សម្តេចតេជោហ៊ុន សែន ៖ តំណាងស្របច្បាប់របស់កម្ពុជា អង្គុយប្រជុំជាមួយប្រមុខរដ្ឋ ប្រមុខរដ្ឋាភិបាលនៃប្រទេសនានា
ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍ថា «សម្តេចជាតំណាងស្របច្បាប់របស់ប្រទេសកម្ពុជា ដូចនេះសម្តេចត្រូវអង្គុយប្រជុំជាមួយប្រ មុខរដ្ឋ ប្រមុខរដ្ឋាភិបាល នៃប្រទេសនានា ចំណែកតំណាងមួយទៀតនៅតាមចិញ្ចើមផ្លូវ ដូចនេះជារឿងរបស់គេ... » សម្តេចតេជោនាយករដ្ឋមន្ត្រីបានថ្លែងបែបនេះនៅក្នុងពិធីសំណេះសំណាលជាមួយបងប្អូន ខ្មែរដែលរស់នៅប្រទេសប៊ែលហ្ស៊ិក នាថ្ងៃទី១៧ ខែតុលានេះ។
នៅក្នុងសណ្ឋាគារដែលសម្តេចតេជោស្នាក់នៅ ក្នុងទីក្រុងប្រ៊ុចសែល ប្រទេសប៊ែលហ្ស៊ិក មានបងប្អូនប្រជាជនខ្មែរជាច្រើនបានឈររង់ចាំទទួលការអញ្ជើញដល់របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ។ នៅទីនោះបងប្អូនខ្លះបានងើបតាំងពីម៉ោង ៤ ទៀបភ្លឺថ្ងៃទី ១៧ តុលា ធ្វើដំណើរមកចាំទទួលសម្តេច។ បងប្អូននៅទីនោះបានបញ្ជាក់ថា សម្តេចគឺជាវីរជនរបស់កម្ពុជា ដែលពួកគេត្រូវតែហ៊ានលះបង់ពេលវេលា និង ការងារមកទទួលសម្តេច ដើម្បីលើកកិត្តិយសជាតិ។
នៅក្នុងចំណោមបងប្អូនខ្មែរទាំងអស់មានលោកពូម្នាក់បានថ្លែងដោយសុទ្ធចិត្តទោះបីជាត្រូវលះបង់ការងារមួយថ្ងៃក៏ត្រូវតែលះបង់ដែរ ដើម្បីមកទទួលសម្តេចតេជោ ហ៊ុន សែន ព្រោះសម្តេចជាវីរបុរសតំណាងឲ្យប្រទេសកម្ពុជា ហើយក៏ដើម្បីលើកកិត្តិយសជាតិរបស់យើង។
គួរបញ្ជាក់ថា សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងគណៈប្រតិភូជាន់ខ្ពស់រាជរដ្ឋាភិបាលកម្ពុជាបានអញ្ជើញទៅដល់ទីក្រុងប្រ៊ុចសែលប្រទេសប៊ែលហ្ស៊ិកប្រកបដោយសុវត្ថិភាពហើយកាលពីវេលាម៉ោង៧និង៤០នាទីម៉ោងនៅទីក្រុងប្រ៊ុចសែលប្រទេសប៊ែលហ្ស៊ិកត្រូវនឹងម៉ោង១២និង៤០នាទីម៉ោងនៅរាជធានីភ្នំពេញព្រះរាជាណាចក្រកម្ពុជាព្រឹកថ្ងៃទី១៧តុលា ដើម្បីអញ្ជើញចូលរួមកិច្ចប្រជុំកំពូលអាស៊ីអឺរ៉ុបលើកទី១២ ដែលនិងចាប់ផ្តើមនៅថ្ងៃទី១៨-១៩តុលា។
