សម័យប្រជុំសភាលើកដំបូង នីតិកាលទី៦ ចាប់ផ្តើមហើយនាព្រឹកនេះ

ភ្នំពេញ ៖ តាមការគ្រោងទុក នៅវេលាម៉ោង៨ និង៣០នាទីព្រឹកថ្ងៃទី០៥ ខែកញ្ញា ឆ្នាំ២០១៨នេះ សម័យប្រជុំលើកដំបូង និងសម័យប្រជុំរដ្ឋសភាលើកទី១ នីតិកាលទី៦ បានចាប់ផ្តើមហើយ ក្រោមព្រះរាជអធិបតីភាពដ៏ខ្ពង់ខ្ពស់របស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដោយមានការអញ្ជើញចូលរួមពីសម្តេចអគ្គមហាសេនាបតីតេជោ ហ៊ុន សែន សម្តេចអគ្គមហាពញាចក្រី ហេង សំរិន សម្តេចវិបុលសេនាភក្តី សាយ ឈុំ សម្តេចក្រឡាហោម ស ខេង តំណាងរាស្ត្រអាណត្តិទី៦ ហើយក៏មានការអញ្ជើញចូលរួមពីសំណាក់ឯកអគ្គរដ្ឋទូត ឯកអគ្គរាជទូតនៃបណ្តាប្រទេសនានាប្រចាំកម្ពុជា ចូលរួមផងដែរ។

ចំណែកព្រះរាជកម្មវិធី ចេញដោយព្រះបរមរាជវាំងបង្ហាញថា នៅម៉ោង៧ និង៣០ព្រឹក ថ្ងៃទី៥ ខែកញ្ញា បេក្ខជនជាប់ឆ្នោតជាតំណាងរាស្ត្រ នីតិកាលទី៦ អញ្ជើញដល់។ បន្ទាប់មកភ្ញៀវកិត្តិយសជាតិ-អន្តរជាតិ អញ្ជើញដល់ សម្តេចអគ្គមហាសេនាបតីតេជោ ហ៊ុន សែន, សម្តេចអគ្គមហាពញាចក្រី ហេង សំរិន និងសម្តេចវិបុលសេនាភក្តី សាយ ឈុំ អញ្ជើញដល់ ហើយនៅម៉ោង៨ និង៣០ ទើបព្រះករុណា ព្រះមហាក្សត្រ យាងដល់វិមានរដ្ឋសភា។ បន្ទាប់មកព្រះករុណាជាអម្ចាស់ជីវិតលើត្បូងជាទីគោរពសក្ការៈដ៏ខ្ពង់ខ្ពស់បំផុត ស្តេចយាងថ្វាយគ្រឿងសក្ការបូជា ព្រះបរមរូប ព្រះបាទជ័យវរ្ម័នទី៧ និងព្រះពុទ្ធរូបនៅខាងក្នុងវិមានរដ្ឋសភា មុនពេលព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ស្តេចយាងគង់ប្រថាប់លើព្រះទីនាំងកៅអី នៅខាងក្នុងសាលប្រជុំវិមានរដ្ឋសភា។

ព្រះរាជកម្មវិធីបង្ហាញដែរថា នៅពេលចាប់ផ្តើមកម្មវិធីដំបូង គឺគោរពទង់ជាតិ នៃព្រះរាជាណាចក្រកម្ពុជា បន្ទាប់មក សម្តេចអគ្គមហាសេនាពញាចក្រី ហេង សំរិន ព្រឹទ្ធសមាជិករដ្ឋសភា ព្រះបរមរាជានុញ្ញាតយាងព្រះករុណាជាអម្ចាស់ជីវិតលើត្បូងជាទីគោរពសក្ការៈដ៏ខ្ពង់ខ្ពស់បំផុត ប្រោសព្រះរាជទានព្រះរាជសុន្ទរកថា។ ព្រះករុណាជាអម្ចាស់ជីវិតលើត្បូងជាទីគោរពសក្ការៈដ៏ខ្ពង់ខ្ពស់បំផុត ប្រោសព្រះរាជទានព្រះរាជសុន្ទរកថា ទៅកាន់សម័យប្រជុំដំបូងរដ្ឋសភា នីតិកាលទី៦។
ការគោរពទង់ជាតិបិទកម្មវិធី។ បន្ទាប់មក ព្រះករុណាជាអម្ចាស់ជីវិតលើត្បូងជាទីគោរពសក្ការៈដ៏ខ្ពង់ខ្ពស់បំផុត ស្តេចយាងគង់ប្រថាប់នៅក្នុងបន្ទប់រង់ចាំ (ប្រមាណ១៥នាទី)។ ព្រះករុណាជាអម្ចាស់ជីវិតលើត្បូងជាទីគោរពសក្ការៈដ៏ខ្ពង់ខ្ពស់បំផុត ប្រោសព្រះរាជទានការថតរូបអនុស្សាវរីយ៍ជាមួយបេក្ខជនជាប់ឆ្នោតជាតំណាងរាស្ត្រនៅខាងមុខក្លោងទ្វារវិមានរដ្ឋសភា។ ព្រះករុណាជាអម្ចាស់ជីវិតលើត្បូងជាទីគោរពសក្ការៈដ៏ខ្ពង់ខ្ពស់បំផុតស្តេចយាងនិវត្ត។

