ឃួន ឡា​បូ​រ៉ាវី បង្ហាញខ្លួន​លើកដំបូង ខណៈ​ក្លិប​ថ្មី​នៅ​លី​គ​លំដាប់​ទី​៣​របស់​ប្រទេស​ថៃ រង​បរាជ័យ​នៅក្រៅ​ទឹកដី

កីឡាករ ឃួន ឡា​បូ​រ៉ាវី សមាជិក​ក្នុង​ក្រុម​ជម្រើសជាតិ​កម្ពុជា បានសម្រេច​ចិត្ត​ផ្ទេរ​ទៅ​បន្ត​អាជីព​នៅក្នុង​ជើង​ទី​២ នៃ​ពានរង្វាន់​លី​គ​លំដាប់​ទី​៣ របស់​ប្រទេស​ថៃ កាលពីពេល​ថ្មីៗ ដោយ​ចូលរួម​ជាមួយ​ក្លិប Surat Thani FC ខណៈ​ការ​បង្ហាញខ្លួន​លើកដំបូង​របស់គេ​កាលពី​ចុង​សប្ដាហ៍​កន្លងទៅ​ស្របពេល​នឹង​ក្រុម​រង​បរាជ័យ​នៅក្រៅ​ទឹកដី​។

ក្លិប​ថ្មី​របស់​កីឡាករ​មានកំណើត​នៅ​ខេត្តកំពង់ចាម នេះ​មាន​មូលដ្ឋាន​នៅ​ខេត្ត​Surat Thani ភាគខាងត្បូង​ប្រទេស​ថៃ​។ លោក Monthien Morrakot​ បាន​ដាក់​ឲ្យ ឃួន បូរ៉ា​វី បង្ហាញខ្លួន​ពេញ​ប្រកួត​តែម្តង​ពេល​ក្រុម Turat Thani ចាញ់​ម្ចាស់ផ្ទះ​Customs United៤​ទល់​១ នៅ​ល្ងាច​ថ្ងៃអាទិត្យ ទី​១០ ខែមិថុនា ឆ្នាំ ២០១៨ ថ្មីៗ​នេះ​លើ​ទីលាន​កីឡដ្ឋាន​Lat Krabang 54 Stadium ក្នុង​រាជធានី​បាងកក​។

នៅ​លី​គ​របស់​ប្រទេស​ថៃ បាន​តម្រូវ​ឲ្យ​ក្លិប​ជា​សមាជិក​របស់ខ្លួន​ចុះបញ្ជី​កីឡាករ​បរទេស​បាន​ចំនួន​៥​នាក់ ​ដោយ​ក្នុង​នោះ​មាន​កីឡាករ​បរទេស​មិន​គិត​ជាតិ​សាសន៍​ចំនួន​៣​នាក់ កីឡាករ​ជា​ជនជាតិ​ក្នុង​ទ្វីបអាស៊ី​ម្នាក់ និង​កីឡាករ​ក្នុង​តំបន់​អាស៊ាន​ម្នាក់​។ ក្លិប Turat Thani វិញ​បាន​ចុះបញ្ជី​កីឡាករ​ពេញ​ហើយ​មាន​កីឡាករ​ប្រេ​ស៊ី​ល Vinicius Silva Freitas កីឡាករ​កូ​ឌី​វ័រ Soumahoro Mafa​កីឡាករ​កូ​ឌី​វ័រ Kourouma Mohamed កីឡាករ​អ៊ីរ៉ង់ Faramarz Vahdat Derakhshan និង ឃួន ឡា​បូ​រ៉ាវី របស់​កម្ពុជា​។

គិត​ត្រឹម​សប្ដាហ៍​ទី​១៤ មកនេះ​ក្រុម Turat Thani កំពុង​ឈរ​ចំណាត់ថ្នាក់​លេខ​៨​បណ្តោះអាសន្ន​ក្នុងចំណោម​សមាជិក​ទាំង​១៤ ប្រចាំ​មណ្ឌល​ជាមួយគ្នា ក្រោយ​ប្រកួត​ឈ្នះ​៤​លើក ស្មើគ្នា​៥​លើក និង​ចាញ់​៥​លើក មាន​១៧​ពិន្ទុ​។ ក្រុម​កំពូល​តារាង​ប្រចាំ​លី​គ​ទី​៣​ថៃ​នេះ​មានឈ្មោះ​ឡើងទៅ​កាន់​លី​គ​លំដាប់​ទី​២ ខណៈ​ក្រុម​លេខ​២​មានឈ្មោះ​ប្រកួត​ជម្រុះ​ជាមួយ​ក្រុម​នៅ​មណ្ឌល​ផ្សេងទៀត ខណៈ​ក្រុម​នៅបាន​តារាង​ត្រូវ​ធ្លាក់​ទៅលេង​នៅ​លី​គ​លំដាប់​ទី​៤​។​

សម្រាប់​ប្រកួត​បន្ទាប់​ក្នុង​សប្ដាហ៍​ទី​១៥ ក្រុម Surat Thuni ត្រូវ​ប៉ះ​ក្រុម​លេខ​២​កំពូល​តារាង Nara United នៅវេលា​ម៉ោង​៤​ល្ងាច​ថ្ងៃ​សៅរ៍ ទី​១៦ ខែមិថុនា ឆ្នាំ​២០១៨ លើ​ទីលាន​កីឡដ្ឋាន Surat Thani Stadium របស់ខ្លួន​៕

Source: Kampuchea Thmey Daily