លោក ហ៊ុន ម៉ាណែត ៖ UNTAC ប្រើថវិកាអស់រាប់ពាន់លានដុល្លា មិនអាចស្វែងរកសុខសន្តិភាពពេញលេញជូនកម្ពុជាទេ

តាកែវ ៖ លោក ហ៊ុន ម៉ាណែត លើកឡើងបែបនេះ ខណៈលោកធ្វើជាតំណាងដ៏ខ្ពង់ខ្ពស់សម្ដេចតេជោ ហ៊ុន សែន និងសម្ដេចកិត្ដិព្រឹទ្ធបណ្ឌិត ចូលរួមនៅក្នុងពិធីសម្ពោធដងទង់ និងសមិទ្ធផលនានានៅវត្តភ្នំដា ស្ថិតក្នុងឃុំគោកធ្លក ស្រុកអង្គរបូរី ខេត្តតាកែវ កាលពីថ្ងៃច័ន្ទ ទី ២៤ ខែកញ្ញា ឆ្នាំ២០១៨។

មានប្រសាសន៍នៅក្នុងពិធីនោះ លោក ហ៊ុន ម៉ាណែត លើកឡើងថា នេះគឺជាមោទនភាពដែលសមិទ្ធផលទាំងអស់នេះ ត្រូវបានសម្ពោធក្នុងនាមតំណាងសម្ដេចតេជោ នាពេលនេះ គឺជាគុណប្រយោជន៍សម្រាប់ប្រជាពលរដ្ឋនៅក្នុងមូលដ្ឋាននេះ និងប្រជាពលរដ្ឋនៅទីជិតឆ្ងាយផងដែរ។ នៅមានសមិទ្ធផលជាច្រើនទៀត ដែលបានកសាង និងសម្ពោធនៅក្នុងប្រទេស ជាពិសេសនៅក្នុងខេត្តតាកែវ។ យើងអបអរសាទរសមិទ្ធផលរបស់ជាតិខ្មែរ ដែលយើងជាខ្មែរបានរួមគ្នាកសាងឡើង ដើម្បីទុកឲ្យកូនចៅប្រជាពលរដ្ឋជំនាន់ក្រោយ ជាពិសេសនៅក្នុងវិស័យព្រះពុទ្ធសាសនានេះតែម្ដង។

ជាមួយគ្នានោះ លោកបានថ្លែងអំណរគុណ និងកោតសរសើរចំពោះព្រះសង្ឃ គណៈកម្មការអាចារ្យវត្ត ពុទ្ធបរិស័ទទាំងអស់ដែលបានរួមគ្នាកសាងសមិទ្ធផលនេះឡើង។ យើងផ្ដោតសំខាន់លើការកសាងវត្តអារាម សាលារៀន ផ្លូវថ្នល់ ដើម្បីអោយកូនចៅមានឱកាសរៀនសូត្រមានការងារធ្វើកុំឲ្យលំបាកដូចជំនាន់មុន។ ដូច្នេះការចូលរួម និងការកៀងគរសប្បុរសជន គឺសំខាន់ណាស់ បើមិនមានការខិតខំពីសំណាក់ព្រះសង្ឃ គណៈកម្មការអាចារ្យវត្ត ពុទ្ធបរិស័ទ និងការចូលរួមពីសប្បុរសជននោះទេ មិនមានការរីកចម្រើននោះឡើយ។ នេះជាការចែករំលែកប្រកបដោយទឹកចិត្ត លទ្ធភាព និងសុខសន្តិភាព។

តាមលោក ហ៊ុន ម៉ាណែត ជាមោទនភាពរបស់យើង មានតែសម័យតេជោទេ ដែលយើងមានសុខសន្តិភាព រួបរួមគ្នា ធ្វើឱ្យយើងសប្បាយ យើងមានមោទនភាពជាតិជាខ្មែរ យើងលែងចេញទៅណា គេមើលងាយជាអ្នកច្បាំងគ្នាឯងទៀតហើយ យើងក្លាយជាពូជអ្នកចម្បាំងការពារទឹកដីមិនឲ្យនរណាមកមើលងាយបានទេ យើងផ្សះផ្សាជាតិដោយខ្លួនឯង គ្មានបរទេសណាមកលូកដៃទេ។

UNTAC ប្រើថវិកាអស់រាប់ពាន់លាន មិនអាចស្វែងរកសុខសន្តិភាពពេញលេញនោះទេ ខ្មែរទើបតែទទួលបានសុខសន្តិភាពនៅឆ្នាំ១៩៩៨ ដោយសារយុទ្ធសាស្ត្រឈ្នះឈ្នះរបស់សម្តេចតេជោ ធ្វើឱ្យមានសុខសន្តិភាពក្នុងរយៈពេលជិត២០ឆ្នាំនេះហើយបានបញ្ចប់សង្គ្រាមរយៈពេលជាង៥០០ឆ្នាំ។ នៅក្នុងផ្លូវធម៌បញ្ជាក់ថា ភាពអំណត់ សច្ចធម៌ ការខិតខំធ្វើអំពើល្អ នឹងហើយគឺជាជោគជ័យ។

គណបក្សប្រជាជនកម្ពុជា បានទទួលជោគជ័យ បានបញ្ចប់សង្គ្រាមនៅក្នុងរយៈពេល២០ឆ្នាំនេះ ដោយមិនមានការសងសឹក យើងបានរំងាប់មិនឱ្យមានការសងសឹក បើយើងនៅតែសងសឹកគ្នា តើថ្ងៃណាយើងចប់។ មនុស្សដែលសម្ដេចតេជោ ហ៊ុន សែន ហៅមកធ្វើការជាមួយគ្នា រួមមានអតីតខ្មែរក្រហម ប៉ុន្តែសម្តេចមិនដែលចងពៀរនោះទេ គឺចូលមកធ្វើការជាមួយគ្នា គណបក្សណាក៏ដោយមកធ្វើការជាមួយគ្នា មិនរើសអើងនរណាទាំងអស់ នឹងហើយយើងធ្វើបុណ្យ យើងរួបរួមគ្នា យើងជោគជ័យ បានយើងមានសុខសន្តិភាព សុខសប្បាយមកដល់ថ្ងៃនេះ។

លោក ហ៊ុន ម៉ាណែត លើកឡើងទៀតថា ប្រជាពលរដ្ឋជាង៨៣ភាគរយបានទៅបោះឆ្នោត នេះបានន័យថាម៉េច? បានន័យថា ប្រជាពលរដ្ឋបានយល់អំពីតម្លៃនៃសិទ្ធិរបស់ខ្លួន ដើម្បីសេចក្តីសុខសន្តិភាព និងខ្លួនមានឱកាសបន្តជីវភាពរស់នៅបន្តទៅទៀត។ ប្រជាពលរដ្ឋមានការធុញទ្រាន់ណាស់ ពេលក្រោយបោះឆ្នោតម្ដងៗធ្វើអ្វីមិនចេញ បាតុកម្មប្រើហិង្សា ប៉ុន្តែសាររបស់ប្រជាពលរដ្ឋជាង៨៣ភាគរយ បីដូចជាការទះកំផ្លៀងគណបក្សប្រឆាំងនិងអ្នកនយោបាយមួយចំនួនដែលចង់បំផ្លាញសុខសន្តិភាព បំផ្លាញឆ្នាំងបាយរបស់ប្រជាពលរដ្ឋ៕