មន្ត្រី​ជាន់​ខ្ពស់​គណបក្ស​ប្រជាជន​កម្ពុជា​ថា ការ​អនុញ្ញាត​ឲ្យ​ទណ្ឌិត​សម រង្សី ចូល​ប្រជុំ​នៅក្នុង​វេទិកា IPU ជា​ការ​រំលោភសិទ្ធិ​ប្រជាធិបតេយ្យ​របស់​កម្ពុជា

ភ្នំពេញ ​៖ ​អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន បាន​អះអាងថា ទណ្ឌិត សម រង្សី គ្មាន​តួនាទី​សូម្បី​បន្តិចបន្តួច ក្នុងការ​ចូលប្រជុំ​នៅលើ​វេទិកា​នានា​ជា​ថ្នាក់​អន្តរជាតិ ពីព្រោះ​មិនមែន​ជា​តំណាង​ប្រជាជន​កម្ពុជា​ឡើយ ដូច្នេះ​ការដែល​មាន​អ្នក​អនុញ្ញាត​​ឲ្យ​ទណ្ឌិត សម រង្សី ចូល​ប្រជុំ IPU គឺជា​ការរំលោភ​សិទ្ធិ​ប្រជាធិបតេយ្យ​របស់​ប្រជាជន​កម្ពុជា និង​ជា​ការ​បំពាន​លើ​ឯករាជ្យ និង​អធិបតេយ្យភាព​ជាតិ​កម្ពុ​ជា ព្រមទាំង​រំលោភច្បាប់​អន្តរជាតិ​ផង។

លោក សុខ ឥសាន បាន​ថ្លែង​បែបនេះ កាលពី​ថ្ងៃទី​១៦ ខែតុលា ឆ្នាំ​២០១៨។ លោក​បញ្ជាក់ថា រហូតមកដល់​ពេលនេះ ទណ្ឌិត សម រង្សី គ្មាន​តួនាទី​អ្វី​សូម្បី​បន្តិច ក្នុងការ​ចូលប្រជុំ​នៅលើ​វេទិកា​នានា​ជា​ថ្នាក់​អន្តរជាតិ ពីព្រោះ​ទណ្ឌិត សម រង្សី មិនមែន​ជា​តំណាង​ប្រជាជន​កម្ពុជា​ឡើយ។ ទណ្ឌិត សម រង្សី គ្រាន់តែ​ជា​ជន​ក្បត់​ជាតិខ្មែរ និង​ជា​ជនពនេចរ គ្មាន​ស្រុកទេស និង​ជា​អាយ៉ង​ដាច់​ថ្លៃ​របស់​ពួក​បរទេស​ចក្រព័ត្រ​អនត្តរភាព​និយអន្តរជាតិ​តែប៉ុណ្ណោះ​។ “​ដូច្នេះ​ការដែល​មាន​អ្នក​អនុញ្ញាត​ឲ្យ​ទណ្ឌិត​សម រង្សី ចូលប្រជុំ​នៅក្នុង​វេទិកា IPU. គឺជា​ការរំលោភ​សិទ្ធិ​ប្រជាធិបតេយ្យ​របស់​ប្រជាជន​កម្ពុជា និង​គឺជា​ការបំពាន​លើ​ឯករាជ្យ និង​អធិបតេយ្យភាព​ជាតិ​កម្ពុ​ជា​យ៉ាង​ងងើល ព្រមទាំង​រំលោភច្បាប់​អន្តរជាតិ ដែល​ប្រធាន​ប្រជុំ IPU. ត្រូវ​ទទួលខុសត្រូវ​ទាំងស្រុង​លើ​តួនាទី​លំអៀង​នយោបាយ​របស់ខ្លួន ដោយ​គ្មាន​ការ​ខ្មាសអៀន​”​។

លោក សុខ ឥសាន អះអាងថា “​គណបក្ស​ប្រជាជន​កម្ពុជា សូម​គាំទ្រ​យ៉ាង​ពេញទំហឹង​ចំពោះ​ការតវ៉ា​ដ៏​ម៉ឺងម៉ាត់​របស់​គណៈប្រតិភូ​សភា​កម្ពុជា ដែល​បាន​ទៅ​ចូលរួម​ប្រជុំ​ជា​ផ្លូវការ​ក្នុង​អង្គប្រជុំ IPU ក្នុងនាម​ជា​តំណាង​ស្របច្បាប់​របស់​ប្រជាជន​កម្ពុជា ហើយ​សូម​ថ្កោលទោស​យ៉ាង​ដាច់អហង្ការ​ចំពោះ​អាកប្បកិរិយា​ល្មើសច្បាប់​របស់​ជន​លំអៀង​ខាង​នយោបាយ និង​មនោគមន៍​វិជ្ជា​អន្តរជាតិ​”​។​

