និស្សិត ស​.​វ​.​ស​ចំនួន​៤៨ រូប​ទទួលបាន​អាហារូបករណ៍​ទៅ​បន្ត​ការសិក្សា​នៅ​ប្រទេស​បារាំង

ភ្នំពេញ ​៖ ​និស្សិត សាកលវិទ្យាល័យ​វិទ្យាសាស្ត្រ​សុខាភិបាល​(​ស​.​វ​.​ស​)​ចំនួន​៤៨ រូប​ក្នុងចំណោម​និស្សិត​សរុប​៦៩០​នាក់​នៅលើ​ពិភពលោក​ទទួលបាន​អាហារូបករណ៍​ទៅ​បន្ត​ការសិក្សា​នៅ​ប្រទេស​បារាំង។

ថ្លែង​នៅក្នុង​ពិធី​សំណេះសំណាល​ជាមួយ​និស្សិត​វេជ្ជបណ្ឌិត​ឯកទេស​ដែល​ត្រូវ​បន្ត​ការសិក្សា​នៅ​សាធារណរដ្ឋ​បារាំង​ក្នុង​ឆ្នាំ​២០១៨​ក្រោម​អធិបតីភាព​លោក​សាស្ត្រាចារ្យ ម៉ម ប៊ុនហេង រដ្ឋមន្ត្រី​ក្រសួងសុខាភិបាល និង​លោកស្រី អេ​វ៉ា ង្វៀន​ប៊ី​ញ ឯកអគ្គរដ្ឋទូត​បារាំង​ប្រចាំ​ព្រះរាជាណាចក្រ​កម្ពុជា​កាល​ពី​រសៀល​ថ្ងៃទី​២៨​ ខែកញ្ញា​ លោក​សាស្ត្រាចារ្យ សា​ផុន វឌ្ឍនៈ សាកលវិទ្យាធិការ នៃ​សាកលវិទ្យាល័យ វិទ្យាសាស្ត្រ​សុខាភិបាល បាន​សម្តែង​នូវ​អំណរគុណ​យ៉ាង​ជ្រាលជ្រៅ ចំពោះ​លោក​សាស្ត្រាចារ្យ​រដ្ឋមន្ត្រីក្រសួង​សុខាភិបាល ស្ថានទូត​បារាំង​ប្រចាំ​ព្រះរាជាណាចក្រ កម្ពុជា ដៃគូ​អភិវឌ្ឍ​នានា និង​ជាពិសេស លោក​សាស្ត្រាចារ្យ Claude Dumergier និង លោក​សាស្ត្រាចារ្យ Jacques Baulieux ដែល​បាន​ជួយ​គាំទ្រ និង​កិច្ចសហប្រតិបត្តិការ​ជាមួយនឹង​សាកលវិទ្យាល័យ​វិទ្យាសាស្ត្រ​សុខាភិបាល​។​

លោកជំទាវ អេ​វ៉ា ង្វៀន​ប៊ី​ញ ឯកអគ្គរដ្ឋទូត​បារាំង​ប្រចាំ​ព្រះរាជាណាចក្រ​កម្ពុជា បាន​មាន​ប្រសាសន៍​ថា ប្រទេស​បារាំង​បាន​នឹង​កំពុង​ផ្តល់​ការ​គាំទ្រ​ដល់​កិច្ច​សហប្រតិបត្តិការ​ផ្នែក​វិទ្យាសាស្ត្រ និង​ការ​បណ្តុះបណ្តាល​នៅ​សាកលវិទ្យាល័យ​វិទ្យាសាស្ត្រ​សុខាភិបាល តាមរយៈ​ការ​ផ្តល់​អាហារូបករណ៍​ដល់​និស្សិត បេសកកម្ម​របស់​អ្នកជំនាញការ​បារាំង​ជួយ​ដល់​កម្មវិធី​បណ្តុះបណ្តាល​អន្តរជាតិ និង​ផ្តល់​អ្នកជំនាញការ​បច្ចេកទេស អ្នកស្ម័គ្រចិត្ត​អន្តរជាតិ​មក​ជួយ​ដល់​សាកលវិទ្យាល័យ​វិទ្យាសាស្ត្រ​សុខាភិបាល។

