ភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ កាលពីរសៀលថ្ងៃទី០៧ ខែកញ្ញា ឆ្នាំ២០១៨ បានអញ្ជើញជាអធិបតីភាពក្នុងពិធីប្រកាសដំឡើងឋានន្តរស័ក្តិ និងតែងតាំងមុខតំណែងដល់មេទ័ពកំពូលថ្មីចំនួន៣រូប ដែលការប្រកាសតែងតាំងនេះធ្វើឡើងនៅវិមានសន្តិភាព ដោយមានការផ្សព្វផ្សាយកម្មវិធីនយោបាយរបស់រាជរដ្ឋាភិបាល អាណត្តិទី០៦ ផងដែរ។
មេទ័ពកំពូលទាំង៣រូបនោះរួមមាន នាយឧត្តមសេនីយ៍ឯក វង្ស ពិសេន មេបញ្ជាការរង នៃកងរាជអាវុធហត្ថលើផ្ទៃប្រទេស ដែលត្រូវបានតែងតាំងជាអគ្គមេបញ្ជាការ នៃកងយោធពលខេមរភូមិន្ទ, នាយឧត្តមសេនីយ៍ ឥត សារ៉ាត់ ត្រូវបានតែងតាំងជា អគ្គមេបញ្ជាការរង និងជានាយសេនាធិការចម្រុះ នៃកងយោធពលខេមរភូមិន្ទ និងឧត្តមសេនីយ៍ឯក ហ៊ុន ម៉ាណែត ត្រូវបានតែងតាំងជាមេបញ្ជាការកងទ័ពជើងគោក។
មុនការតែងតាំងនេះ លោកឧត្តមសេនីយ៍ វង្ស ពិសេន គឺមេបញ្ជាការរង និងជា នាយសេនាធិការ កងរាអាវុធហត្ថលើផ្ទៃប្រទេស។ ចំណែកនាយឧត្តមសេនីយ៍ ឥត សារ៉ាត់ មុនការតែងតាំងនេះ លោកគឺជាអគ្គមេបញ្ជាការរងនៃកងយោធពលខេមរភូមិន្ទ ហើយលោកឧត្តមសេនីយ៍ឯក ហ៊ុន ម៉ាណែត មុនការតែងតាំងនេះ លោកគឺជាមេបញ្ជាការរងកងទ័ពជើងគោក និងជានាយរងសេនាធិការចម្រុះ នៃកងយោធពលខេមរភូមិន្ទ។
សូមបញ្ជាក់ថា កាលពីថ្ងៃទី៦ ខែកញ្ញា ឆ្នាំ២០១៨ ព្រះករុណាព្រះបាទសម្ដេចព្រះ បរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់តែងតាំង និងដំឡើងឋានន្ដរស័ក្ដិ នាយទាហានជាន់ខ្ពស់នៃកងយោធពលខេមរភូមិន្ទចំនួន៣រូប តាមសំណើរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ក្នុងព្រះរាជក្រឹត្យចុះថ្ងៃទី៦ ខែកញ្ញាឆ្នាំ២០១៨ ព្រះមហាក្សត្របានត្រាស់បង្គាប់តែងតាំង និងដំឡើងឋានន្ដរស័ក្ដិ នាយទាហាន៣រូប គឺទី១, តែងតាំង និងដំឡើងឋានន្ដរស័ក្ដិ គឺលោកឧត្តមសេនីយ៍ វង្ស ពិសេន ជាអគ្គមេបញ្ជាការនៃកងយោធពលខេមរភូមិន្ទ និងដំឡើងឋានន្តរស័ក្ដិថ្នាក់នាយឧត្តមសេនីយ៍ ទី២, នាយឧត្តមសេនីយ៍ ឥត សារ៉ាត់ ជានាយសេនាធិការចម្រុះនៃកងយោធពលខេមរភូមិន្ទ បន្ថែមលើមុខងារបច្ចុប្បន្ន និងទី៣, លោកឧត្តមសេនីយ៏ឯក ហ៊ុន ម៉ាណែត ធ្វើជាមេបញ្ជាការកងទ័ពជើងគោក បន្ថែមលើមុខងារបច្ចុប្បន្ន៕
Source: Kampuchea Thmey Daily
0 Comments