កែវ រំចង់ អ្នកប្រដាល់ក្លិបដំបងគ្រញូងមានរិទ្ធខេត្តបាត់ដំបង ត្រូវគេផ្គូឲ្យជួបប្រកួតជាមួយអ្នកប្រដាល់ថៃយ៉ូយ៍ដាំ ស.សួយង៉ាម នៅយប់ថ្ងៃសុក្រទី២១កញ្ញា២០១៨នេះ លើសង្វៀនបាយ័នស្ទឹងមានជ័យ។ អ្នកប្រដាល់ទាំងពីរនេះ ជួបប្រកួតក្នុងប្រភេទទម្ងន់៧៥គីឡូក្រាម។
យ៉ូយ៍ដាំ នេះ គេមិនធ្លាប់មកប្រកួតនៅស្រុកខ្មែរទេកន្លងមក ។ តែបើតាមអ្នកដឹកនាំមកប្រកួតថា អ្នកប្រដាល់ថៃរូបនេះ គេមិនធម្មតានោះឡើយ ។ យ៉ូយ៍ដាំ ជាអ្នកប្រដាល់ជើងចាស់ធ្លាប់មានឈ្មោះបោះសម្លេងដែរនៅស្រុកថៃពីមុនមក តែសម្រាប់បច្ចុប្បន្នមិនជាខ្លាំងនោះឡើយ ។ ទោះជាយ៉ាងណា អ្នកប្រដាល់ថៃរូបនេះ មកជួបកែវរំចង់ ក៏មិនជាអ្នកខ្សោយនោះឡើយ ទើបអាចផ្គូអោយជួបជាមួយកែវ រំចង់បាន ។ ប៉ុន្តែយ៉ាងណា អ្នកប្រដាល់ថៃដែលមកជួបកែវ រំចង់កន្លងមក សុទ្ធតែអះអាងថាជាជើងខ្លាំងនោះ សុទ្ធតែត្រូវកែវរំចង់ ផ្តួលយកឈ្នះបានដែរ។
កែវ រំចង់ គេមានកំនត់ត្រាប្រកួតចំនួន១៣៤លើក ក្នុងនោះឈ្នះ១១៨លើក ចាញ់១២លើក និងស្មើ៤លើក ហើយរំចង់ធ្លាប់ផ្តួលគូប្រកួតឲ្យសន្លប់បានចំនួន១៦លើក ។ ការប្រកួតចុងក្រោយនេះ រំចង់បានវាយឈ្នះអ្នកប្រដាល់ជើងខ្លាំងថៃ ឆាល៉ឺមដេត ដោយពិន្ទុកាលពីថ្ងៃទី០២កញ្ញា២០១៨ កន្លងទៅថ្មីៗនេះ ។ កែវ រំចង់ គេខ្លាំងកណ្តាប់ដៃ និងវាយសម្រុកលឿន រហ័ស ដែលដៃគូពិបាកនឹងទប់ទល់ណាស់ ។ ដូច្នេះចាំមើល តើនរណាឈ្នះនៅក្នុងការជួបគ្នារវាង កែវ រំចង់ និង យ៉ូយ៍ដាំ ស.សួយង៉ាម នេះ ? ។
ចំពោះ អ៊ូច ធារិទ្ធ អ្នកប្រដាល់ជើងខ្លាំងស្រករក្រោយរបស់កម្ពុជាក្នុងក្លិបអាណាចក្រគុនខ្មែរ នឹងត្រូវជួបប្រកួតជាមួយអ្នកប្រដាល់ថៃឈ្មោះឌីខេន ឆ.ឆែមពាន្ត ដោយប្រកួតគ្នាក្នុងប្រភេទទម្ងន់៥៧ គីឡូក្រាម ។
អ្នកប្រដាល់ថៃរូបនេះ មិនធា្លប់មកប្រកួតនៅកម្ពុជាទេកន្លងមក ។ ឌីខេន ឆ.ឆែមពាន្ត ជាអ្នកប្រដាល់ចំណូលថ្មីក៏ដោយ ក៏គេម្នាក់នេះមិនធម្មតាដែរ ព្រោះអ្នកប្រដាល់ថៃរូបនេះ វាយចេញរហ័ស ហើយរឹងមាំថែមទៀត មិនងាយនឹងផ្តួលនោះឡើយ ។នេះបើតាមអ្នកដឹកនាំកីឡាថៃមកប្រកួតអោយដឹង។
ទោះជាយ៉ាងនេះក្តី អ៊ូច ធារិទ្ធ ដែលនឹងត្រូវទទួលស្វាគមន៍អ្នកប្រដាល់ថៃរូបនេះ គេមិនមានការព្រួយបារម្ភឬក៏ភ័យខ្លាចចំពោះឌីខេន ឆ.ឆែមពាន្ត នោះដែរ ទោះបីជាគេដឹងថាអ្នកប្រដាល់ថៃនេះ វាយខ្លាំងក៏ដោយ។
អ៊ូច ធារិទ្ធ ជាលើកទី ៩ របស់គេហើយ ដែលបានជួបប្រកួតជាមួយអ្នកប្រដាល់ថៃ-ឡាវនោះ ។ ក្នុងចំណោម៨លើកកន្លងមក ធារិទ្ធ បានវាយឈ្នះថៃ៤លើក ចាញ់៣លើកនិងស្មើ១លើក ។ សម្រាប់ការប៉ះជាមួយ ឌីខេន ឆ.ឆែមពាន្តលើកនេះ មិនដឹងថា អ៊ូចធារិទ្ធ អាចយកឈ្នះ បានឬអត់នោះទេ ? តែតាមក្រុមអ្នកតាមដានប្រដាល់ ដែលពួកគេស្គាល់ពីថ្វីដៃរបស់ធារិទ្ធនោះ ពួកគេអះអាងថា អ៊ូច ធារិទ្ធ ប្រហែលជាមិនចាញ់នោះទេ ព្រោះអ្នកប្រដាល់កម្ពុជារូបនេះ វាយស៊ូណាស់ មិនងាយចុះចាញ់គូប្រកួតងាយៗនោះឡើយ ។
ធារិទ្ធ មានកំនត់ត្រាប្រកួតចំនួន៦៦លើក ឈ្នះ៤៩លើក ចាញ់១៦លើក និងស្មើ០១លើក ហើយធ្លាប់ផ្តួលគូប្រកួតអោយសន្លប់ច្រើនរាប់មិនអស់ ។ ចាំមើល អ៊ូច ធារិទ្ធ អាចផ្តួលអ្នកប្រដាល់ថៃរូបនេះ បានឬអត់នៅក្នុងការជួបគ្នានេះ ? ។
ចំពោះការប្រកួតរវាងអ្នកប្រដាល់ខ្មែរនិងខ្មែរវិញ គិន សំបូរ អ្នកប្រដាល់ក្លិបថ្មគោលពោធិសែនជ័យ នឹងជួបប្រកួតជាមួយ យ៉ាម ខេមរា អ្នកប្រដាល់ក្លិបរស្មីកុមារកំព្រា ដោយប្រកួតក្នុងទម្ងន់៦៧ គីឡូក្រាម ។រីឯ វិន ដេវីតអ្នកប្រដាល់ក្លិបនាគរាជចតុមុខ ត្រូវជួបប្រកួតជាមួយនួន ម៉ារ៉ាឌី អ្នកប្រដាល់ក្លិបភីរម្យគុនខ្មែរ ដោយប្រកួតក្នុងទម្ងន់៥១គីឡូក្រាម៕
Source: Kampuchea Thmey Daily
0 Comments