ភ្នំពេញ ៖ តាមការគ្រោងទុក នៅរសៀលថ្ងៃទី ២៥កញ្ញាឆ្នាំ២០១៨នេះ ចៅក្រមសាលាដំបូងរាជធានីភ្នំពេញ នឹងបើកសវនាការលើសំណុំរឿងអតីតឧកញ៉ា ហូរ ចំរើន បាញ់គំរាមឳក្មេក ម៉ែក្មេក ប៉ុន្តែដោយសារអវត្តមានសាក្សី តំណាងអយ្យការបានស្នើអោយចៅក្រមជំនុំជំរះលើកពេលសវនាការទៅថ្ងៃក្រោយវិញ។
ចៅក្រមដែលត្រូវដំណើរការសវនាការកាត់ទោសនេះឈ្មោះ លាង សំណាត់ និងតំណាងអយ្យការគឺលោកសៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។
តាមសេចក្ដីរាយការណ៍ពីតុលាការនៅរសៀលថ្ងៃទី ២៥កញ្ញា បានឲ្យដឹងថា អនុរក្សគុកព្រៃស បានបញ្ជូនជនត្រូវចោទ ហូរ ចំរើន មកកាន់បន្ទប់សវនាការតាំងពីម៉ោង១រសៀលមកម្ល៉េះ ដើម្បីគេចវេះពីការតាមប្រមាញ់របស់អ្នកសារព័ត៌មាន។
ប្រភពបានបន្តឲ្យដឹងទៀតថា មុនពេលចៅក្រមជំនុំជំរះនិងតំណាងអយ្យការបានចូលមកក្នុងបន្ទប់សវនាការ នៅក្នុងបន្ទប់សវនាការគឺមានតែជនជាតែជនជាប់ចោទ បរិវាររបស់ជនជាប់ចោទ មេធាវីការពារផ្លូវច្បាប់អោយជនជាប់ចោទតែប៉ុណ្ណោះ។ បន្ទាប់មក មានអ្នកយកព័ត៌មានរបស់ស្ថានីយទូរទស្សន៍ហង្សមាសម្នាក់បានចូលទៅក្នុងបន្ទប់សវនាការនេះដែរ ដើម្បីស្ដាប់ការកាត់ទោសដែលមានលក្ខណៈជាសាធារណៈ ប៉ុន្តែអ្វីដែលគេនឹកស្មានមិនដល់នោះ គឺពេលឃើញបុគ្គលិកទូរទស្សន៍ហង្សមាសចូលទៅដល់ស្រាប់តែជនជាប់ចោទហូរ ចំរើន ឡាំប៉ា ឡូឡាមិនឲ្យអ្នកយកព័ត៌មានហង្សមាសស្ដាប់ការកាត់ទោសខ្លួន ហើយបរិវាររបស់ជនជាប់ចោទបានដេញអ្នកយកព័ត៌មានទូរទស្សន៍ហង្សមាសចេញពីបន្ទប់សវនាការដោយខុសទៅនឹងនីតិវិធី និងជាឆន្ទានុសិទ្ធិតែមួយគត់របស់ចៅក្រមជំនុំជំរះ។
ដោយសារមិនចង់ប្រឡាក់សំរាមសម្អុយសង្គមបែបនេះ អ្នកយកព័ត៌មានរបស់ទូរទស្សន៍ហង្សមាសបានដើរចេញមុនពេលចៅក្រមជំនុំជំរះមកដល់ ហើយពេលអង្គសវនាការចាប់ផ្ដើម តំណាងអយ្យការបានស្នើឲ្យពន្យារពេលសវនាការដោយសារអវត្តមានសាក្សី។
គួររំលឹកថា អតីតឧកញ៉ា ហូរ ចំរើន ត្រូវបានកម្លាំងសមត្ថកិច្ចក្រសួងមហាផ្ទៃបញ្ជូនខ្លួនមកកាន់សាលាដំបូងរាជធានីភ្នំពេញនារសៀលថ្ងៃទី ១៦ឧសភា ឆ្នាំ២០១៨ ពាក់ព័ន្ធការបាញ់បោះគំរាមកំហែងឪពុកម្ដាយក្មេកកាលពីថ្ងៃទី២១ ខែមេសា ឆ្នាំ២០១៨កន្លងទៅ នៅភូមិគ្រឹះស្ថិតនៅភូមិព្រៃស សង្កាត់ព្រៃស ខណ្ឌដង្កោ រាជធានីភ្នំពេញ។
លោក ហូរ ចំរើន អាយុ៣៨ឆ្នាំ ជាមន្ត្រីយោធាក្រសួងការពារជាតិ និងភរិយាឈ្មោះ គារ សុខគាង អាយុ១៩ឆ្នាំ ត្រូវបានព្រះមហាក្សត្រតែងតាំងជាឧកញ៉ា នៅថ្ងៃទី ១២មេសា ឆ្នាំ២០១៨ថ្មីៗនេះ លុះមកដល់ថ្ងៃទី ២១មេសា ស្រាប់តែមានទំនាស់កើតឡើងក្នុងគ្រួសារនៅវេលារសៀល ហើយស្រាប់តែឧកញ៉ា ហូរ ចំរើន បាញ់កាំភ្លើងគំរាមកំហែងនៅក្នុងភូមិគ្រឹះនោះបណ្ដាលឲ្យកើតមានការភ្ញាក់ផ្អើលយ៉ាងខ្លាំង។
ក្រោយកើតហេតុគេឃើញលោកយិន គារ អាយុ៥៦ឆ្នាំ ជាឪពុកក្មេក លោកស្រី ផន ទៀង ជាម្ដាយក្មេក និងឈ្មោះ គារ សុខគាង ជាភរិយាលោកឧកញ៉ា ហូរ ចំរើន បានទៅដាក់ពាក្យប្ដឹងឲ្យសមត្ថកិច្ចធ្វើអន្តរាគមន៍តាមផ្លូវច្បាប់។ បន្ទាប់មកសំណុំរឿងនេះ ត្រូវបាននគរបាលព្រហ្មទណ្ឌក្រសួងមហាផ្ទៃបញ្ជូនមកអយ្យការអមសាលាដំបូងដើម្បីបើកការស៊ើបអង្កេតបឋម ហើយនៅថ្ងៃទី ១៦ឧសភានេះក៏ចាប់ខ្លួនបញ្ជូនមកតុលាការសម្រេចឃុំខ្លួនក្រោមការចោទប្រកាន់ពីបទគំរាមថានឹងសម្លាប់ និងបទប្រើប្រាស់អាវុធខុសច្បាប់៕
Source: Kampuchea Thmey Daily
0 Comments