ស្ថានទូត​បារាំង បានរៀបចំ​សិក្ខាសាលា​តម្រង់ទិស នា​ថ្ងៃទី ២០ ខែកញ្ញា ឆ្នាំ​២០១៨ សម្រាប់​និស្សិត​សាកលវិទ្យាល័យ​វិទ្យាសាស្ត្រ​សុខាភិបាល ដែល​នឹង​ទៅ​បន្ត​ការសិក្សា​នៅ​ប្រទេស​បារាំង និង​កំពុង​ជួយ​សម្រួល​ដល់​បែប​ទិដ្ឋាការ​របស់​និស្សិត​ទាំងនោះ។ នៅពេល​ត្រ​ឡប់​មក​ព្រះរាជាណាចក្រ​កម្ពុជា​វិញ និស្សិត​នឹង​ក្លាយជា​សមាជិក​សមាគមន៍​អតីត​និស្សិត​ដែល​បាន​បន្ត​ការសិក្សា​នៅ​ប្រទេស​បារាំង​។ បន្ថែម​ពី​នោះ ស្ថានទូត​បារាំង​នឹង​គាំទ្រ​ដល់​ការដាក់ឱ្យ​ដំណើរការ Espace France នៅ​សាកលវិទ្យាល័យ​វិទ្យាសាស្ត្រ​សុខាភិបាល​។​
​
លោកស្រី​ឯកអគ្គរដ្ឋទូត​បារាំង​ប្រចាំ​នៅ​កម្ពុជា​បាន​កោតសរសើរ​ដល់​និស្សិត​ជ័យលាភី​ទាំងអស់​ដែល​ត្រូវបាន​ជ្រើសរើស ពីព្រោះ​ទាំង​ការសិក្សា​ផ្នែក​វេជ្ជសាស្ត្រ ទាំង​ភាសា​បារាំង​សុទ្ធ​។ និស្សិត​ទាំង​៤៨​រូបនេះ ត្រូវបាន​ជ្រើសរើស​ក្នុងចំណោម​និស្សិត​សរុប​៦៩០​នាក់​នៅលើ​ពិភពលោក​ឱ្យទៅ​បន្ត​ការសិក្សា​នៅ​ប្រទេស​បារាំង​នា​ឆ្នាំនេះ។

លោក​សាស្ត្រាចារ្យ ម៉ម ប៊ុនហេង រដ្ឋមន្ត្រី​ក្រសួងសុខាភិបាល បាន​ថ្លែងអំណរគុណ​ដ៏​ជ្រាលជ្រៅ​ចំពោះ​រដ្ឋាភិបាល​បារាំង ដែល​បាន​នឹង​កំពុង​បន្ត​គាំទ្រ​ដល់​ការអភិវឌ្ឍ​វិស័យ​សុខាភិបាល ជាពិសេស​គឺ​ការ​បណ្តុះបណ្តាល​នៅ​សាកលវិទ្យាល័យ​វិទ្យាសាស្ត្រ​សុខាភិបាល។

លោក​សាស្ត្រាចារ្យ បាន​បញ្ជាក់ថា សក្ខីភាព​នៃ​កិច្ចសហប្រតិបត្តិការ​ប្រកប​ដោយ​ផ្លែផ្កា​រវាង​សាកលវិទ្យាល័យ​វិទ្យាសាស្ត្រ សុខាភិបាល និង​ភាគី​បារាំង​ដែល​ចូលរួម​ចំណែក​ក្នុង​ការ​អភិវឌ្ឍន៍​ធនធានមនុស្ស និង​បង្កើន​គុណភាព​នៃ​ការអប់រំ​ក្នុង វិស័យ​សុខាភិបាល និង​បញ្ជាក់​អំពី​ជោគជ័យ​មួយ​ក្នុង​ការកសាង​សមត្ថភាព និង​ជំនាញ​ឯកទេស​ក្នុង​វិស័យ​សុខាភិបាល នៅ​សាកលវិទ្យាល័យ​វិទ្យាសាស្ត្រ​សុខាភិបាល ដែលជា​ចំណែក​យ៉ាងសំខាន់​ក្នុងការ​អនុវត្ត​គោលនយោបាយ​របស់​រាជ​រដ្ឋាភិបាល​កម្ពុជា។

