ភ្នំពេញ ៖ បុរសចំណាស់ម្នាក់ ខណៈដែលខ្លួនមានជំងឺប្រចាំកាយផងនោះ ខំធ្វើដំណើរតាំងពីស្រុកកំណើតឯខេត្តស្វាយរៀង មកលេងប្រពន្ធកូនដែលធ្វើការរោងចក្រនៅក្រុងភ្នំពេញ ម្យ៉ាងមករកលុយសម្រាប់ទិញថ្នាំព្យាបាលខ្លួនផង ផ្ទុយទៅវិញនៅពេលដើរចូលជិតដល់បន្ទប់ជួលប្រពន្ធកូនហើយនោះ បែរជាដួលក្អួតធ្លាក់ឈាមស្លាប់ភ្លាមៗតែម្ដង បង្កឲ្យភ្ញាក់ផ្អើលកាលពីវេលាម៉ោង២រសៀលថ្ងៃទី១៨ ខែកញ្ញា ឆ្នាំ២០១៨ ស្ថិតនៅតាមផ្លូវលំក្នុងភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ។
ជនរងគ្រោះឈ្មោះ គិត ពិ ភេទប្រុស អាយុ៥៤ឆ្នាំ មុខរបរកសិករ រស់នៅភូមិព្រៃស្រះ ឃុំសម្បត្តិមានជ័យ ស្រុករមាសហែក ខេត្តស្វាយរៀង មានប្រពន្ធឈ្មោះ សារុន ណន អាយុ ៣៧ឆ្នាំ មុខរបរ កម្មកររោងចក្រ ស្នាក់នៅបន្ទប់ជួលក្បែរកន្លែងកើតហេតុ។
តាមការរៀបរាប់ពីស្ត្រីជាប្រពន្ធបានឲ្យដឹងថា គាត់មានកូនស្រីចំនួន៤នាក់ រស់នៅឯស្រុកម្នាក់ មើលថែឪពុកកូនស្រីម្នាក់ ស្នាក់នៅធ្វើការ ជាមួយម្តាយ ផ្ទះជួល ក្នុងភូមិខាងលើ ចំណែកកូនស្រី២នាក់ទៀតទៅធ្វើពលករនៅប្រទេសថៃ។
ស្ត្រីដដែលបន្តទៀតថា ប្ដីរបស់គាត់ មានជំងឺប្រចាំកាយក្រពះរ៉ាំរ៉ៃ ដោយសារផឹកស្រាច្រើន ព្យាបាលមិនជាសះស្បើយ ហើយមុនកើតហេតុ ប្តីរបស់គាត់ បានប្រាប់គាត់ជាមុនដែរថានឹងមកលេងភ្នំពេញម្យ៉ាងមករកលុយ ទិញថ្នាំនិងទិញជីដាក់ស្រែផង ហើយខណៈដែលគាត់កំពុងធ្វើការរោងចក្រក្បែរនោះ ស្រាប់តែសាច់ញាតិទៅប្រាប់ថា ប្តីដួលស្លាប់តាមផ្លូវទៅវិញ។
តាមប្រជាពលរដ្ឋនៅកន្លែងកើតហេតុ បានឲ្យដឹងថា មុនកើតហេតុគេឃើញបុរសខាងលើដើរតាមផ្លូវដល់ចំណុចកែងផ្លូវចូលផ្ទះជួល ស្រាប់តែកើតមានអាការក្អកក្អួតធ្លាក់ឈាម ប្រកាច់ដួលស្លាប់ភ្លាមៗតែម្តង។ ក្រោយកើតហេតុ សាកសពជនរងគ្រោះត្រូវបានសមត្ថកិច្ចមូលដ្ឋាននិងសមត្ថកិច្ចជំនាញចុះទៅពិនិត្យដល់កន្លែងកើតហេតុឃើញថា ពិតជាស្លាប់ដោយសារជំងឺផ្ទាល់ខ្លួនប្រាកដមែន រួចប្រគល់ជូនក្រុមគ្រួសារចាត់ចែងដឹកយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments