ភ្នំពេញ ៖ បើគេចាំមិនភ្លេចទេពាក្យចាស់លោកតំណាលថា «គ្មានរោគអ្វីស្មើនឹងរោគឃ្លាន គ្មានទានអ្វីស្មើនឹងទានទេសនា គ្មានអ្វីស្មើនឹងបញ្ញាជ្រះថ្លា ហើយក៏គ្មានអ្វីស្មើចិត្តជាបុណ្យ»។ ជាក់ស្តែងនាល្ងាចថ្ងៃទី១៧ កញ្ញាម្សិលមិញនេះ លោកឧបាសិកា ជា ឃុនពេជ្រ ស្ថិតក្នុងវ័យចាស់ជរា ព្រះជន្មជាង៨០វស្សា សុខភាពទន់ខ្សោយ ពុំអាចដើរទៅណាឆ្ងាយរួច បានសំណូមពរឲ្យកូនប្រុស ឈ្មោះ លឹម យូ ជូនមកកាន់ទីបញ្ជាការដ្ឋានកងរាជអាវុធហត្ថរាជធានីភ្នំពេញដើម្បីជួបជាមួយលោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេសនិងជាមេបញ្ជាការ កងរាជអាវុធហត្ថរាជធានីភ្នំពេញ។ ដោយសារតែក្តីមេត្តាចិត្តបុណ្យនេះហើយ លោកឧត្តមសេនីយ៍ឯករ័ត្ន ស្រ៊ាង ក៏នាំយកនូវអំណោយជាលើកទី៣មានអង្ករ៨០ការុង មី១០កេសធំ ទឹកស៊ីអ៊ីវ៦០យួរ មកចម្លងតាមរយៈលោកឧត្តមសេនីយ៍ឯក រ័ត្ន ស្រ៊ាង ផ្ញើជូនទៅកាន់ គ្រួសារទីទាល់ក្រនិងចាស់ជរាទុរគតតាមការជាក់ស្តែង។
មន្ត្រីអាវុធហត្ថរាជធានីបានអោយដឹងថា រយៈកាលកន្លងមករាល់ខែ ឧបាសិកាតែងឃើញព័ត៌មានស្តីពីការជួយផ្តល់អំណោយរបស់លោក ឧត្តមសេនីយ៍ឯក រ័ត្ន ស្រ៊ាង ជូនដល់គ្រួសារទីទាល់ក្រនិងចាស់ជរាទុរគត ជិតម្ភៃគ្រួសារមិនដែលមានខាន ទាំងនៅខេត្តបន្ទាយមានជ័យ ទាំងនៅរាជធានីភ្នំពេញ។
ដូច្នោះហើយទើប ឧបាសិកា ជា ឃុនពេជ្រ សម្រេចចិត្តផ្ញើទានចម្លងបុណ្យ តាមរយៈលោកឧត្តមសេនីយ៍ឯក រ័ត្ន ស្រ៊ាង ជាហូរហែសរុប ៣លើកមកហើយ តែកន្លងមកឧបាសិកាបានត្រឹមតែឃើញលោកឧត្តមសេនីយ៍ រ័ត្ន ស្រ៊ាង តាមព័ត៌មានប៉ុណ្ណោះទើបតែមកដល់ថ្ងៃនេះដែលឧបាសិកា បានជួបលោកឧត្តមសេនីយ៍ដោយផ្ទាល់ជាលើកទី១ ឧបាសិកាពិតជាមានចិត្តត្រេកអរជាខ្លាំងព្រោះតែសម្រេចតាមបំណងដែលប៉ងជួបលោក រ័ត្ន ស្រ៊ាង ផ្ទាល់ និងបានប្រគល់អំណោយដោយផ្ទាល់ជូនសម្រាប់ធ្វើជាទានចែកជូនដល់អ្នកក្រខ្សត់ជាបន្ត។
ជាមួយគ្នាស្របទៅនឹងពាក្យចាស់លោកពោលថា " រោគអ្វីមិនស្មើនឹងរោគឃ្លាន ទានអ្វីមិនស្មើទានទេសនា មានអ្វីមិនស្មើមានបញ្ញា ថ្លាអ្វីមិនស្មើចិត្តជាបុណ្យ។ ជីវិតរាល់រូបតិចតួចណាស់ យើងត្រូវខ្នែងខ្នះប្រព្រឹត្តល្អ ទោះមិនបានរៀនចេះសូត្រធម៌ ត្រឹមប្រព្រឹត្តល្អគឺបុណ្យហើយ "។ រយៈកាលកន្លងមក លោក ឧត្តមសេនីយ៍ឯក រ័ត្ន ស្រ៊ាង តែងជួយឧបត្ថម្ភគ្រួសារទីទាល់ក្រនិងចាស់ជរាទុរគតជាប្រចាំ រៀងរាល់ខែមិនដែលមានខាន ចំនួន១៨គ្រួសារអស់រយៈពេលជាច្រើនឆ្នាំមកហើយទាំងនៅខេត្តបន្ទាយមានជ័យនិងនៅរាជធានីភ្នំពេញ៕
Source: Kampuchea Thmey Daily
0 Comments