ភ្នំពេញ ៖ លោក កែវ អូម៉ាលីស្ស ត្រូវបាន តែងតាំង ជា ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលព្រៃឈើ ជំនួស លោក អ៊ុង សំអាត ដែលត្រូវទទួលភារកិច្ច លោក ងិន ឆាយ ត្រូវបាន តែងតាំង ជា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្ម ជាផ្លូវការ។
ពិធីប្រកាសនិងតែងតាំង ចូលកាន់តំណែងនេះធ្វើឡើង កាលពី ថ្ងៃព្រហស្បតិ៍ ១១កើត ខែភទ្របទ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២០ ខែកញ្ញា ឆ្នាំ២០១៨ នៅទីស្តីការក្រសួង ក្រោមអធិបតីភាព លោកវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
មានមតិស្វាគមន៍ លោក រដ្ឋមន្ត្រីសូមចូលរួមអបអរសាទរចំពោះថ្នាក់ដឹកនាំពីររូបដែលត្រូវបានព្រះមហាក្សត្រត្រាស់បង្គាប់តែងតាំងទី១-លោក កែវ អូម៉ាលីស្ស ជាប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលព្រៃឈើ និងទី២-លោក ងិន ឆាយ ជាប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្ម។
ឆ្លៀតយកឱកាសដ៏មានតម្លៃនេះ លោករដ្ឋមន្ត្រីបានលើកឡើងថា លោកទាំងពីររូបនេះជាសមាសភាពថ្នាក់ដឹកនាំថ្មី ដែលជាកម្លាំងថ្មី មានទាំងចំណេះដឹង និងបទពិសោធន៍ក្នុងការដឹកនាំការងារ ជូនក្រសួង និងមូលដ្ឋានកន្លងបានល្អប្រសើរ។
ក្នុងគោលបំណងធ្វើឲ្យសម្រេចបាននូវនយោបាយកំណែទម្រង់ របស់រាជរដ្ឋាភិបាល និងទទួលបានជោគជ័យតាមផែនការយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល និងផែនការយុទ្ធសាស្ត្រអភិវឌ្ឍន៍វិស័យកសិកម្ម ២០១៩- ២០២៣ របស់ក្រសួង ប្រតិភូត្រូវចាំបាច់ត្រូវយកចិត្តទុកដាក់ខ្ពស់អនុវត្តនូវចំណុចសំខាន់ៗមួយចំនួនដូចខាងក្រោម៖
ទី១-អនុវត្តតាមអនុសាសន៍ដ៏ខ្ពង់ខ្ពស់របស់សម្តេចតេជោហ៊ុន សែន ឲ្យបានពេញលេញ ដោយត្រូវធ្វើសកម្មឲ្យបានកាន់តែប្រសើរជាងមុន មានភាពទូលំទូលាយជាងមុន និងមានប្រសិទ្ធភាពជាងមុន ដើម្បីឲ្យប្រជាជនគ្រប់រូបបានទទួលផលប្រយោជន៍ពីរាជរដ្ឋាភិបាលបានច្រើនជាងមុន។ទី២-អនុវត្តផែនការជាយុទ្ធសាស្ត្រ និងគោលនយោបាលរបស់រាជរដ្ឋាភិបាល និងរបស់ក្រសួង ក៏ដូចជាការអនុវត្តឲ្យបានពេញលេញនូវលិខិតបទដ្ឋានគតិយុត្តិ និងលក្ខន្តិកមន្ត្រីរាជការស៊ីវិល ។ទី៣-ខិតខំស្រាវជ្រាវ និងរៀបចំ ការធ្វើទំនើបកម្មកសិកម្មប្រកបដោយភពវៃឆ្លាត បរិយាបន ធន់នឹងការប្រែប្រួលអាកាសធាតុ មានមាននវានុវត្តន៍ និងមានឧត្តមភាពក្នុងការប្រកួតប្រជែង។ ទី៤-ពង្រឹងសាមគ្គីភាព និងឯកភាពផ្ទៃក្នុងឲ្យបានល្អប្រសើរប្រយោជន៍ដើម្បីពង្រឹងប្រសិទ្ធភាពការងារ (សមូហភាពដឹកនាំ បុគ្គលទទួលខុសត្រូវ)។ ទី៥-ត្រូវប្រកាន់យកក្រមសីលធម៌វិជ្ជាជីវៈមន្ត្រីរាជការដែលជាអ្នកផ្តល់សេវាសាធារណៈ និងជាអ្នកផ្ទេរចំណេះដឹងដល់កសិករប្រកបដោយប្រសិទ្ធភាពខ្ពស់។ទី៦ -ត្រូវបន្តផ្សព្វផ្សាយអំពីការអនុវត្តកសិកម្មល្អទាំងក្នុងវិស័យផលិតកម្មសត្វ និងសុខភាពសត្វ ហើយនឹងសហគមន៍ព្រៃឈើ។ ទី៧-ជំរុញនិងលើកទឹកចិត្តវិស័យឯកជន និងកសាងភាពជាដៃគូក្នុងការចូលរួមក្នុងការអភិវឌ្ឍ ផ្សព្វផ្សាយ បញ្ចូលបច្ចេកវិទ្យាថ្មីៗក្នុងវិស័យកសិកម្ម រួមជាមួយការប្រើគ្រឿងយន្តកសិកម្មនិងឧបករណ៍កសិកម្ម ការផលិតពូជ ជីនិងថ្នាំកសិកម្ម ការកែច្នៃវិចខ្ចប់ និងជំរុញទីផ្សារក្នុងស្រុក និងនាំចេញ៕
Source: Kampuchea Thmey Daily
0 Comments