សូមបញ្ជាក់ថា លោក សម រង្ស៊ី អតីត​មេដឹកនាំ​គណបក្សប្រឆាំង​នៅ​កម្ពុជា ដែល​កំពុង​រស់នៅ​ក្រៅប្រទេស ត្រូវបាន​អញ្ជើញ​ឲ្យ​ចូលរួម​កិច្ចប្រជុំ​មហាសន្និបាត​សហភាព​អន្តរ​សភា (IPU) នៅក្នុង​ទីក្រុង​ហ្ស៊ី​ណែវ ប្រទេស​ស្វី​ស​ដែរ នេះ​បើ​តាម​ការបញ្ជាក់​ពី​មនុស្ស​ជំនិត​លោក សម រង្ស៊ី ម្នាក់​ឈ្មោះ ប៊ុត ធា​រី ហើយ​បើតាម​ប្រភព​នេះ​បញ្ជាក់ថា លោក សម រង្ស៊ី បានចេញ​ដំណើរ​ទៅ​ប្រជុំ​សហភាព​អន្តរ​សភាពេញអង្គ (IPU) លើក​ទី​១៣៩ ចាប់ពី​ថ្ងៃទី​១៤ ដល់​ថ្ងៃទី​១៨ ខែតុលា នេះ នៅ​ប្រទេស​ស្វី​ស ទីក្រុង​ហ្សឺ​ណែវ​។​
​អ្វីដែល​គួរ​ឲ្យ​ភ្ញាក់ផ្អើល​ជាទីបំផុត​នោះ គឺ​លោក សម រង្ស៊ី មាន​កិត្តិយស ត្រូវបាន​ប្រធាន IPU អញ្ជើញ​ឲ្យ​លោក​ឡើង​ថ្លែង​សន្ទរកថា នៅ​ថ្ងៃទី​១៨ ខែតុលា ឆ្នាំ​២០១៨ នៅ​ចំពោះមុខ​គណៈប្រតិភូ​អន្តរជាតិ​រាប់រយ​នាក់ ហើយ​ការចូលរួម​ប្រជុំ​របស់​អតីត​មេបក្ស​ប្រឆាំង​រូបនេះ ស្រប​ពេលដែល​គណៈប្រតិភូ​សភា​កម្ពុជា ដែល​ដឹកនាំ​ដោយ​លោកស្រី ឃួន សុ​ដា​រី អនុប្រធាន​ទី​២​រដ្ឋសភា ក៏បាន​ចូលរួម​ប្រជុំ​នៅ​ទីនោះ​ផងដែរ​។​
​
សូមជម្រាបថា គណៈប្រតិភូ​សភា​កម្ពុជា ដឹកនាំ​ដោយ​លោកស្រី ឃួន សុ​ដា​រី អនុប្រធាន​ទី​២ នៃ​រដ្ឋសភា បាន​អញ្ជើញ​ទៅ​ចូលរួម​កិច្ចប្រជុំ​ក្រុមប្រឹក្សាភិបាល​លើក​ទី​២០៣ និង​មហាសន្និបាត​លើក​ទី​១៣៩ ដែលមាន​សមាជិក​ចូលរួម​ចំនួន​១៣៥​ប្រទេស មាន​ប្រធាន​សភា​ចំនួន​៥០ និង​អនុ​ប្រធានសភា​ចំនួន​៤០ រួមទាំង​សមាជិក សមាជិកា សភា​ចំនួន​៧០០​នាក់ ក្នុងនាម​ជា​សមាជិកសភា​វ័យក្មេង​ចំនួន​២០​ភាគរយ និង​៣៣​ភាគរយ សមាជិកសភា​ជា​ស្ត្រី។

កិច្ចប្រជុំ​ក្រុមប្រឹក្សាភិបាល​លើក​ទី​២០៣ ផ្តោត​ទៅលើ​ការពិនិត្យ​សមាជិកភាព ពិនិត្យ​ស្ថានភាព​ហិរញ្ញវត្ថុ របាយការណ៍​អំពី​សកម្មភាព​ប្រធាន និង​អគ្គលេខាធិការ IPU ដែល​បានសម្រេច​រយៈពេល​១​ឆ្នាំ​របស់​អង្គការ​នេះ របាយការណ៍​នៃ​កិច្ចប្រជុំ​ដែល IPU បាន​រៀបចំ​អំពី​ផែនការ​យុទ្ធសាស្ត្រ IPU ២០១៧-២០២១ អំពី​ការរៀបចំ​កិច្ចប្រជុំ​នា​ពេល​ខាង​មុខ​ជាដើម​៕

 


​

Source: Kampuchea Thmey Daily