យោងតាមការបញ្ជាក់របស់សហព័ន្ធកីឡាបាល់ទាត់តំបន់អាស៊ីភាគអាគ្នេយ៍ (អាស៊ាន) ASEAN Football Federation បានបញ្ជាក់ថា សហព័ន្ធកីឡាបាល់ទាត់កម្ពុជា (ស.ប.ក) នឹងទទួលសិទ្ធិធ្វើជាម្ចាស់ផ្ទះរៀបចំមហាសន្និបាតប្រចាំឆ្នាំ នៅចុងសប្ដាហ៍នេះ ខណៈដែរមានតំណាងប្រទេសចំនួន ១២ជាសមាជិកនឹងមកចូលរួម។
ប្រភពបានបញ្ជាក់ថា មហាសន្និបាតបាល់ទាត់អាស៊ីអាគ្នេយ៍ ប្រចាំឆ្នាំ២០១៩នេះ គ្រោងនឹងធ្វើឡើងនៅថ្ងៃអាទិត្យ ទី១៧ ខែមីនា ឆ្នាំ២០១៩ នៅសណ្ឋាគារមួយក្នុងទីរួមខេត្តសៀមរាប ស្របពេលដែលប្រធានកីឡាបាល់ទាត់ប្រចាំប្រទេសជាសមាជិកអាស៊ីអាគ្នេយ៍ ទាំង១២ ដែលចូលរួមមានដូចជា អូស្ត្រាលី, ព្រុយណេ, កម្ពុជា, ឥណ្ឌូនេស៊ី, ឡាវ, ម៉ាឡេស៊ី, មីយ៉ាន់ម៉ា, ហ្វីលីពីន, សិង្ហបុរី, ថៃ, ទីម័រខាងកើត និងវៀតណាម។
នៅក្នុងមហាសន្និបាត នេះនឹងធ្វើឡើងរយៈពេលតែ ១ថ្ងៃប៉ុណ្ណោះ ខណៈសមាជិកទាំងមូលនឹងអនុម័តលើសេចក្ដីសម្រេចផ្សេងៗ ជាពិសេសគឺការបោះឆ្នោតជ្រើសរើសប្រធានថ្មី សម្រាប់អាណត្តិ ៥ឆ្នាំបន្តទៀត។ ជាទូទៅមហាសន្និបាតប្រចាំឆ្នាំ របស់សហព័ន្ធកីឡាបាល់ទាត់ប្រចាំតំបន់អាស៊ីអាគ្នេយ៍ នេះគឺធ្វើឡើងជារៀងរាល់ឆ្នាំ ហើយនៅឆ្នាំ២០១៩នេះ គឺជាអាណត្តិចុងក្រោយពោលគឺចាប់ពីឆ្នាំ ២០១៥–២០១៩។
នេះជាចំណុះវិជ្ជមានមួយរបស់កម្ពុជា នៅពេលដែលទទួលសិទ្ធិក្នុងការទទួលធ្វើម្ចាស់ផ្ទះក្នុងមហាសន្និបាតប្រចាំឆ្នាំរបស់ស្ថាប័នអាស៊ានមួយនេះ ស្របពេលដែលនៅមិនសល់ប៉ុន្មានឆ្នាំទៀតកម្ពុជា នឹងទទួលធ្វើជាម្ចាស់ផ្ទះក្នុងព្រឹត្តិការណ៍កីឡាស៊ីហ្គេមឆ្នាំ២០២៣ ខាងមុខ ហើយពេលនោះគឺកម្ពុជា ត្រូវការរៀបចំរបៀបរៀបរយមិនឱ្យមានខ្វះចន្លោះនោះទេដើម្បីទទួលក្រុមភ្ញៀវ៕
Source: Kampuchea Thmey Daily
0 Comments