ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃកម្ពុជាបានអំពាវនាវ ដល់ជនរួមជាតិទាំងអស់បន្តចូលរួមជាមួយរាជរដ្ឋាភិបាលក្នុងការលើកស្ទួយសន្តិភាពជាតិនិងអន្តរជាតិដោយបន្តថែរក្សាសន្តិភាពដែលមានស្រាប់ ពង្រឹងឯកភាពជាតិ អនុវត្តវប្បធម៌សន្ទនា គោរពច្បាប់ ដោះស្រាយបញ្ហាដោយសន្តិវិធី និងចូលរួមជាមួយរាជរដ្ឋាភិបាលក្នុងការទប់ស្កាត់រាល់ឧបាយកល និងការប៉ុនប៉ងតាមគ្រប់រូបភាព ដែលមានគោលបំណងធ្វើឲ្យប្រទេសជាតិធ្លាក់ទៅក្នុងសភាពវឹកវរនិងអស្ថិរភាព។ ការអំពាវនាវរបស់ប្រមុខរាជរដ្ឋាភិបាលត្រូវបានធ្វើឡើងនៅក្នុងសារលិខិតអបអរទិវាសន្ដិភាពអន្ដរជាតិថ្ងៃទី២១ខែកញ្ញា ឆ្នាំ២០១៨ ។
សារលិខិតផ្ញើជូនជនរួមជាតិប្រមុខរាជរដ្ឋាភិបាលកម្ពុជាបានធ្វើការកត់សំគាល់ថា សភាពការណ៍ជុំវិញពិភពលោកនាពេលបច្ចុប្បន្នពុំបានធ្វើឲ្យយើងមានសុទិដ្ឋិនិយមចំពោះការសំរេចបាននៅសន្តិភាពសម្រាប់មនុស្សសត្វជាតិនោះទេ។ ការគំរាមកំហែងចំពោះសន្តិភាពនៅតែមានភាពស្រួចស្រាវទាំងក្នុងកម្រិតសកលនិងតំបន់ ។ ដោយឡែកចំពោះបរិបទនៃប្រទេសកម្ពុជា ទោះបីជាយើងទទួលបានសុខសន្តិភាពពេញបរិបូរណ៍ ក្រោយការអនុវត្តនយោបាយឈ្នះឈ្នះកាលពីឆ្នាំ ១៩៩៨ ហើយក្តីក៏សន្តិភាពរបស់កម្ពុជានៅតែមានលក្ខណៈផុយស្រួយដោយសារតែការបន្តយាយីនិងអន្តរាគមន៍ចូលកិច្ចការផ្ទៃក្នុងកម្ពុជាឥតឈប់ឈរពីមជ្ឈដ្ឋានខាងក្រៅ។
សម្តេចតេជោ ហ៊ុន សែន បានបន្តថា “ទោះជាមានសម្ពាធនិងការគំរាមកំហែងដាក់ទណ្ឌកម្មក្រោមលេសលទ្ធិប្រជាធិបតេយ្យនិងសិទ្ធិមនុស្សយ៉ាងណាក្តីប្រជាជននិងរាជរដ្ឋាភិបាលកម្ពុជានៅតែប្រកាន់ខ្ជាប់នូវឆន្ទៈមុតមាំក្នុងការរក្សាសន្តិភាព និងស្ថេរភាព ឲ្យខានតែបានទោះក្នុងតម្លៃណាក៏ដោយ ។ យើងធ្លាប់ហែលឆ្លងរួចហើយនូវទុក្ខលំបាកវេទនាក្នុងភ្លើងសង្គ្រាមជាងបីទសវត្សរ៍ ហើយយើងក៏ធ្លាប់ហែលឆ្លងការលំបាកដោយការដាក់ទណ្ឌកម្មសេដ្ឋកិច្ច និងការមិនទទួលស្គាល់ពីប្រទេសមួយចំនួនចំពោះរដ្ឋាភិបាលដែលកើតចេញពីឆន្ទៈប្រជាជនដែលបានរំដោះអាយុជីវិតប្រជាជនខ្មែរចេញពីរបបប្រល័យពូជសាសន៍ប៉ុលពតនៅថ្ងៃទី៧ ខែមករា ១៩៧៩” ។
