពីររបស់គាត់ទទួលបានលទ្ធផលជាវិជ្ជមាន ហើយលើកនេះចាប់ផ្តើមចាក់ដីលប់សមុទ្រម្តង។
រមណីយដ្ឋានឆ្នេរព្រែកត្រែងដ៏ស្រស់ត្រកាល ស្ថិតនៅចម្ងាយ ១០ គីឡូម៉ែត្រពីក្រុងព្រះសីហនុ ក្នុងឃុំអូរត្រេះ ស្រុកស្ទឹងហាវ ទឹកដីខេត្ដព្រះសីហនុ។ ភ្ញៀវទេសចរអាចធ្វើដំណើរពីក្រុងព្រះសីហនុតាមកំពង់ផែឆ្ពោះទៅផ្លូវទំនប់រលក ជាមជ្ឈមណ្ឌលកំពង់ផែគ្រឿងសមុទ្របោះដុំទៅកាន់ទីផ្សារទូទាំងប្រទេស ស្ថិតអែបតាមបណ្ដោយមាត់សមុទ្រខាងឆ្វេងដៃ និងខាងស្ដាំដៃប្រ៉បផ្លូវរថភ្លើង។
ឆ្នេរព្រែកត្រែងមានប្រវែងប្រមាណ ២ គីឡូម៉ែត្រ ហើយវាមិនត្រឹមតែមានខ្សាច់សក្បុសជាងឆ្នេរអូរឈើទាល អូរត្រេះ ឆ្នេរសុខា និងឯករាជ្យប៉ុណ្ណោះទេ វាថែមទាំងមានម្លប់ដើមស្រល់ក្រហម អមដោយសួនច្បារដែលគេទើបរៀបចំថ្មីយ៉ាងស្រស់ស្អាតមួយ។
កម្ពុជាដែលមានឆ្នេរសមុទ្រក្នុងខេត្តទាំង ៤ជាង ៤០០គីឡូម៉ែត្របានក្លាយជាសមាជិកក្លឹបឆ្នេរសមុទ្រដែលស្អាតជាងគេបំផុតលើសាកលលោកកាលពីឆ្នាំ ២០១១ ចំណោមសមាជិកមកពី ២៤ប្រទេសដែលមានឆ្នេរស្អាតសរុប ៤២ឆ្នេរ។ នោះក៏ព្រោះឆ្នេរសមុទ្រដែលស្ថិតក្នុងទិសនិរតីកម្ពុជា មានឆ្នេរខ្សាច់សក្បុស សមុទ្រខៀវស្រងាត់ និងរុក្ខជាតិបៃតង៕
Source: Kampuchea Thmey Daily
0 Comments