អ្នកប្រដាល់ជើងខ្លាំង៤រូប នឹងជួបគ្នាវាយដណ្តើមពានអនុស្សាវរីយ៍បាយ័ន សម្រាប់ប្រភេទទម្ងន់៥៧គីឡូក្រាម។ អ្នកប្រដាល់ទាំង៤រូបនោះ រួមមាន ង៉ែត វុធ មកពីក្លិបកងពលតូចទ័ពឆ័ត្រយោង៩១១ , អ៊ូច ធារិទ្ធ មកពីក្លិបអាណាចក្រគុនខ្មែរ , ឈៀវ ង៉ុយ ក្លិបកងពលធំអន្តរាគមន៍លេខ២ និង អេ រដ្ឋា ក្លិបអេភូថងកីឡា។
ពួកគេទាំង៤នាក់នេះ នឹងជួបប្រកួតគ្នានៅល្ងាចថ្ងៃសៅរិ៍ទី០៨កញ្ញា២០១៨នេះ នៅលើសង្វៀនបាយ័នស្ទឹងមានជ័យ។ការប្រកួតប្រព្រឹត្តទៅតាមរូបមន្តជាMarathon គឺចាញ់ជ្រុះធ្លាក់ ឈ្នះត្រូវបន្តការប្រកួតទៀត ទាល់តែរកឃើញជើងខ្លាំងម្ចាស់ពានក្នុងពេលតែមួយ។
ការប្រកួតចែកចេញជាពីរដំណាក់កាល ដែលដំណាក់កាលទី១ប្រកួតជម្រុះ ដើម្បីជម្រុះចោលពីរនាក់ដែលចាញ់ ហើយពីរនាក់ដែលឈ្នះនោះ ត្រូវឡើងទៅជួបគ្នាក្នុងដំណាក់កាលទី២ ដែលជាការប្រកួតផ្តាច់ព្រ័ត្រដណ្តើមពានអនុស្សាវរីយ៍របស់ស្ថានីយ៍ទូរទស្សន៍បាយ័ន ។
គួរបញ្ជាក់ថា ការប្រកួតក្នុងដំណាក់កាលទី១ គឺប្រកួតតែ៣ទឹកប៉ុណ្ណោះដោយក្នុងមួយទឹកមាន៣នាទី និងការប្រកួតក្នុងដំណាក់កាលផ្តាច់ព្រ័ត្រ គឺវាយ៥ទឹកតែមួយទឹកវាយតែ២នាទីទេ ។
សម្រាប់ការប្រកួតជម្រុះលើកដំបូង(ដំណាក់កាលទី១) ង៉ែត វុធ នឹងត្រូវជួបជាមួយអ៊ូច ធារិទ្ធ ហើយសៀវ ង៉ុយ ជួបជាមួយអេ រដ្ឋា។
រវាងអ្នកប្រដាល់ង៉ែត វុធនិងអ៊ូច ធារិទ្ធនេះ ពួកគេមិនធ្លាប់ប៉ះគ្នាទេកន្លងមក។២នាក់នេះ ពិបាកទស្សន៍ទាយណាស់ថា អ្នកណាឈ្នះ អ្នកណាចាញ់នោះ សម្រាប់ការជួបគ្នាលើកនេះ ព្រោះថាអ៊ូច ធារិទ្ធ ថ្វីត្បិតតែជាអ្នកប្រដាល់ស្រករក្រោយក្តី តែគេវាយល្អនិងខ្លាំង ចិត្តក៏ធំ ហើយធ្លាប់ឈ្នះសៀវង៉ុយជើងខ្លាំងជើងចាស់ថែមទៀត ។រីឯ ង៉ែត វុធ គេក៏វាយខ្លាំងដែរហើយមានចិត្តប្រដាល់ធំ ស៊ូការប្រកួត។និយាយរួម ពីរនាក់នេះពិបាកសន្និដ្ឋានមុនថាអ្នកណាឈ្នះ អ្នកណាចាញ់ណាស់ ។
ចំពោះ សៀវ ង៉ុយ និង អេ រដ្ឋា វិញ ពួកគេទាំងពីរក៏មិនធ្លាប់ជួបប្រកួតគ្នាដែរពីមុនមក ។ យ៉ាងណា រវាងពួកគេពីរនាក់នេះ សៀវ ង៉ុយ ទំនងជាអាចឈ្នះអេ រដ្ឋា ក្នុងការប្រកួតជម្រុះលើកដំបូងនោះ ។
ទោះជាយ៉ាងណា ក្នុងចំណោមពួកគេ៤នាក់នេះ គេបានកត់សម្គាល់ឃើញថា សៀវ ង៉ុយនិង អ៊ូច ធារិទ្ធ គេមានថ្វីដៃល្អ ទាំងបទពិសោធន៍ ទាំងក្បាច់គុន ទាំងកម្លាំងស៊ុហ្វ ដែលអាចឆ្លងផុតវគ្គជម្រុះ ឈានដល់វគ្គផ្តាច់ព្រ័ត្របាន ។ តែយ៉ាងណាក៏ដោយ គេមិនអាចទាយមុនបានថា ការប្រកួតដណ្តើមពានបាយ័នទម្ងន់៥៧គីឡូក្រាមនេះ មិនដឹងថាធ្លាក់ទៅលើនរណានោះទេ ។
ចំពោះការប្រកួតគូឯកវិញនោះ ចាន់ វ៉ារិទ្ធ អ្នកប្រដាល់ក្លិបនិរោធមានជ័យ ត្រូវគេផ្គូអោយជួបប្រកួតជាមួយលិញ ភារម្យ អ្នកប្រដាល់ក្លិបភារម្យគុនខ្មែរ ដោយប្រកួតគ្នាក្នុងទម្ងន់៦០គីឡូក្រាម ។
ពីរនាក់នេះ ពុំធ្លាប់មានប្រវត្តិជួបគ្នាទេកន្លងមក ។ ប៉ុន្តែយ៉ាងណា រវាងពួកគេទាំងពីរ នាក់នេះ លិញ ភារម្យ គេវាយខ្លាំងជាងចាន់ វ៉ារិទ្ធ តែមិនច្បាស់ថាភារម្យ ឈ្នះវ៉ារិទ្ធនោះឡើយ។ការប្រកួតចុងក្រោយរបស់លិញ ភារម្យ គឺវាយឈ្នះកូយ ឡាយ អ្នកប្រដាល់ក្លិបកងពលតូចទ័ពឆ័ត្រយោង៩១១ ដោយពិន្ទុ (២៥សីហា២០១៨) ឯ ចាន់ វ៉ារិទ្ធ គេប្រកួតលើកចុងក្រោយ វាយឈ្នះជើងចាស់សុខ សុវណ្ណ ក្លិបកងពលធំអន្តរាគមន៍លេខ២ ក្នុងទឹកទី៣ កាលពីថ្ងៃទី១៩សីហា២០១៨ ។ចាំមើល តើនរណាឈ្នះរវាងលិញ ភារម្យ និង ចាន់ វ៉ារិទ្ធជួបគ្នាលើកដំបូងនេះ៕
Source: Kampuchea Thmey Daily
0 Comments