នៅអាកាសយានដ្ឋានអន្តរជាតិ (Execujet) ទីក្រុងប្រ៊ុចសែល វត្តមាននៃការអញ្ជើញដល់របស់សម្តេចតេជោនាយករដ្ឋមន្ត្រី ហ៊ុន សែន និងគណៈប្រតិភូជាន់ខ្ពស់រាជរដ្ឋាភិបាលកម្ពុជាត្រូវបានការធ្វើគារវកិច្ចស្វាគមន៍យ៉ាងកក់ក្តៅបំផុតពីលោកលោកស្រីឥស្សរជនជាន់ខ្ពស់រដ្ឋាភិបាលប៊ែលហ្ស៊ិកនិងឥស្សរជនការទូតរបស់ព្រះរាជាណាចក្រកម្ពុជាប្រចាំប្រទេសប៊ែលហ្ស៊ិកជាច្រើនរូប។
សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានដឹកនាំគណៈប្រតិភូជាន់ខ្ពស់នៃរាជរដ្ឋាភិបាលកម្ពុជាចាកចេញពីប្រទសកម្ពុជានៅម៉ោងជាង១២និង២០ រំលងអធ្រាត្រថ្ងៃទី ១៦ ឈានចូលថ្ងៃទី១៧ ខែតុលា ឆ្នាំ២០១៨។ ការអញ្ជើញទៅកាន់ប្រទេសប៊ែលហ្ស៊ិកនាពេលនេះដើម្បីចូលរួមកិច្ចប្រជុំកំពូលអាស៊ី-អឺរ៉ុប (ASEM) លើកទី១២ដែលនឹងប្រព្រឹត្តទៅពីថ្ងៃទី១៨-១៩ ខែតុលា ឆ្នាំ២០១៨ តបតាមការអញ្ជើញរបស់លោក Donald Tush ប្រធានក្រុមប្រឹក្សាអឺរ៉ុបនិងលោក Jean Claude Juncher ប្រធានគណៈកម្មការអឺរ៉ុប។
យោងតាមសេចក្តីប្រកាសព័ត៌មានរបស់ក្រសួងការបរទេស និង សហប្រតិបត្តិការអន្តរជាតិបានឲ្យដឹងថា កិច្ចប្រជុំកំពូលអាស៊ី-អឺរ៉ុបលើកទី១២ នឹងប្រព្រឹត្តទៅក្រោមមូលបទ «អឺរ៉ុបនិងអាស៊ី៖ ដៃគូសកលសម្រាប់បញ្ហាប្រឈមសកល»មានគោលបំណងពង្រឹងកិច្ចសន្ទនានិងកិច្ចសហប្រតិបត្តិការរវាងតំបន់អាស៊ី និងអឺរ៉ុបខណៈដែលតំបន់ទាំងពីរជំរុញកសាងកម្លាំងរួមគ្នាដើម្បីដោះស្រាយបញ្ហាជាច្រើនចាប់ពីការបង្កើនពាណិជ្ជកម្មនិងវិនិយោគ ការតភ្ជាប់ ការអភិវឌ្ឍប្រកបដោយចីរភាព និងបម្រែបម្រួលអាកាសធាតុជាដើម។
ក្នុងអំឡុងពេលស្នាក់នៅប្រទេសបែលហ្ស៊ិកសម្តេចតេជោនាយករដ្ឋមន្ត្រី ហ៊ុន សែន នឹងជួបពិភាក្សាទ្វេភាគីដាច់ដោយឡែកពីគ្នាជាមួយលោក Dmitry Medvedev នាយករដ្ឋមន្ត្រីរុស្ស៊ី, លោក Li Keqiang នាយករដ្ឋមន្ត្រីចិន, លោក Viktor Orbán នាយករដ្ឋមន្ត្រីហុងគ្រី, លោកស្រី Erna Solberg នាយករដ្ឋមន្ត្រីន័រវេស, លោក Andrej Babisនាយករដ្ឋមន្ត្រីឆែកនិងថ្នាក់ដឹកនាំគណៈប្រតិភូដទៃទៀត។
