ភ្នំពេញ ៖ បុរសម្នាក់ ដែលទើបត្រូវបានសមត្ថកិច្ចចាប់ដាក់ខ្នោះដៃបញ្ជូនឡើងតុលាការតាមដីកាបង្គាប់អោយចាប់ខ្លួនរបស់ចៅក្រមសាលាដំបូងរាជធានីភ្នំពេញពាក់ព័ន្ធនឹងអំពើឆបោកនិស្សិតរាប់សិបនាក់ ហើយត្រូវបានចៅក្រមសម្រេចដោះលែងវិញដោយសារព្រមសងលុយទៅដើមបណ្ដឹង ឥឡូវត្រូវបានអ្នកជិតខាងប្ដឹងមកតុលាការព្រហ្មទណ្ឌមួយករណីទៀត ពាក់ព័ន្ធនឹងការបំផ្លិចបំផ្លាញទ្រព្យសម្បត្តិដោយចេតនា និងរំលោភបំពានលើអ្នកកាន់កាប់អចលនវត្ថុដោយសុចរិត។
ជនសង្ស័យ ដែលត្រូវបានអ្នកភូមិជាប់របងគ្នាប្ដឹងនេះ ឈ្មោះ ហាក់ ចាន់នី ភេទប្រុស អាយុ៤៤ឆ្នាំ និងឈ្មោះ ហាក់ ចាន់ធា ភេទប្រុស អាយុ៤៦ឆ្នាំ មានទីលំនៅផ្ទះលេខ ៤៤៧ ផ្លូវលំភូមិបឹងសាឡាង សង្កាត់ឬស្សីកែវ ខណ្ឌឬស្សីកែវ។
ដើមបណ្ដឹងក្នុងរឿងក្ដីថ្មីនេះឈ្មោះ ឆេង សារ៉ន ភេទប្រុស អាយុ៥៨ឆ្នាំ មានទីលំនៅផ្ទះលេខ ៩៣ ផ្លូវលំ ភូមិឃ្លាំងសាំង សង្កាត់ឬស្សីកែវ ខណ្ឌឬស្សីកែវ។
តាមអង្គហេតុនៃរឿងបានបង្ហាញថា កាលពីថ្ងៃទី ២៤កុម្ភៈ ឆ្នាំ២០០៩ ឈ្មោះ ហាក់ ចាន់នី បានព្រមព្រៀងលក់ដី១ឡូត៍មានទំហំ ៨,៥០ម៉ែត គុណនឹង២៥ម៉ែត ស្ថិតក្នុងក្រុម២ ភូមិបឹងសាឡាង សង្កាត់ឬស្សីកែវ ខណ្ឌឬស្សីកែវ ដោយបានផ្ទេរកម្មសិទ្ធិទទួលស្គាល់ពីអាជ្ញាធរមូលដ្ឋានយ៉ាងត្រឹមត្រូវ។ ក្រោយពីបានទទួលសិទ្ធិកាន់កាប់ហើយលោក ឆេង សារ៉ន បានធ្វើរបងសសរ ដែកបាំងដោយលួសបន្លានិងស័ង្កសី មានទ្វារដែកចេញចូលទៀតផង ស្រាប់តែ១០ឆ្នាំក្រោយមក នៅយប់ថ្ងៃទី ០១កញ្ញា ឆ្នាំ២០១៨នេះ ឈ្មោះ ហាក់ ចាន់នី និងហាក់ ចាន់ធា ជាបងប្អូនបង្កើតបានយកម៉ាស៊ីនកាត់ដែកមកលួចកាត់យកដែករបង បន្លាលួសនិងស័ង្កសីដឹកចេញពីដីរបស់ឈ្មោះឆេង សារ៉ន ទៅអស់ ហើយថែមទាំងរៀបរបងបេតុងថ្មីបិទច្រកទ្វារចេញចូលក្នុងដីគេថែមទៀត ទើបឈ្មោះឆេង សារ៉ន បានប្ដឹងឡើងមកសាលាសង្កាត់ និងប្ដឹងមកអយ្យការអមសាលាដំបូងអោយចាត់ការជនសង្ស័យតែម្ដង។
ឥឡូវរឿងក្ដីថ្មីនេះ កំពុងស្ថិតនៅក្នុងការពិនិត្យរបស់ព្រះរាជអាជ្ញាអមតុលាការដើម្បីកំណត់ពេលកោះហៅដើមបណ្ដឹង និងជនសង្ស័យមកសាកសួរ សម្រេចតាមច្បាប់។
គួររំលឹកថា ប៉ូលិសខណ្ឌឫស្សីកែវ កាលពីថ្ងៃទី០៥ ខែកញ្ញា ឆ្នាំ២០១៨ បានចាប់ឈ្មោះ ហាក់ ចាន់នី ដាក់ខ្នោះដៃបញ្ជូនមកតុលាការតាមដីកាបង្គាប់អោយចាប់ខ្លួនរបស់ចៅក្រមថ្លាង ផាណែត ពាក់ព័ន្ធនឹងករណីឆបោកនិស្សិតរាប់សិបនាក់ក្នុងម្នាក់ៗជាង៦ ០០០ដុល្លារ ប៉ុន្តែក្រោយមកចៅក្រមបានសម្រេចដោះលែងអោយជនជាប់ចោទរូបនេះមានសេរីភាពវិញ ដោយសារតែព្រមសងប្រាក់ទៅដើមបណ្ដឹងវិញទាំងអស់៕
Source: Kampuchea Thmey Daily
0 Comments