ចំណែករដ្ឋសភា ក៏បានផ្សព្វផ្សាយនូវកម្មវិធីសម័យប្រជុំដំបូង និងសម័យរដ្ឋសភាលើកទី១ នីតិកា លទី៦ នៅវិមានរដ្ឋសភានាថ្ងៃពុធ ទី០៥-០៦ ខែកញ្ញា ដោយក្រោយព្រះករុណា ព្រះមហាក្សត្រ ទ្រង់យាងនិវត្តន៍ទៅកាន់ព្រះបរមរាជវាំងវិញ គឺរដ្ឋសភាចាប់ផ្តើមសម័យប្រជុំ លើកទី១ ដោយក្នុងនោះ ចាប់ផ្តើមដំបូងលោក ឡេង ប៉េងឡុង ប្រកាសហេតុ ។ បន្ទាប់មកសម្តេចអគ្គមហាពញាចក្រី ហេង សំរិន ព្រឹទ្ធសមាជិករដ្ឋសភាដឹកនាំសម័យប្រជុំរដ្ឋសភាលើកទី១ ដោយមានបេក្ខជនជាប់ឆ្នោតជាតំណាងរាស្ត្រចំនួន៥ រូប ដែលមានអាយុតិចជាងគេ ជាលេខាធិការ ដើម្បីជួយការងារព្រឹទ្ធសមាជិករដ្ឋសភា។

តាមកម្មវិធីរបស់រដ្ឋសភាមានរបៀបវារៈចំនួន២ ដែលរដ្ឋសភាប្រជុំលើកទី១ ក្រោមអធិបតីភាពព្រឹទ្ធសមាជិករដ្ឋសភារួមមាន ការសម្រេចអំពីសុពលភាពនៃអាណត្តិរបស់សមាជិកនីមួយៗ និងការអនុម័តបទបញ្ជាផ្ទៃក្នុងនៃរដ្ឋសភានីតិកាលទី៦។ ដោយឡែក នៅពេលរសៀលថ្ងៃទី៥ ខែកញ្ញា រដ្ឋសភាបានប្រកាសថា នៅម៉ោង២ និង៣០ រសៀល សម្តេច ឯកឧត្តម លោកជំទាវ តំណាងរាស្ត្រ អញ្ជើញមកជួបជុំគ្នា នៅវិមានរដ្ឋសភា ប្រើរថយន្តរួមគ្នា ដែលអគ្គលេខាធិការដ្ឋានរដ្ឋសភារៀបចំជូនធ្វើដំណើរទៅព្រះបរមរាជវាំង ធ្វើសច្ចាប្រណិធាន (លើកលែងសម្តេច ឯកឧត្តម លោកជំទាវ មួយចំនួន ប្រើប្រាស់រថយន្តផ្ទាល់ខ្លួន)។

ចំណែកនៅថ្ងៃទី៦ ខែកញ្ញា រដ្ឋសភា បានប្រកាសពីកម្មវិធីនៃសម័យប្រជុំលើកទី១បន្ត ដោយអង្គប្រជុំរដ្ឋសភា នឹងចាប់ផ្តើមនៅម៉ោង៨ព្រឹក ក្រោមអធិបតីភាព សម្តេចអគ្គមហាពញាចក្រី ហេង សំរិន ព្រឹទ្ធសមាជិករដ្ឋសភានិងមានលេខាធិការ៥រូប ជួយការងារព្រឹទ្ធសមាជិករដ្ឋសភា ។ ក្រោយមកចាប់ផ្តើមរបៀបវារៈការបោះឆ្នោតជ្រើសតាំងប្រធាន អនុប្រធាន នៃរដ្ឋសភា ប្រធាន អនុប្រធានគណៈកម្មការជំនាញទាំងអស់ នៃរដ្ឋសភា និងផ្តល់សេចក្តីទុកចិត្ត ចំពោះរាជរដ្ឋាភិបាល។ ភារកិច្ចរបស់សម្តេចអគ្គមហាពញាចក្រី ហេង សំរិន ព្រឹទ្ធសមាជិករដ្ឋសភា និងលេខាធិការ៥រូបត្រូវបានបញ្ចប់។ សម្តេចពញាចក្រី ហេង សំរិន ប្រធានរដ្ឋសភាអញ្ជើញអនុប្រធានទី១ អនុប្រធានទី២ នៃរដ្ឋសភាមកកាន់អាសនៈ។ សម្តេចចក្រី ហេង សំរិន ប្រធានរដ្ឋសភា ថ្លែងអំណរព្រះគុណ និងអរគុណ ក្នុងឱកាសទទួលតំណែងជាប្រធានរដ្ឋសភា នីតិកាលទី៦។ ក្រោយមកប្រធានរដ្ឋសភាអញ្ជើញសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានមតិក្នុងឱកាសទទួលតំណែងជានាយករដ្ឋមន្ត្រី៕