សម្តេចតេជោនាយករដ្ឋមន្ត្រី ក៏នឹងជួបសំណេះសំណាលជាមួយសហគមន៍ខ្មែរនិងសិស្ស និស្សិតខ្មែរដែលកំពុងរស់នៅនិងសិក្សានៅប្រទេសបែលហ្ស៊ិកផងដែរ។
អ្នកនាំពាក្យរាជរដ្ឋាភិបាលបានបញ្ជាក់ថា នៅក្នុងប្រជុំអាស៊ី អឺរ៉ុបនោះសម្ដេចតេជោ ហ៊ុន សែន នឹងធ្វើបទអន្តរាគមន៍ដោយផ្ដោតលើប្រធានបទទាក់ទងនឹងរបៀបវារៈឆ្នាំ២០៣០សម្រាប់ការអភិវឌ្ឍប្រកបដោយចីរភាពនិងកំណើសេដ្ឋកិច្ចប្រកបដោយចីរភាព និងបរិយាប័ន្ន ដើម្បីចំអកទៅលើអ្នករិះគន់សម្ដេចកន្លងមក។
សេចក្តីប្រកាសព័ត៌មានអ្នកនាំពាក្យរាជរដ្ឋាភិបាលបានបញ្ជាក់ដូច្នេះថា៖«នេះជារបៀបវារៈផ្លូវការ ដែលជាសត្យានុម័ត ឆ្លើយតបទៅនឹងការធ្វើវិទ្ធង្សនាអកុសល របស់ក្រុមក្រៅច្បាប់ដែលធ្វើយុទ្ធនាការប្រឌិតនិងបំភ្លៃការពិតដែលលើកឡើងថា សម្ដេចនឹងទទួលសម្ពាធពីសហភាពអឹរ៉ុប ក្នុងពេលប្រជុំនេះគឺជាការភូតភរពិតប្រាកដ និងមិនខ្មាសអៀន»។
អ្នកនាំពាក្យរាជរដ្ឋាភិបាលបានបញ្ជាក់ថាកម្ពុជានិងសហភាពអឺរ៉ុប នៅតែបន្តដោះស្រាយរួមគ្នា និងសហការដោះស្រយបញ្ហាអនុគ្រោះពន្ធលើកម្ពុជា(EverythingBut Arms)។
សេចក្តីប្រកាសព័ត៌មានបានបន្តថា «អាស្រ័យដោយរាជរដ្ឋាភិបាលកម្ពុជា និងសហភាពអឺរ៉ុបទ្វេភាគី នៅតែរួមគ្នាបន្តក្នុងកិច្ចដោះស្រាយ និងសហការលើបញ្ហាខ្វែងគំនិតគ្នាឬប្រឈម ទៅនឹងវិស័យកញ្ចប់ដទៃទៀត នៃកម្មវិធីអនុគ្រោះពន្ធសព្វសារពើលើកលែងតែអាវុធយុទ្ធភណ្ឌ (EBAs) នោះ។ ប៉ុន្តែកញ្ចប់នៃឧស្សាហកម្មវាយនភ័ណ្ឌ មិនមានផលប៉ះពាល់ធ្ងន់ធ្ងរនោះទេដោយសិទ្ធសេរីភាព និងជីវភាពកម្មករ ត្រូវបានសម្ដេច ហ៊ុន សែន បានលើកតម្កើងជាប្រចាំ ស្របគ្នាគោលដៅនិងផលប្រយោជន៍រួម ។ កម្ពុជា-សហភាពអឺរ៉ុប ដែលជាកម្លាំងបំពេញបន្ថែមដល់កម្ពុជា ក្នុងកិច្ចត្រៀមងើបឈានឡើង ទៅជាប្រទេសមានចំណូលមធ្យមកម្រិតខ្ពស់ នាពេលអនាគតដ៏ខ្លីខាងមុខនេះ»។
