ភ្នំពេញ ៖ បុរសជនជាតិឡាវម្នាក់និងខ្មែរម្នាក់ ត្រូវបានមន្ទីរប្រឆាំងគ្រឿងញៀនក្រសួងមហាផ្ទៃ ឆ្មក់ចាប់ខ្លួនកាលពីយប់ថ្ងៃទី២០ កញ្ញា នៅចំណុចលើផ្លូវលេខ៧០ សង្កាត់ទួលសង្កែ ខណ្ឌឫស្សីកែវ ខណៈពួកគេបាន និង កំពុងដឹកជញ្ជូនថ្នាំញៀនជាង២គីឡូក្រាម ឆ្លងកាត់ពីរបណ្តាលខេត្ត ចូលមកជួញដូរនៅក្នុងរាជធានីភ្នំពេញ។
ជនសង្ស័យម្នាក់ឈ្មោះ ឡោ សុគន្ធា ភេទប្រុស អាយុ៤០ឆ្នាំ ជនជាតិខ្មែរ មានទីលំនៅភូមិសំអាង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង និង ម្នាក់ទៀតឈ្មោះ ស៊ីងធីន អ៊ូថង ភេទប្រុស អាយុ២៨ឆ្នាំ ជនជាតិឡាវ មានទីលំនៅ ទីក្រុងវៀងច័ន្ទ ប្រទេសឡាវ។
សេចក្តីរាយការណ៍ឲ្យដឹងទៀតថា ការឆក់ចាប់ក្រុមជួញដូរគ្រឿងញៀនមកពីប្រទេសឡាវនេះ ដឹកនាំដោយលោកវរសេនីយ៍ឯក យិន បញ្ញារិទ្ធ នាយការិយាល័យទី៩ នៃមន្ទីរប្រឆាំងគ្រឿងញៀន។
ជាមួយនឹង ការចាប់ឃាត់ខ្លួនជនសង្ស័យ២នាក់ខាងលើនេះ សមត្ថកិច្ចដកហូតថ្នាំញៀនប្រមាណជាង២គីឡូក្រាម និង ទូរស័ព្ទចំនួន២គ្រឿង។ ជនសង្ស័យត្រូវបានសមត្ថកិច្ចកំពុងសាកសួរ ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការតាមផ្លូវច្បាប់៕
Source: Kampuchea Thmey Daily
0 Comments