គណៈប្រតិភូកូរ៉េខាងត្បូងជាន់ខ្ពស់មួយ បានធ្វើកិច្ចចរចាជាមួយក្រុមមន្ត្រីនៅប្រទេសកូរ៉េខាងជើងនៅថ្ងៃពុធដើម្បីស្វែងរកការរៀបចំកិច្ចប្រជុំកំពូលអន្តរកូរ៉េលើកទីបីនៅឆ្នាំនេះ និងបំបែកភាពជាប់គាំងនៅក្នុងកិច្ចពិភាក្សាអំពីការរំសាយអាវុធនុយក្លេអ៊ែរ។
បេសកជនពិសេសរបស់លោកប្រធានាធិបតី មូន ចេអ៊ីន គឺលោក Chung Eui-yong ដែលកំពុងដឹកនាំគណៈប្រតិភូមានសមាជិកចំនួន៥រូបបាននិយាយថា លោកគ្រោងនឹងពិភាក្សាអំពីមធ្យោបាយដើម្បីលុបចោលទាំងស្រុងនូវអាវុធនុយចេញពីឧបទ្វីបកូរ៉េទាំងស្រុងនិងបង្កើត “សន្តិភាពយូរអង្វែង”។
អ្នកនាំពាក្យការិយាល័យប្រធានាធិបតីនៅទីក្រុងសេអ៊ូលបានបញ្ជាក់ថា កិច្ចពិភាក្សានេះបានចាប់ផ្តើមប៉ុន្តែមិនបានផ្តល់ព័ត៌មានលម្អិតទេ។
ប្រធានាធិបតីអាមេរិកលោក ដូណាល់ ត្រាំ និងមេដឹកនាំកូរ៉េខាងជើងលោក គីម ជុងអ៊ុន បានឈានដល់កិច្ចព្រមព្រៀងមិនច្បាស់លាស់មួយនៅឯកិច្ចប្រជុំកំពូលក្នុងខែមិថុនាដើម្បីធ្វើការឆ្ពោះទៅរកការរំសាយអាវុធនុយក្លេអ៊ែរនៅឧបទ្វីបកូរ៉េប៉ុន្តែមានភាពរីកចម្រើនតិចតួចណាស់ចាប់តាំងពីពេលនោះមក។
ការពិភាក្សាបានឈានដល់ភាពជាប់គាំងកាលពីខែមុននៅពេលដែលលោក ត្រាំ បានលុបចោលដំណើរទស្សនកិច្ចរបស់រដ្ឋមន្ត្រីក្រសួងការបរទេសអាមេរិកលោក Mike Pompeo ទៅកាន់ប្រទេសកូរ៉េខាងជើងដោយលើកឡើងពីកង្វះវឌ្ឍនភាព។
គោលបំណងនៃដំណើរទស្សនកិច្ចរយៈពេលមួយថ្ងៃរបស់គណៈប្រតិភូកូរ៉េខាងត្បូងទៅកាន់ទីក្រុងព្យុងយ៉ាងគឺដើម្បីបញ្ជាក់សេចក្តីលម្អិតនៃជំនួបកំពូលលើកទី៣រវាងមេដឹកនាំកូរ៉េទាំងពីរនៅចុងខែនេះ។
ប៉ុន្តែក្រុមអ្នកសង្កេតការណ៍បាននិយាយថា លោក Chung ត្រូវបានគេគិតថានឹងពាំនាំសំណើមួយដែលមានបំណងបំបែកភាពជាប់គាំងនៃការរំសាយអាវុធនុយក្លេអ៊ែរ។
ថ្វីបើមានភាពជាប់គាំងជាមួយកូរ៉េខាងជើងក៏ពិតមែន ប៉ុន្តែលោក ត្រាំ បានសម្តែងក្តីសង្ឃឹមរបស់លោកចំពោះភាពជោគជ័យនៃជំនួបកំពូលអន្តរកូរ៉េលើកក្រោយនៅក្នុងការសន្ទនាតាមទូរស័ព្ទជាមួយលោកមូនកាលពីថ្ងៃអង្គារ។
គួរបញ្ជាក់ថា នៅពេលដែលលោកគីមនិងលោកមូនបានជួបប្រជុំគ្នាកាលពីខែមេសាសម្រាប់កិច្ចប្រជុំកំពូលលើកដំបូងរបស់ខ្លួន ពួកគេបានព្រមព្រៀងជំរុញឲ្យមានសេចក្តីប្រកាសមួយពីក្រុងវ៉ាស៊ីនតោនអំពីការបញ្ចប់សង្គ្រាមកូរ៉េដើម្បីជំនួសបទឈប់បាញ់ឆ្នាំ១៩៥៣៕ AFP
Source: Kampuchea Thmey Daily
0 Comments