សម្តេចតេជោបន្តថា បទពិសោធដ៏ជូរចត់ទាំងអស់នេះហើយ ដែលជាមូលដ្ឋានគ្រឹះដ៏រឹងមាំនៃការសម្រេចចិត្តឥតងាករេរបស់ប្រជាជនខ្មែរទូទាំងប្រទេស ក្នុងការជ្រើសយកសន្តិភាព ស្ថេរភាព និងការអភិវឌ្ឍដូចដែលបានស្ដែងចេញតាមរយៈលទ្ធផលនៃការបោះឆ្នោតជ្រើសរើសតំណាងរាស្ត្រដែលបានប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ កន្លងទៅនេះ ។ ការបោះឆ្នោតនេះបានប្រព្រឹត្តទៅដោយសេរីនិងយុត្តិធម៌គ្មានអំពើហិង្សាគ្មានការគំរាមកំហែងនិងមានការចូលរួមពីសំណាក់គ្រប់ភាគីពាក់ព័ន្ធពិសេសគឺមានការចូលរួមពីសំណាក់ប្រជាពលរដ្ឋដ៏ច្រើនកុះកររហូតដល់ទៅ ៨៣,០២ ភាគរយនៃពលរដ្ឋបានចុះឈ្មោះបោះឆ្នោត។លទ្ធផលនេះគឺជាការឆ្លុះបញ្ចាំងឱ្យឃើញនូវឆន្ទៈគាំទ្រយ៉ាងពេញទំហឹងពីសំណាក់ប្រជាពលរដ្ឋភាគច្រើនលើសលប់និងពីគ្រប់មជ្ឈដ្ឋានលើកិច្ចដំណើរការប្រជាធិបតេយ្យដ៏ត្រឹមត្រូវនិងទៀងទាត់នៅក្នុងប្រទេសកម្ពុជាក៏ដូចជាពិភពលោកចាំបាច់ក្នុងការបន្តកិច្ចដឹកនាំកសាងប្រទេសនៅលើមាគ៌ានៃសុខសន្តិភាព ការអភិវឌ្ឍនិងការកែទម្រង់រដ្ឋក្នុងគ្រប់វិស័យស្ទុះទៅរកវឌ្ឍនភាពនិងវិបុលភាពដ៏កាន់តែរុងរឿង ។
សម្តេចតេជោនាយករដ្ឋមន្ត្រីបានមានប្រសាសន៍ថា « គ្មានសន្តិភាពគឺគ្មានការអភិវឌ្ឍ ។ ហើយគ្មានការវិវត្តក៏គ្មានសន្តិភាពស្ថិតស្ថេរដែរ ។ នេះគឺជាគោលការណ៍សត្យានុម័តដែលពិភពលោកទាំងមូល បានទទួលស្គាល់នឹងកំពុងអនុវត្តយ៉ាងយកចិត្តទុកដាក់ » ។
រាជរដ្ឋាភិបាលអាណត្តិទី ៦ យើងនឹងនៅតែបន្តកសាង និង អភិវឌ្ឍន៍ដោយផ្អែកលើសមិទ្ធផលគួរជាទីមោទនៈកន្លងមកដោយបន្តអនុវត្តកម្មវិធីកំណែទម្រង់សំខាន់ៗក្នុងគោលដៅបម្រើនូវឧត្តមប្រយោជន៍របស់ជាតិ ឆ្លើយតបទៅនិងសំណូមពរនឹងសេចក្តីត្រូវការរបស់ប្រជាជន ។ រាជរដ្ឋាភិបាលនឹងអនុវត្តឲ្យបានខ្ជាប់ខ្ជួននូវយុទ្ធសាស្ត្រចតុកោណដំណាក់កាលទី ៤ ដើម្បីកំណើនការងារសមធម៌និងប្រសិទ្ធិភាព កសាងមូលដ្ឋានឆ្ពោះទៅចក្ខុវិស័យកម្ពុជាឆ្នាំ ២០៥០ ។ ក្នុងយុទ្ធសាស្ត្រចតុកោណនេះវាមិនមែនជារឿងចៃដន្យទេដែលសន្តិភាព