ចិន​ព្រមាន​ពលរដ្ឋ​របស់ខ្លួន​នៅ​វៀតណាម​ បន្ទាប់ពី​មានការ​តវ៉ា​អំពី​តំបន់​សេដ្ឋកិច្ច

ប្រទេស​ចិន​បាន​ព្រមាន​ដល់​ប្រជាពលរដ្ឋ​របស់ខ្លួន​នៅ​ប្រទេស​វៀតណាម​ បន្ទាប់ពី​ក្រុមអ្នកតវ៉ា​បាន​ប៉ះទង្គិច​ជាមួយ​ប៉ូលិស​ជុំវិញ​ផែនការ​របស់​រដ្ឋាភិបាល​ក្នុងការ​បង្កើត​តំបន់​សេដ្ឋកិច្ច​ថ្មី​សម្រាប់​ការវិនិយោគ​បរទេស​ដែល​បាន​ជំរុញ​ឲ្យ​មាន​អារម្មណ៍​ប្រឆាំង​ចិន​នៅក្នុង​ប្រទេស​នេះ​។​
​
បាតុករ​ជាង​១០០​នាក់​ត្រូវបាន​ចាប់ខ្លួន​និង​ប៉ូលិស​រាប់សិប​នាក់​បាន​រងរបួស​នៅក្នុង​ការតវ៉ា​មួយ​នៅ​កណ្តាល​ប្រទេស​វៀតណាម​កាលពី​ថ្ងៃអាទិត្យ​ដែល​នោះ​ជា​បាតុកម្ម​មួយ​ក្នុងចំណោម​បាតុកម្ម​នៅ​ទូទាំងប្រទេស​ប្រឆាំងនឹង​តំបន់​សេដ្ឋកិច្ច​ពិសេស​ដែល​ក្រុម​អ្នកប្រឆាំង​មានការ​ភ័យខ្លាច​ថា​នឹងត្រូវ​គ្របដណ្ដប់​ដោយ​វិនិយោគិន​ចិន​។​
​
ស្ថានទូត​ចិន​នៅ​ទីក្រុង​ហាណូយ​បានចេញ​ផ្សាយ​សេចក្តីជូនដំណឹង​មួយ​នៅលើ​វេ​ប​សាយ​របស់ខ្លួន​ដោយ​សំដៅ​ទៅលើ​ការតវ៉ា​នេះ​ថា​ជា “​ការប្រមូលផ្តុំ​ដោយ​ខុសច្បាប់​”​។​
​
សេចក្តីជូនដំណឹង​នេះ​បាន​និយាយថា “​ស្ថានទូត​ចិន​នៅក្នុង​ប្រទេស​វៀតណាម​កំពុងតែ​យកចិត្តទុកដាក់​យ៉ាងខ្លាំង​ចំពោះ​ការអភិវឌ្ឍន៍​ដែល​ពាក់ព័ន្ធ​និង​សូម​រំលឹក​ដល់​ប្រជាជន​ចិន​នៅ​វៀតណាម​ឲ្យ​យកចិត្តទុកដាក់​លើ​សន្តិ​សុខ​នៅពេល​ធ្វើដំណើរ​”​។​
​
រដ្ឋសភា​វៀតណាម​បាន​យល់ព្រម​កាលពី​ថ្ងៃ​ចន្ទ​ដើម្បី​ពន្យារពេល​ការបោះឆ្នោត​លើ​សេចក្តីព្រាងច្បាប់​មួយ​ដែល​នឹង​អនុញ្ញាត​ឲ្យ​វិនិយោគិន​បរទេស​អាច​ជួល​ដី​បាន​រហូតដល់​ទៅ​៩៩​ឆ្នាំ​និង​ផ្តល់​ការលើកទឹកចិត្ត​និង​ការ​រឹតបន្តឹង​តិចជាង​ពេលបច្ចុប្បន្ន​នៅក្នុង​ប្រទេស​នេះ​។​
​
លោកស្រី Nguyen Thi Kim Ngan ប្រធាន​គណៈកម្មការ​ស​ភា​បាន​និយាយថា ក្រុមអ្នកតវ៉ា​ប្រហែលជា​យល់ច្រឡំ​អំពី​ច្បាប់​នេះ​។ លោកស្រី​បានលើកឡើង​ថា “​ប្រជាជន​គួរតែ​ស្ងប់ចិត្ត​ហើយ​ជឿ​លើ​ការសម្រេចចិត្ត​របស់​គ​ណ​បក្ស​និង​រដ្ឋ​ជាពិសេស​នៅក្នុង​ការពិត​ដែល​រដ្ឋសភា​តែងតែ​ស្ដាប់​មតិ​របស់​ប្រជាពលរដ្ឋ​នៅពេល​ពិភាក្សា​អំពី​សេចក្តីព្រាងច្បាប់​នេះ​”​។​
​
កាលពី​ថ្ងៃអាទិត្យ ក្រុមអ្នកតវ៉ា​នៅ​ខេត្ត Binh Thuan បាន​គប់​គ្រាប់បែក​សាំង​និង​ដុំឥដ្ឋ​ដាក់​ប៉ូលិស​ហើយ​បាន​បំផ្លាញ​រថយន្ត​និង​ការិយាល័យ​របស់​រដ្ឋាភិបាល​ក្នុង​តំបន់​។​
​
កាសែត VnExpress បាន​ចុះផ្សាយ​ថា ប៉ូលិស​បាន​ចាប់ខ្លួន​អ្នក​តវ៉ា​ចំនួន​១០២​នាក់​។ របាយការណ៍​បាន​និយាយថា ប៉ូលិស​រាប់សិប​នាក់​បាន​រងរបួស​នៅក្នុង​ហេតុការណ៍​នេះ​។​
​រដ្ឋាភិបាល​បាន​និយាយថា សេចក្តីព្រាងច្បាប់​នេះ​មាន​គោលដៅ​ជំរុញ​ការអភិវឌ្ឍន៍​នៅក្នុង​ខេត្ត​ចំនួន​បី​នៅ​ភាគ​ខាងជើង ភាគ​កណ្តាល​និង​ភាគខាងត្បូង​នៃ​ប្រទេស​វៀតណាម​៕ REUTERS

​

[caption id="attachment_926489" align="aligncenter" width="700"]  [/caption]

Source: Kampuchea Thmey Daily