ការប្រកួតកីឡាបាល់បោះអន្តរជាតិពាណិជ្ជករចិននៅកម្ពុជាលើកទី៣ ដែលគេប្រសិទ្ធិនាមថា"ពានរង្វាន់វ៉ាងសាន" នឹងចាប់ផ្ដើមពីថ្ងៃទី០៤ ខែវិច្ឆិកា ឆ្នាំ២០១៨ ដល់ថ្ងៃទី ២៤ ខែកុម្ភៈ ឆ្នាំ២០១៩។
ក្នុងសន្និសីទកាសែតប្រកាសបើកការប្រកួតបាល់បោះអន្តរជាតិពាណិជ្ជករចិននៅកម្ពុជាលើកទី ៣ "ពានរង្វាន់វ៉ាងសាន" នៅសណ្ឋាគារហ៊ូង សាន នាព្រឹកថ្ងៃទី១៦ ខែតុលានេះ មានការចូលរួមពីលោកដួង មាសចំរើន តំណាងឯកឧត្តមអគ្គនាយកកីឡា នៃក្រសួងអប់រំយុវជននិងកីឡា លោក ឈិនឆាងជាំង ប្រធានសភាពាណិជ្ជកម្មចិន លោកលីវ វិន ប្រធានសភាពាណិជ្ជកម្មខេត្តអានហ៊ុយនិងលោក កៅ ហ្វុង អនុប្រធានអចិន្ត្រៃយ៍សភាពាណិជ្ជកម្មខេត្តហ្យើយ ប៉ីយ។
លោក ដួង មាសចំរើន បានថ្លែងអោយដឹងថា ព្រឹត្តិការណ៍ប្រកួតកីឡាបាល់បោះអន្តរជាតិពាណិជ្ជករចិននៅកម្ពុជាលើកទី3 "ពានរង្វាន់វ៉ាងសាន"នេះ រៀបចំឡើងដើម្បីអបអរសាទរខួបលើកទី៦០ឆ្នាំ នៃការបង្កើតចំណងមិត្តភាពកម្ពុជា-ចិន។ លោកបញ្ជាក់ថា ព្រឹត្តិការណ៍នេះជាការផ្ដួចផ្ដើមឡើងដោយសហព័ន្ធកីឡាបាល់បោះកម្ពុជា សហការជាមួយមជ្ឈមណ្ឌលផ្លាស់ប្ដូរវប្បធម៌កម្ពុជាចិន ដើម្បីអបអរសាទរខួបលើកទី 60 ឆ្នាំនៃការបង្កើតចំណងមិត្តភាពកម្ពុជាចិន ដែលក្នុងគោលបំណងដូចជាដើម្បីបំផុសសកម្មភាពកីឡាបាល់បោះដល់យុវជនចូលរួមគាំទ្រនិងលេងកីឡាបាល់បោះនេះ ដើម្បីសុខភាព។ ជាមួយគ្នានេះ ការបង្កើតព្រឹត្តិការណ៍ប្រកួតបាល់បោះអន្តរជាតិពាណិជ្ជករចិននៅកម្ពុជានេះ គឺជាការជួបជុំគ្នាមួយ រវាងកីឡាករបាល់បោះពាណិជ្ជករចិន និងខ្មែរយើង ដើម្បីបង្កើននូវសាមគ្គីភាពគ្នានិងបង្កើតទំនាក់ទំនងល្អនៅក្នុងសង្គម ហើយកាត់បន្ថយភាពអសកម្មផ្សេងៗនៅក្នុងសង្គម។លោកបានឲ្យដឹងទៀតថា កីឡាបានដើរតួនាទីយ៉ាងសំខាន់នៅក្នុងសង្គម ហេតុនេះការប្រកួតនេះក៏ដើម្បីបង្កើននូវចំណេះដឹងដល់មន្ត្រីអាជ្ញាកណ្ដាល លេខាតុប្រកួត និងគ្រូបង្វឹក បង្កើនបច្ចេកទេសនិងបទពិសោធន៍ដល់កីឡាករកម្ពុជាក្នុងការលរងជាមួយកីឡាករបរទេស។
បើតាមការឲ្យដឹងពីលោក កៅ កាន់ណាលី អគ្គលេខាធិការសហព័ន្ធកីឡាបាល់បោះកម្ពុជាថា ចំពោះរង្វាន់ដែលនឹងទទួលបានពីព្រឹត្តិការណ៍ប្រកួតបាល់បោះអន្តរជាតិពាណិជ្ជករចិននៅកម្ពុជាលើកទី 3 "ពានរង្វាន់វ៉ាងសាន"នេះ ក្រុមកីឡាបាល់បោះណាដែលបានទទួលចំណាត់ថ្នាក់លេខ ១ ត្រូវទទួលបានពាន១ មេដាយមាសចំនួន 15 គ្រឿងនិងអមជាមួយទឹកប្រាក់ចំនួន 3000 ដុល្លារក្រុមចំណាត់ថ្នាក់លេខ 2 ទទួលបានមេដាយប្រាក់ 15 គ្រឿងនិងអមជាមួយទឹកប្រាក់ចំនួន 1500 ដុល្លារ ចំណាត់ថ្នាក់លេខ 3 ទទួលបានមេដាយមាសចំនួន 15 គ្រឿង និងអមជាមួយទឹកប្រាក់ចំនួន 1.000 ដុល្លារ ហើយចំណាត់ថ្នាក់លេខ 4 ទទួលបានទឹកប្រាក់ 500 ដុល្លារ។ឯលក្ខខណ្ឌនៃការប្រកួតគឺក្រុមណាដែលឈ្នះទទួលបាន២ពិន្ទុ ក្រុមដែលចាញ់ទទួលបាន 1 ពិន្ទុ ស្មើបន្ថែមម៉ោង ៥នាទីម្តង រហូតដល់ពិន្ទុខុសគ្នា។
លោកកៅកាន់ណាលី ឲ្យដឹងទៀតថា ការប្រកួតមួយរដូវកាលនេះ មានក្រុមចូលរួមប្រកួតចំនួន10 ក្រុម ហើយសរុបការប្រកួតទាំងអស់មានចំនួន 53 ប្រកួត ដោយចាប់ផ្តើមប្រកួតពីថ្ងៃទី០៤ខែវិច្ឆិកាខាងមុខនេះតទៅ រៀងរាល់ព្រឹកថ្ងៃអាទិត្យ នៅក្នុងវិមានពហុកីឡដ្ឋានជាតិអូឡាំពិក ។
គួរបញ្ជាក់ថា នេះជាលើកទី ៣ ហើយ ដែលបើកឲ្យមានព្រឹត្តិការណ៍ប្រកួតកីឡាបាល់បោះបែបនេះ ដែលលើកទី១រៀបចំធ្វើនៅឆ្នាំ២០១៣ មាន៨ក្រុមចូលរួម និងលើកទី២ឆ្នាំ២០១៥ មាន១០ក្រុមចូលរួម ។
ព្រឹត្តិការណ៍នៃការប្រកួតកីឡាបាល់បោះអន្តរជាតិពាណិជ្ជករចិននៅកម្ពុជាលើកទី 3 ដែលគេប្រសិទ្ធិនាមថា"ពានរង្វាន់វ៉ាងសាន"នេះ បានទទួលការជួយឧបត្ថម្ភពីសភាពាណិជ្ជកម្មអានហ៊ួយ នូវទឹកប្រាក់ចំនួន២០.០០០ដុល្លារ សម្រាប់បម្រើការរៀបចំការប្រកួតនេះ៕
Source: Kampuchea Thmey Daily
0 Comments