កីឡាករបាល់ទាត់ឆ្នើមរបស់ប្រទេសជប៉ុនគឺ Keisuke Honda បានដឹកនាំក្រុមជម្រើសជាតិកម្ពុជា ហ្វឹកហាត់ផ្លូវការកាលពីល្ងាចថ្ងៃអង្គារ ដើមសប្ដាហ៍នេះដើម្បីប្រមូលផ្តុំហ្វឹកហាត់ត្រៀមប្រកួតមិត្តភាពអន្តរជាតិជាមួយក្រុមភ្ញៀវជម្រើសជាតិម៉ាឡេស៊ី ដែលនឹងធ្វើឡើងនៅ ថ្ងៃទី១០ ខែកញ្ញា ខាងមុខ។
កីឡាករ Keisuke Honda បានធ្វើដំណើរមកដល់ប្រទេសកម្ពុជា មុនកោះហៅកូនក្រុមប្រមូលផ្តុំ១ថ្ងៃ។ កីឡាកររូបនេះបានប្រាប់អ្នកសារព័ត៌មានជាតិនិងអន្តរជាតិក្រោយពេលហ្វឹកហាត់ថា «ខ្ញុំនឹងផ្ដល់បទពិសោធន៍ខ្ញុំទាំងអស់ដល់ក្រុម ជម្រើសជាតិកម្ពុជាក្នុងគម្រោងនេះ។ នេះជាលើកដំបូងនៃការងាររបស់ខ្ញុំក្នុងនាមជាអ្នកចាត់ការទូទៅក្រុម។ យើងមានកីឡាករដែលមានទេពកោសល្យនៅទីនេះ ហើយខ្ញុំសង្ឃឹមថា នឹងធ្វើឲ្យអ្នកគាំទ្រសប្បាយចិត្តចំពោះការងារនេះ»។
អ្នកចាត់ការទូទៅដែលមិនទាន់បោះបង់អាជីពជាកីឡាករបាល់ទាត់បានបញ្ជាក់ថា លោកចង់ឈ្នះការប្រកួតទល់នឹង ម៉ាឡេស៊ី ខាងមុខទោះជាលើកដំបូងរបស់នៃការចាប់ផ្ដើមហ្វឹកហាត់ក៏ដោយ។ លោកកំពុងស្វែងរកចំណុចខ្លាំង និង ចំណុចខ្សោយរបស់កីឡាករបន្ថែមទៀតព្រោះនៅសល់ប៉ុន្មានថ្ងៃទៀតទើបដល់ថ្ងៃប្រកួត។ អតីតកីឡាករ AC Milan បញ្ជាក់ថា ការហ្វឹកហាត់រាល់ថ្ងៃត្រូវតែធ្វើឲ្យល្អប្រសើរឡើងលើការងារជាក្រុម ហើយអ្វីដែលចម្បងនោះគឺផ្លាស់ប្ដូរជម្រើសជាតិល្អប្រសើរឡើង។ លោកថានឹងព្យាយាមជួស រាល់បញ្ហាខ្វះខាតកន្លងមក។
កីឡាករដែលត្រូវបានសហព័ន្ធកីឡាបាល់ទាត់កម្ពុជា កោះហៅប្រមូលផ្តុំលើកនេះមានដូចជាអ្នកចាំទីគឺ ស៊ូ យ៉ាទី របស់ណាហ្គាវើល, អ៊ុំ វិចិត្រ របស់ក្រសួងការពារជាតិ,កែវ សុខសិលា របស់វិសាខា។ ចំណែកខ្សែការពារវិញមាន ហុង ផេង,លី វ៉ាហេទ,សេរ រ៉ស៊ីប របស់បឹងកេត, ស ពិសិដ្ឋ របស់ក្រសួងការពារជាតិ, ឆេង ម៉េង របស់ណាហ្គាវើល, អ៊ុក សុវណ្ណ របស់ភ្នំពេញក្រោន, នេន សុធារ័ត្ន និងសឿយ វិសាល របស់ព្រះខ័នរាជស្វាយរៀង។
ងាកមកមើលខ្សែបម្រើគឺមានជ័យ ចិត្រា របស់អគ្គស្នងការដ្ឋាននគរបាលជាតិ, ឈិន ឈឿន របស់ក្រសួងការពារជាតិ, ស៊ុះ ស៊ូហាណា និងគួច សុកម្ភៈ របស់ណាហ្គាវើល, អ៊ិន សុដាវីត និង ប្រាក់ ធីវ៉ា របស់ភ្នំពេញក្រោន, ប៊ីន ចន្ថាជារី របស់ក្រុម Teregannu FA (ម៉ាឡេស៊ី) និងទិត្យ ឌីណា របស់វិសាខា។ សម្រាប់ខ្សែប្រយុទ្ធមាន ប្រាក់ មុន្នីឧត្តម របស់ព្រះខ័នរាជស្វាយរៀង, កែវ សុខផេង របស់វិសាខា, រ៉ឹម ប៊ុនហៀង របស់ក្រុមក្រសួងការពារជាតិ និងស៊ិន កក្កដា របស់ភ្នំពេញក្រោន។
សហព័ន្ធកីឡាបាល់ទាត់កម្ពុជា បានដាក់លក់សំបុត្រសម្រាប់ប្រកួតមិត្តភាពអន្តរជាតិរវាងកម្ពុជា ជាមួយម៉ាឡេស៊ី ចាប់ពីថ្ងៃទី០១ ខែកញ្ញា ឆ្នាំ២០១៨ ពីម៉ោង ៩និង០០ព្រឹក ដល់ម៉ោង ៥និង០០ល្ងាចតទៅនៅពហុកីឡដ្ឋានជាតិ ដែលនឹងធ្វើឡើងនៅវេលាម៉ោង៦និង៣០ល្ងាច ក្នុងថ្ងៃទី១០ ខែកញ្ញា ឆ្នាំ២០១៨ លើទីលានពហុកីឡដ្ឋានជាតិ ក្នុងរាជធានីភ្នំពេញ។ ប្រកួតនេះមានផ្សាយផ្ទាល់តាមប៉ុស្តិ៍ទូរទស្សន៍ BTV News ផងដែរ។
សូមបញ្ជាក់ថា ក្រោយប្រកាសតែងតាំងកីឡាករ Keisuke Honda ជាអ្នកចាត់ការទូទៅក្រុមជម្រើសជាតិកម្ពុជា សហព័ន្ធកីឡាបាល់ទាត់កម្ពុជាបាន ត្រៀមរៀបចំកម្មវិធីប្រកួតមិត្តភាពអន្តរជាតិចំនួន៤ប្រកួតជាមួយក្រុមជម្រើសជាតិមួយចំនួននៅក្នុងតំបន់ មុនចេញទៅចូលរួមប្រកួតក្នុងពានរង្វាន់ AFF Suzuki Cup ឆ្នាំ២០១៨ ចុងឆ្នាំនេះ៕
Source: Kampuchea Thmey Daily
0 Comments