ជាមួយ​គ្នា​នេះដែរ​ លោក​សាស្ត្រាចារ្យ បាន​កោតសរសើរ​ចំពោះ​និស្សិត​ជ័យលាភី​អាហារូបករណ៍​ទាំងអស់ និង​ណែនាំ​ដល់​ជ័យលាភី​ទាំងអស់ សូម​បន្ត​ខិតខំ​ប្រឹងប្រែង​រៀនសូត្រ​ឲ្យ​បាន​ចប់​ជា​ស្ថាពរ និង​ទទួលយក​នូវ​ចំណេះដឹង និង​បទពិសោធន៍​ថ្មីៗ​ទាក់ទង​នឹង​ឯកទេស​របស់​ខ្លួន នៅពេល​ទៅ​សិក្សា​នៅ​ប្រទេស​បារាំង ដើម្បី​ចូលរួម​ចំណែក​ក្នុង​ការ​អភិវឌ្ឍ វិស័យ​សុខាភិបាល នៅពេល​វិលត្រឡប់​មកកាន់​មាតុប្រទេស​យើង​វិញ។

នៅក្នុង​ឱកាស​នោះ​លោក​រដ្ឋមន្ត្រី​ក្រសួងសុខាភិបាល បាន​ជំរុញ និង​លើក​ទឹកចិត្ដ​ដល់​និស្សិត​វេជ្ជបណ្ឌិត​ឯកទេស​នៃ​សាកលវិទ្យាល័យ​វិទ្យាសាស្ត្រ​សុខាភិបាល (​ស​.​វ​.​ស​) ទទួល​បាន​អាហារូបករណ៍ ទៅ​បន្ដ​ការសិក្សា​នៅ​សាធារណរដ្ឋ​បារាំង ក្នុង​ឆ្នាំ​២០១៨​នេះ ត្រូវ​ប្រឹងប្រែង​ក្រេប​យកចំណេះ​ដឹង និង​បទពិសោធន៍​ថ្មីៗ​ពី​បារាំង យក​មក​ចូលរួម​ចំណែក​ក្នុង​ការ​អភិឌ្ឍ​​វិស័យ​សុខាភិបាល​នៅ​មាតុប្រទេស។

ទន្ទឹមនឹងនេះ​លោក​សាស្ត្រាចារ្យ ម៉ម ប៊ុនហេង ក៏បាន​រំលឹក​ដល់​និស្សិត​ទៅ​សិក្សា​នៅ​បារាំង ត្រូវ​ចេះ​ផ្សព្វផ្សាយ អំពី​វប្បធម៌ នយោបាយ ការ​វិវឌ្ឍន៍​វិស័យ​សុខាភិបាល​របស់​កម្ពុជា​ដល់​បណ្ដា​ប្រទេស​ដែល​នៅ​ទីនោះ​។​

គួរ​បញ្ជាក់ថា ក្នុង​ឆ្នាំ​២០១៨​នេះ និស្សិត​ស​.​វ​.​ស ចំនួន ៤៥ នាក់ (​ស្រី ១៨ នាក់​) បានទទួល​អាហារូបករណ៍​បន្ត​ការសិក្សា​លើ​ឯកទេស​ចំនួន ២០​ផ្សេងៗ​គ្នា នៅ​ប្រទេស​បារាំង (៣៨ នាក់ ក្នុង​កម្មវិធី DFMS -Diplôme de Formation Médicale Spécialisée និង​០៧ នាក់ ក្នុង​កម្មវិធី DFMSA-Diplôme de Formation Médicale Spécialisée Approfondie) និង​អតីត​និស្សិត​ស​.​វ​.​ស ចំនួន ០៣​នាក់ (​ស្រី ០០ នាក់​) ធ្វើ​កម្មសិក្សា (Stagiaires associés) នៅ​ប្រទេស​បារាំង​ផងដែរ​៕

​

Source: Kampuchea Thmey Daily