មេដឹកនាំ​ប៉ាស៊ីហ្វិក​ធ្វើ​កិច្ចព្រមព្រៀង​លើ​អាកាសធាតុ​ និង​បញ្ហា​សន្តិសុខ​កាន់តែ​ច្រើន

បណ្ដា​មេដឹកនាំ​តំបន់​ប៉ាស៊ីហ្វិក​ដែល ​បាន​ជួប​ប្រជុំ​គ្នា​នៅ​កោះ Nauru ត្រូវ​បាន​គេ​រំពឹង​ថា ​នឹង​ចុះហត្ថលេខា​លើ​កិច្ចព្រមព្រៀង​សន្តិសុខ​មួយ​ដែល​ដោះស្រាយ​ការផ្លាស់ប្តូរ​អាកាសធាតុ​និង​ឧក្រិដ្ឋកម្ម​នានា​ដូចជា​ការរត់ពន្ធ​គ្រឿងញៀន​និង​ការនេសាទ​ខុសច្បាប់​ឆ្លងកាត់​ព្រំដែន​ជាដើម​។​

មេដឹកនាំ​នៅ​វេទិកា​កោះ​ប៉ាស៊ីហ្វិក​បាន​និយាយថា ពួកគេ​បានចាត់ទុក​ការប្រែប្រួល​អាកាសធាតុ​ថា​ជាការ​គំរាមកំហែង​ផ្នែក​សន្តិសុខ​ដ៏​ធំ​បំផុត​របស់​ប្រទេស​របស់​ពួកគេ​ចាប់តាំងពី​កោះ​ទាបៗ​នៅ​មហាសមុទ្រ​ប៉ាស៊ីហ្វិក​ត្រូវ​លិច​បាត់​នៅពេលដែល​កម្រិត​ទឹកសមុទ្រ​កើនឡើង​។​



ការចុះហត្ថលេខា​លើ​សេចក្តីប្រកាស​សន្តិសុខ​ដែល​ក៏​និយាយ​អំពី​បញ្ហា​ឧក្រិដ្ឋកម្ម​តាម​អ៊ីនធឺណិត​និង​ក្តីបារម្ភ​ផ្នែក​សុខភាព​ដូចជា​ជំងឺឆ្លង​និង​ជំងឺ​រាតត្បាត​ផងដែរ​នោះ​គឺជា​ចំណុច​ស្នូល​នៃ​កិច្ចប្រជុំ​រយៈពេល​បី​ថ្ងៃ​។​

កាលពី​ព្រឹក​ថ្ងៃ​ពុធ ក្រុម​នេសាទ​និង​សហគមន៍​ប៉ាស៊ីហ្វិក​បាន​ចុះហត្ថលេខា​លើ​កិច្ចព្រមព្រៀង​មួយ​ជាមួយ​សហភាព​អឺរ៉ុប​ដើម្បី​លើកកម្ពស់​អភិបាលកិច្ច​នេសាទ​និង​មហាសមុទ្រ​ប្រកបដោយ​ចីរភាព​នៅក្នុង​តំបន់​។​

ភាព​តានតឹង​ស្តីពី​បញ្ហា​ប្រទេស​ចិន​និង​ជនភៀសខ្លួន​បាន​កើនឡើង​ខ្ពស់​នៅក្នុង​វេទិកា​នេះ​បន្ទាប់ពី​កោះ Nauru បាន​ចោទប្រកាន់​មន្ត្រី​ចិន​កាលពី​ថ្ងៃ​អង្គារ​អំពី​ការ​សម្លុត​គំរាម​និង​ឃុំឃាំង​អ្នកកាសែត​នូ​វែ​ល​ហ្សេ​ឡង់​ជា​បណ្តោះអាសន្ន​។​

កោះ Nauru បានទទួល​ស្គាល់​តៃវ៉ាន់​ហើយ​មិនមាន​ទំនាក់ទំនង​ការទូត​ជាមួយ​ប្រទេស​ចិន​ទេ​។​
​ប៉ូលិស​កោះ Nauru បាន​ឃុំខ្លួន​អ្នកសារព័ត៌មាន​ទូរទស្សន៍​នូ​វែ​ល​ហ្សេ​ឡង់​ម្នាក់​ឈ្មោះ Barbara Dreaver រយៈពេល​ប្រហែល​បី​ម៉ោង​បន្ទាប់ពី​នាង​ត្រូវបាន​គេ​ប្រទះឃើញ​សម្ភាសន៍​ជនភៀសខ្លួន​ម្នាក់​នៅ​ខាងក្រៅ​ភោជនីយដ្ឋាន​មួយ​។​

អំឡុង​វេទិកា​នេះ កោះ Nauru មានបំណង​កំណត់ព្រំដែន​ការពិភាក្សា​អំពី​ជនភៀសខ្លួន​ជាង ៦០០​នាក់​ដែល​រស់​នៅលើ​កោះ​តូច​មួយ​នេះ​ក្រោម​កិច្ចព្រមព្រៀង​ដ៏​ចម្រូងចម្រាស​ជាមួយ​អូស្ត្រាលី​៕ AP

​

Source: Kampuchea Thmey Daily