សហព័ន្ធកីឡាបាល់ទាត់កម្ពុជា (ស.ប.ក) បានសម្រេចបញ្ជូនក្រុមបាល់ទាត់ជម្រើសជាតិនារីកម្ពុជា អាយុក្រោមអាយុ១៥ឆ្នាំ (U15) ទៅចូលរួមប្រកួតក្នុងកម្មវិធីពានរង្វាន់អន្តរជាតិ UEFA-FAS U15′ Girls’ Tournament 2019 នៅប្រទេសសិង្ហបុរី ខណៈក្រុមនេះដឹកនាំដោយលោក អ៊ុំ សាវង្ស គ្រូជំនួយនៅក្លិបក្រសួងការពារជាតិ។
យោងតាមការបញ្ជាក់ពីវិបសាយផ្លូវការរបស់សហព័ន្ធកីឡាបាល់ទាត់សឹង្ហបុរី ( FAS) បានលើកឡើងថា ពានរង្វាន់អន្តរជាតិ UEFA-FAS U15′ Girls’ Tournament 2019 នឹងចាប់ពីថ្ងៃទី១៧ដល់២១ ខែមីនា ឆ្នាំ២០១៩ នៅលើទីលានកីឡដ្ឋាន Our Tampines Hubប្រទេស សិង្ហបុរី ស្របពេលពានរង្វាន់នេះដែរនឹងមានក្រុមមកពីតំណាងប្រទេសចំនួន៤គឺ កម្ពុជា ម៉ុលដូវ៉ា ហ្គាម និងម្ចាស់ផ្ទះសិង្ហបុរី។
ពានរង្វាន់បាល់ទាត់នេះដែរគឺជាផ្នែកមួយនៃ UEFA ASSIST ដែលបង្កើតឡើងដោយសហព័ន្ធកីឡាបាល់ទាត់សិង្ហបុរី តាំងពីឆ្នាំ ២០១៧ មកម្ល៉េះ ក្នុងគោលដៅដើម្បីពង្រឹងសមត្ថភាព បច្ចេកទេស ដល់កីឡាករយុវជនទាំងផ្នែកបុរស និងនារី។ សម្រាប់ក្រុមបាល់ទាត់សិង្ហបុរី បានកំណត់កាលបរិច្ឆេទនៃការប្រកួតនេះគឺដើម្បីសម្រាប់ជាការត្រៀមខ្លួនរបស់ក្រុម U15នារី របស់ខ្លួនចូលរួមប្រកួតក្នុងពានរង្វាន់ជើងឯកតំបន់អាស៊ាន AFF Under-15 Girls Championship។
រូបមន្តនៃការប្រកួតនេះគឺតម្រូវឱ្យក្រុមទាំង៤ប៉ះគ្នាដើម្បីសន្សំពិន្ទុ ហើយក្រុមណាទទួលបានពិន្ទុច្រើនជាងគេក្រុមនោះនឹងឈ្នះជើងឯកតែម្តង។ ចំណែកកាលវិភាគនៃការប្រកួតនោះគឺនៅថ្ងៃទី ១៧ មីនា ក្រុមកម្ពុជាត្រូវប៉ះក្រុមម៉ុលដូវ៉ា ហើយក្រុមម្ចាស់ផ្ទះសិង្ហបុរី ជួបក្រុមហ្គាម ហើយថ្ងៃទី២ គឺនៅថ្ងៃទី១៩ ខែមីនា ឆ្នាំ២០១៩ ក្រុមហ្គាម ប៉ះក្រុមម៉ុលដូវ៉ា ហើយក្រុមកម្ពុជា ជួបក្រុមសិង្ហបុរី។ ចុងក្រោយនៅថ្ងៃទី២១ ខែមីនា ឆ្នាំ២០១៩ ក្រុមកម្ពុជា ជួបក្រុមហ្គាម ហើយក្រុមសឹង្ហបុរី ប៉ះក្រុមម៉ុលដូវ៉ា៕
Source: Kampuchea Thmey Daily
0 Comments