កាលពីថ្ងៃពុធ ប៉ូលិសឥណ្ឌាបានបំបែកហ្វូងបាតុករដែលព្យាយាមបញ្ឈប់ស្ត្រីពីការចូលទៅកាន់ទីតាំងដ៏ពិសិដ្ឋបំផុតមួយនៃសាសនាហិណ្ឌូដែលជាប្រាសាទលើកំពូលភ្នំដែលត្រូវបានបង្ខំដោយចៅក្រមឲ្យបើកទ្វាររបស់ខ្លួនចំពោះអ្នកធ្វើធម្មយាត្រាភេទស្រីជាលើកដំបូង។
កាលពីខែកញ្ញា តុលាការកំពូលបានលុបចោលបំរាមលើស្ត្រីដែលមានអាយុមករដូវចាប់ពី១០ឆ្នាំដល់៥០ឆ្នាំពីការចូលនិងអធិស្ឋាននៅប្រាសាទ Ayyappa របស់ព្រះវិហារ Sabarimala នៃរដ្ឋ Kerala ភាគខាងត្បូង។
មនុស្សរាប់ពាន់នាក់បានធ្វើការតវ៉ាមុនការបើកតាមការគ្រោងទុកនៅរសៀលថ្ងៃពុធ។
ក្នុងរយៈពេលប៉ុន្មានថ្ងៃថ្មីៗនេះ ក្រុមដែលប្រឆាំងនឹងសេចក្តីសម្រេចរបស់តុលាការបានបញ្ឈប់រថយន្តនៅតាមផ្លូវនិងនៅជំរំ Nilackal ខាងក្រោមប្រាសាទដើម្បីរារាំងស្ត្រីដទៃមិនឲ្យចូល។
ប៉ុន្តែកាលពីថ្ងៃពុធ ប៉ូលិសបានបំបែកការតវ៉ានៅ Nilackal ដើម្បីអនុញ្ញាតឲ្យអ្នកកាន់សាសនារាប់រយនាក់ទាំងបុរសនិងស្ត្រីបន្តដំណើរក្នុងឡានក្រុងឆ្ពោះទៅកាន់ប្រាសាទនេះ។ ចម្ងាយប្រាំពីរគីឡូម៉ែត្រចុងក្រោយនឹងត្រូវធ្វើដំណើរដោយពួកអ្នកធ្វើធម្មយាត្រាថ្មើរជើង។
ប្រមុខប៉ូលិសលោក Manoj Abraham ដែលទទួលខុសត្រូវមន្ត្រីនគរបាល៥០០នាក់នៅ Nilackal បាននិយាយថា “យើងបានចាប់ខ្លួនមនុស្សចំនួន៧នាក់។ នរណាម្នាក់ដែលចង់ទៅប្រាសាទបរិសុទ្ធនេះនឹងអាចទៅបានដោយគ្មានឧបសគ្គ”។
ការហាមឃាត់ដែលមានអាយុកាលរាប់សតវត្សនៅ Sabarimala បានឆ្លុះបញ្ចាំងពីជំនឿចាស់ប៉ុន្តែនៅតែមានការរីករាលដាលក្នុងតំបន់មួយចំនួននៅតាមជនបទនៃប្រទេសឥណ្ឌាដែលជឿថា ស្ត្រីមករដូវគឺមិនស្អាត។
ស្ត្រីត្រូវបានអនុញ្ញាតឲ្យចូលទៅក្នុងប្រាសាទហិណ្ឌូភាគច្រើនប៉ុន្តែអ្នកកាន់សាសនាភេទស្រីនៅតែត្រូវបានហាមឃាត់ពីការចូលនៅកន្លែងខ្លះបើទោះបីជាមានយុទ្ធនាការរបស់សកម្មជនសិទិ្ធមនុស្សប្រឆាំងនឹងបំរាមនេះក៏ដោយ៕ AFP
Source: Kampuchea Thmey Daily
0 Comments