កម្មវិធីប្រកួតពានរង្វាន់ជើងឯកលីគកំពូលកម្ពុជា (Metfone Cambodian League) នឹងចាប់ផ្តើមប្រកួតពីពាក់កណ្ដាលខែមីនា នេះតទៅ ស្របពេលប្រធានក្រុមរបស់ក្លិបភ្នំពេញក្រោន គឺកីឡាករ អ៊ុក សុធី បានសម្លឹងឃើញពីចំណុចចំណុចខ្លាំងរបស់កូនក្រុមក្រោយពេលហ្វឹកហាត់រួមគ្នាមួយរយៈធំក្រោមការបង្ហាត់ពីគ្រូបង្វឹកថ្មី។
កីឡាករដែលមានរហស្សនាម Messi បានលើកឡើងថា៖«ក្រុមរបស់យើងមានការរៀបចំល្អច្រើនជាងឆ្នាំមុនៗ ដោយយើងបានធ្វើការបោះជំរុំនៅប្រទេសថៃ វាធ្វើឲ្យយើងមានការត្រៀមខ្លួនល្អច្រើន ហើយចំពោះការហ្វឹកហាត់ជាមួយមិត្តរួមក្រុមវិញ ខ្ញុំសង្កេតឃើញថាពួកយើងមានការសហការគ្នាបានល្អជាពិសេសគឺមួយរយៈចុងក្រោយនេះ ហើយយើងក៏មានប្រកួតច្រើនផងដែរ។ ដូច្នេះម្នាក់ៗក្នុងក្រុមក៏មានការខំប្រឹងខ្លាំងដែរ»។
ខ្សែបម្រើកណ្តាលរូបនេះបានបន្ថែមទៀតថា ៖ « សម្រាប់ការរំពឹងទុករបស់ខ្ញុំគឺខ្ញុំសង្ឃឹមថាពួកយើងនឹងធ្វើការជាក្រុមបានល្អ ហើយអាចទទួលបានលទ្ធផលល្អទាំងពានរង្វាន់លីគកំពូលកម្ពុជា និងពានរង្វាន់សម្តេចហ៊ុន សែន។ ខ្ញុំសូមសំណូមពរដល់អ្នកគាំទ្រក្លិបភ្នំពេញក្រោន ចូលរួមទស្សនាការប្រកួតរបស់យើងទាំងនៅកីឡដ្ឋាន RSN និងក្រៅទឹកដីឲ្យបានច្រើន អ្នកទាំងអស់គ្នាជាកម្លាំងចិត្តដ៏សំខាន់សម្រាប់យើង»។សម្រាប់ប្រកួតបើករដូវកាលថ្មីឆ្នាំ២០១៩ ខាងមុខនេះក្រុមភ្នំពេញក្រោន ត្រូវបើកទ្វាកីឡដ្ឋាន RSN Stadium របស់ខ្លួនទទួលស្វាគមន៍ក្រុមបាល់ទាត់បឹងកេតអែហ្វស៊ី នៅវេលាម៉ោង៦ល្ងាចថ្ងៃសៅរ៍ ទី១៦ ខែមីនា ឆ្នាំ២០១៩។
កីឡាករ អ៊ុក សុធី គឺជាកីឡាករជើងចាស់មួយរូបក្នុងក្រុម ដែលបានចូលរួមជាមួយក្លិបតាំងពីខែវិច្ឆិកា ឆ្នាំ២០១១ កន្លងទៅ ព្រមទាំងធ្លាប់បានជួយក្រុមឱ្យបានឈ្នះពានលីគកំពូលកម្ពុជា នាឆ្នាំ២០១៤ ប៉ុន្តែបានអវត្តមាននាឆ្នាំ២០១៥ បន្ទាប់ពីរងរបួសក្នុងពេលហ្វឹកហាត់ជាមួយក្រុមជម្រើសជាតិរួចមក។
សូមបញ្ជាក់ថា កីឡាករដែលអ្នកគាំទ្រនិយមហៅថាMessi រូបនេះតាំងតែពីពេលដែលគេប្រកបអាជីពបាល់ទាត់ក្នុងក្រុមបាល់ទាត់ម៉ូតូហោះ (ក្រុមមិនអាជីព) និងក្រុមហ្វូតសាលជម្រើសជាតិកម្ពុជា នាអំឡុងពេលយុវវ័យមកម្ល៉េះ៕
Source: Kampuchea Thmey Daily
0 Comments