នៅតែជាអាទិភាព សំខានទី១ ក្នុងចំណោមអាទិភាពបួនរបស់រាជរដ្ឋាភិបាល ។ បើក្រឡេកមើលលើឆាកអន្តរជាតិវិញយើងបានប្រែក្លាយបទពិសោធន៍ដ៏ល្វីងជូរចត់នៃសង្គ្រាមរបស់យើងឲ្យទៅជាការចូលរួមចំណែកយ៉ាងសកម្មក្នុងបុព្វហេតុសន្តិភាពពិភពលោក ។ យើងមានមោទនភាពក្រៃលែងចំពោះការរួមចំណែករបស់កងកម្លាំងរបស់យើងក្នុងបេសកកម្មរក្សាសន្តិភាព របស់អង្គការសហប្រជាជាតិតាមរយៈការបញ្ជូនកងទ័ពចំនួន ៥.៥៧១ នាក់ ចាប់ពីឆ្នាំ ២០០៦ មកទល់បច្ចុប្បន្នទៅប្រទេសស៊ូដង់ ស៊ូដង់ខាងត្បូង លីបង់ អាហ្វ្រិកកណ្ដាល ឆាដ ស៊ីរី ម៉ាលី និង ស៊ីព្រ៍ ។ បេសកកម្មទាំងនេះ ជាបេសកកម្មប្រកបដោយហានិភ័យនឹងគ្រោះថ្នាក់ ។ ពួកយើងបានពលីជីវិតក្នុងពេលបំពេញបេសកកម្មក្រោមឆ័ត្រអង្គការសហប្រជាជាតិ ។ ប៉ុន្តែគ្រោះថ្នាក់ទាំងនោះពុំបានបំបាក់ឆន្ទៈបន្តរឿងចំណែករបស់កម្ពុជាក្នុងការជួយសង្គ្រោះប្រទេសដទៃអោយទទួលបានសន្តិភាពនិងបានចាកផុតពីទុក្ខវេទនានៃសង្គ្រាមបំផ្លិចបំផ្លាញឡើយ។
តាមរយៈស្នាដៃនិងការរួមចំណែកទាំងអស់នេះហើយដែលធ្វើឲ្យសហគមន៍អន្តរជាតិផ្ដល់ទំនុកចិត្តឲ្យកម្ពុជាកាន់តួនាទីសំខាន់ ២ នៅក្នុងប្រព័ន្ធអង្គការសហប្រជាជាតិ។ ទី១.គឺឋានៈជាអនុប្រធានមហាសន្និបាតអង្គការសហប្រជាជាតិសំរាប់ឆ្នាំ ២០១៨ -២០១៩ និង ទី២.គឺឋាន:ជាសមាជិកក្រុមប្រឹក្សាសេដ្ឋកិច្ចនិងសង្គមអង្គការសហប្រជាជាតិសម្រាប់អាណត្តិឆ្នាំ២០១៩ ។ តួនាទីទាំងនេះនឹងផ្ដល់លទ្ធភាពកាន់តែច្រើនដល់កម្ពុជាក្នុងការចូលរួមចំណែកដោយបុព្វហេតុនៃការរក្សាសន្តិភាពនិងការជំនាញការអភិវឌ្ឍប្រកបដោយចីរភាពនៅលើពិភពលោក។
ទិវាសន្ដិភាពអន្ដរជាតិ ថ្ងៃទី២១ ខែកញ្ញា ឆ្នាំ២០១៨ ដែលត្រូវបានប្រារព្ធទូទាំងពិភពលោកជារៀងរាល់ឆ្នាំបន្ទាប់ពីមានការអនុម័តដោយមហាសន្និបាតអង្គការសហប្រជាជាតិលើកទី៥៥នាឆ្នាំ២០០១ ដើម្បីលុបបំបាត់អំពើហិង្សា បញ្ឈប់សង្គ្រាម ជំរុញឲ្យមានសុខសន្ដិភាព ក្នុងប្រទេសក្នុងតំបន់ ក៏ដូចជាក្នុងពិភពលោកទាំងមូល៕
Source: Kampuchea Thmey Daily
0 Comments