ភ្នំពេញ ៖ បុរសម្នាក់ ខណៈកំពុងតែបើកបរសុខៗស្រាប់តែងងុយដេកងោកមួយភាំងក៏រេចង្កូតទៅបុកក្បាលនាគពុះចែកទ្រូងផ្លូវ ហោះជាប់បើកចេញទៅណាលេងរួចតែសំណាងល្អក្នុងរថយន្តនោះមិនមានអ្នកគ្រោះថ្នាក់នោះទេ។
ហេតុការណ៍គ្រោះថ្នាក់ចរាចរណ៍នេះ កើតឡើងកាលពីវេលាម៉ោង៤ទៀបភ្លឺ ថ្ងៃទី២៩ ខែកញ្ញា ឆ្នាំ២០១៨ ស្ថិតនៅចំណុចមុខស្តុបក្តាន់ពីរ តាមបណ្តោយផ្លូវសហព័ន្ធរុស្ស៊ី ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
បន្ទាប់ពីបង្កហេតុការណ៍ដូច្នេះហើយបុរសដែលជាម្ចាស់រថយន្តបង្កគាត់បានឲ្យដឹងថាមុនពេលកើតហេតុ គាត់បានបើករថយន្តកូរ៉ូឡាមួយគ្រឿង ពណ៌ទឹកប្រាក់ ពាក់ស្លាកលេខ ភ្នំពេញ 2AF-1046 ដោយដឹកស្ត្រីជាភ្ញៀវម្នាក់ ធ្វើដំណើរទិសដៅពីកើតទៅលិចលុះធ្វើដំណើរមកដល់ចំណុចកើតខាងលើ ដោយសាររូបគាត់បានងងុយដេក(ងោកមួយភាំង)ក៏រេចង្កូតមកខាងឆ្វេងដៃ ជ្រុលឡើងទៅជិះលើក្បាលនាគពុះចែកទ្រូងផ្លូវធ្វើប្រងើយតែម្ដង។តែចំណែកក្បាលនាគមិនមានការខូចខាតនោះទេ គឺខូចខាតតែរថយន្តខ្លួនឯង ផ្នែកខាងមុខយ៉ាងដំណំ។ ចំណែកម្ចាស់រថយន្តបង្ករងរបួសស្រាល ត្រូវបានសមត្ថកិច្ចមូលដ្ឋាន ឃាត់ខ្លួននៅនឹងកន្លែងផងដែរ។
ប្រភពព័ត៌មាននៅកន្លែងកើតហេតុបានឲ្យដឹងថា ក្រោយពេលកើតហេតុ សមត្ថកិច្ចមូលដ្ឋាន បានប្រគល់ម្ចាស់រថយន្តបង្កឲ្យទៅសមត្ថកិច្ចជំនាញ ហើយធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោក រាជធានីភ្នំពេញ រង់ចាំដោះស្រាយគ្នាទៅតាមនីតិវិធីផងដែរ៕
Source: Kampuchea Thmey Daily
0 Comments