សូមបញ្ជាក់ថា កិច្ចប្រជុំអាស៊ី-អឺរ៉ុប (ASEM) គឺជាវេទិកាសម្រាប់កិច្ចសហប្រតិបត្តិការរវាងបណ្ដាប្រទេសនៅក្នុងតំបន់អាស៊ីនិងតំបន់អឺរ៉ុបជាមួយការផ្ដោតសំខាន់លើសសរស្ដម្ភចំនួន៣រួមមាននយោបាយ សេដ្ឋកិច្ច និងវប្បធម៌។ ASEM តំណាងឲ្យ៥០ភាគរយ នៃ GDP របស់ពិភពលោក ព្រមទាំងស្មើនឹង ៦០ភាគរយនៃចំនួនប្រជាជនពិភពលោកនិង ៦០ភាគរយនៃពាណិជ្ជកម្មពិភពលោក។
កិច្ចប្រជុំ ASEM លើកដំបូង ត្រូវបានធ្វើឡើងកាលពីខែមីនា ឆ្នាំ១៩៩៦ ក្នុងទីក្រុងបាងកក ប្រទេសថៃ។ បច្ចុប្បន្ន ASEM មានដៃគូចំនួន៥៣ ក្នុងនោះមាននៅ តំបន់អាស៊ី Asia ២១ប្រទេស រួមទាំងសមាជិកអាស៊ានទាំង ១០ប្រទេស។ ប្រទេសក្នុងតំបន់អឺរ៉ុបចំនួន ៣០ប្រទេស ក្នុងនោះ ២៨ប្រទេសជាសមាជិកសហភាពអឺរ៉ុបនិងប្រទេសមិនមែនជាសមាជិកសហភាពអឺរ៉ុបចំនួន២ទៀតគឺន័រវែស និងស្វីស។ វេទិកានេះក៏មានការអញ្ជើញចូលរួមពីលេខាធិការដ្ឋានអាស៊ាន និងសហភាពអឺរ៉ុបផងដែរ។
សម្រាប់កម្ពុជាបានក្លាយជាសមាជិកនៃវេទិកានេះក្នុងកិច្ចប្រជុំកំពូល ASEM លើកទី៥ រៀបចំឡើងនៅទីក្រុងហាណូយ ប្រទេសវៀតណាម នៅថ្ងៃទី៨ ខែតុលា ឆ្នាំ២០០៤។
សម្រាប់ដំណើរការរបស់វេទិកានេះគឺប្រទេសជាសមាជិក ASEM ទាំងអស់មានភារកិច្ចជួយសម្របសម្រួលកិច្ចសហប្រតិបត្តិការនៃដំណើរការរបស់ ASEM តាមរយៈការដើរតួនាទីផ្លាស់វេនគ្នាជាប្រទេសសម្របសម្រួល។ បច្ចុប្បន្នមានប្រទេសជាអ្នកសម្របសម្រួលចំនួន៤ ក្នុងនោះប្រទេសចំនួន២ មកពីអាស៊ី និងប្រទេស២ទៀតមកពីអឺរ៉ុប។ ប្រទេសសម្របសម្រួលមានតួនាទីធ្វើជាម្ចាស់ផ្ទះ និងសហប្រធាននៃកិច្ចប្រជុំមន្ត្រីជាន់ខ្ពស់របស់ASEM,ធ្វើជាម្ចាស់ផ្ទះរៀបចំកិច្ចប្រជុំសម្របសម្រួល,ធ្វើជាសហប្រធាននៃកិច្ចប្រជុំរដ្ឋមន្ត្រីការបរទេស ASEM និងកិច្ចប្រជុំកំពូល ASEM, សម្របសម្រួលជាមួយដៃគូ និងប្រគល់ឯកសារឲ្យដៃគូសម្រាប់កិច្ចប្រជុំនានានិងយកសំណូមពរគម្រោងផ្ដួចផ្ដើមគំនិតនិងឯកសារទៅដល់ដៃគូសម្រាប់ពិចារណា៕
Source: Kampuchea Thmey Daily
0 Comments