រដ្ឋមន្ត្រីការពារជាតិអាមេរិកលោក Jim Mattis បានធ្វើដំណើរទៅកាន់អតីតទីតាំងស្តុកសារធាតុគីមីពុល Agent Orange នៅភាគខាងត្បូងប្រទេសវៀតណាមកាលពីថ្ងៃពុធដើម្បីរំលឹកឡើងវិញនៃជំពូកដ៏ខ្មៅងងឹតមួយដែលបង្កផលប៉ះពាល់ដល់ជនជាតិវៀតណាមមួយលាននាក់ដូចជាការបង្កកំណើតកូនមកមានរាងកាយនិងសុខភាពមិនប្រក្រតី ជំងឺមហារីកនិងពិការភាព។
លោក Mattis បានពិនិត្យមើលផែនទីនៃអាកាសយានដ្ឋាន Bien Hoa នៅខាងក្រៅទីក្រុងហូជីមិញដែលជាកន្លែងដ៏សំខាន់មួយសម្រាប់សារជាតិគីមីពុល Agent Orange ដែលត្រូវបានបោសសម្អាតជាប្រញាប់ដោយទាហាននៅជិតចុងបញ្ចប់នៃសង្គ្រាមកាលពីជាងបួនទសវត្សរ៍មុន។
កងកម្លាំងសហរដ្ឋអាមេរិកបានបាញ់សារជាតិគីមីពុល Agent Orange ៨០លានលីត្រលើវៀតណាមខាងត្បូងនៅចន្លោះឆ្នាំ១៩៦២ដល់ឆ្នាំ១៩៧១ក្នុងគោលបំណងបណ្តេញកងទ័ពវៀតកុង។
សារធាតុ Agent Orange បានធ្វើឲ្យប៉ះពាល់ដល់មនុស្សជាច្រើនជំនាន់នៅប្រទេសវៀតណាម ដែលភាគច្រើនជាក្មេងៗដែលកើតមកពិការមានចាប់តាំងពីកើតមកក្បាលធំរហូតដល់ដៃជើងខុសធម្មតា។
នៅក្រោមកិច្ចព្រមព្រៀងបោសសម្អាតសារធាតុគីមីរយៈពេល១០ឆ្នាំដែលដឹកនាំធ្វើដោយទីភ្នាក់ងារអភិវឌ្ឍន៍ USAID, ការងារនេះត្រូវចាប់ផ្តើមនៅឆ្នាំក្រោយនៅ Bien Hoa ។
មន្ត្រី USAID ម្នាក់បាននិយាយថា "យើងសង្ឃឹមថានឹងមានប៉ែលនៅក្នុងដីនៅឆ្នាំក្រោយ។
បរិមាណនៃភ្នាក់ងារជាតិគីមីពុលនេះត្រូវបានស្តុកទុកនៅ Bien Hoa ក្នុងធុងប្រេងឥន្ធនៈធំៗអំឡុងសង្គ្រាមហើយក្រោមប្រតិបត្តិការឆ្នាំ១៩៧២ដែលគេហៅថា Pacer Ivy, កងយោធាសហរដ្ឋអាមេរិកបានចាប់ផ្តើមប្រមូលសារធាតុគីមីនេះចេញពីប្រទេសវៀតណាមដើម្បីទុកដាក់និងបំផ្លាញចោលនៅក្រៅប្រទេស។
ទីក្រុងហាណូយបាននិយាយថា ប្រជាជនវៀតណាមរហូតដល់៣លាននាក់បានរងគ្រោះដោយសារធាតុគីមីពុល Agent Orange ហើយថា មនុស្សមួយលាននាក់បានរងផលប៉ះពាល់សុខភាពយ៉ាងធ្ងន់ធ្ងរនៅថ្ងៃនេះរួមទាំងកុមារយ៉ាងតិច១៥០,០០០នាក់ដែលពិការភាពតាំងពីកំណើតផងដែរ។
លោក Mattis បាននិយាយថា ការមកទស្សនាតំបន់នេះគឺជាផ្នែកមួយនៃការប្តេជ្ញាចិត្តរបស់អាមេរិកក្នុងការធ្វើវិសោធនកម្មផ្នែកខ្លះនៃសង្គ្រាមបង្ហូរឈាមនិងជូរចត់ដែលបានសម្លាប់ជនជាតិវៀតណាមប្រមាណ៣លាននាក់។
ទំនាក់ទំនងរវាងអតីតគូសត្រូវទាំងពីរនេះមានភាពកក់ក្តៅគួរឲ្យកត់សម្គាល់ចាប់តាំងពីចុងបញ្ចប់នៃសង្គ្រាមមកហើយសព្វថ្ងៃនេះ ក្រុងវ៉ាស៊ីនតោនគឺជាសម្ព័ន្ធមិត្តនយោបាយនិងយោធានិងដៃគូពាណិជ្ជកម្មដ៏ជិតស្និទ្ធិបំផុតរបស់ទីក្រុងហាណូយ៕ AFP
Source: Kampuchea Thmey Daily
0 Comments