ជិះ​កង់​ត្រួតពិនិត្យ​ស្ថានភាព​ផ្លូវ ប្រឡាយ​អម​សង​ខាង និង​លូ ដើម្បី​ធ្វើការ​ជួសជុល​កែលំអ

លោក ម៉ឹង យូឡេង​ ប្រធាន​មន្ទីរ​សាធារណការ​ខេត្ត​កណ្ដាល​ កាលពីថ្ងៃទី២៦ ខែ​តុលា ឆ្នាំ​២០១៨​នេះ​បាន​ដឹកនាំ​មន្ត្រីចុះពិនិត្យផ្លូវជាតិលេខ២១A​ និង​ផ្លូវ​ជាតិ​លេខ​២១​ក្នុង​ស្រុក​ស្អាង​ដើម្បី​ឲ្យ​បាន​ដឹង​ច្បាស់​ថា តើ​ទម្រង់​ផ្លូវ លូ និង​ប្រព័ន្ធ​ប្រឡាយ​បង្ហូរទឹក​មាន​ការ​ខូចខាត​យ៉ាងណា ត្រង់​ណា? និង​បញ្ហា​រំលោភបំពាន​យក​ដី​ចំណី​ផ្លូវ​សង់​លំនៅ​ដ្ឋាន​ដាក់​តាំង​ទំនិញ​លក់ដូរ​ប្រញាប់​រក​វិធានការ​ដោះ​ស្រាយ​ជា​បន្ទាន់។

ជា​មួយ​គ្នា​នេះ លោក​ក៏បាន​អំពាវនាវ​ដល់​បង​ប្អូន​ប្រជាពលរដ្ឋ​ដែល​រស់នៅ​តាម​ដង​ផ្លូវ​ជាតិ និង​ផ្លូវ​ក្នុង​ខេត្ត​ទាំងអស់ សូម​គោរព​ច្បាប់​ផ្លូវ​ថ្នល់ ដោយរក្សាផ្លូវឲ្យនៅ​ដដែល ហាម​រំលោភ​យក​ដីចំណី​ផ្លូវ​ធ្វើជា​កម្មសិទ្ធិ​ក្នុង​ការ​លក់ដូរ ឬ​សង់​លំនៅដ្ឋាន ហាម​លុប​ប្រឡាយ​រំដោះ​ទឹក ហាម​យក​សំរាម​មក​ទម្លាក់​ក្នុង​ប្រឡាយ និង​ហាមយក​សំរាម​ដាក់​មាត់​លូ ព្រោះ​ទង្វើ​ទាំងអស់​នេះ​សុទ្ធ​តែ​ជា​ទង្វើ​ខុស​ច្បាប់។

 

យុទ្ធនាការ​ជិះកង់​ត្រួតពិនិត្យ​ស្ថានភាព​ផ្លូវ លូ ប្រឡាយ​អម​សង​ខាង​ផ្លូវ ការ​រំលោភ​ដី​ចំណី​ផ្លូវ និង​ផ្លូវ​សំបុក​មាន់ នៅ​ព្រឹក​ថ្ងៃទី២៦ ខែ​តុលា ឆ្នាំ​២០១៨​នេះ​ដែរ គឺ​ជា​យុទ្ធនាការ​លើក​ទី​៣ របស់​មន្ទីរ​សាធារណការ​ខេត្ត​កណ្ដាល​ក្នុង​ការ​ត្រួតពិនិត្យ​ស្ថានភាព​ផ្លូវ លូ ប្រឡាយ​អម​សង​ខាង​ផ្លូវ ការ​រំលោភ​ដី​ចំណី​ផ្លូវ និង​ផ្លូវ​សំបុក​មាន់ ដើម្បី​ចាត់​វិធានការ​ឲ្យ​បាន​ទាន់​ពេលវេលា ក្នុង​ការ​កែលំអ​ហេដ្ឋារចនាសម្ព័ន្ធ ផ្លូវ ស្ពាន ដែល​មាន​នៅ​ក្នុងដែន​សមត្ថកិច្ច នៃ​មន្ទីរ​សាធារណការ និង​ដឹក​ជញ្ជូន​ខេត្ត​កណ្ដាល។

 

លោក ម៉ឹង យូឡេង​ បាន​ឲ្យ​ដឹង​ទៀត​ថា យុទ្ធនាការ​ជិះ​កង់​នេះ​ដើម្បី​មើល​ឲ្យ​បាន​ច្បាស់​ថា​តើ​ផ្លូវ​ថ្នល់​របស់​យើង មាន​សម្បុក​មាន់ មាន​ស្នាមប្រេះ និង​មើល​តាម​មាត់លូ តើ​វា​យ៉ាងម៉េច​ទទួល​យក​បាន​ហើយ​ឬ​នៅ? នៅ​លើចិញ្ចើមផ្លូវ តើ​ការ​ដាក់តាំង​លក់​វត្ថុផ្សេងៗនៅលើចិញ្ចើមផ្លូវ ការ​ដាំ​បង្គោល​ផ្សាយ​ពាណិជ្ជកម្ម​ផ្សេងៗដែល​ប៉ះពាល់​ដល់​ផ្លូវ​ថ្នល់ មន្ទីរ​សំណូមពរ​ឲ្យ​ប្រជាពលរដ្ឋ​យក​ចេញ ចំពោះ​ប្រជាពលរដ្ឋ​ណា​ដែល​បាន​លុប​ប្រឡាយ លុប​លូ មន្ទីរ​ស្នើ​សុំ​ឲ្យ​ពួក​គាត់​កាយ​ចេញ​វិញ និង​ប្រជាពលរដ្ឋ​ដែល​យក​ចិញ្ចើម​ផ្លូវ​ធ្វើ​ជា​កន្លែង​លក់ដូរ មន្ទីរ​ស្នើ​សុំ​ឲ្យ​គាត់​រើ​ចេញ ដើម្បី​ធ្វើ​យ៉ាង​ណា​ឲ្យ​ផ្លូវ​យើង​បាន​ធំ ស្រឡះ​ កាត់​បន្ថយ​ការ​គ្រោះថ្នាក់​ចរាចរណ៍​ដែល​កើតមាន​ជាយថាហេតុ។ លោកបន្តថាការចុះពិនិត្យផ្លូវជាតិលេខ២១A គឺ​ចាប់ពី​រង្វង់​មូល​លោកតា​ខ្មៅ រហូត​ដល់​ស្រុក​កោះធំ ព្រំប្រទល់​ប្រទេស​វៀតណាម និងផ្លូវជាតិលេខ២១ ចាប់ពី​មុខ​ផ្សារ​តាខ្មៅ​ចាស់ រហូត​ដល់​វត្ត​ឈូង​លាប ស្រុក​ស្អាង។

 

លោក​បាន​បន្ត​ទៀត​ថា មិនមែនតែផ្លូវជាតិលេខ២១ និងផ្លូវជាតិលេខ២១Aតែ​ប៉ុណ្ណោះ​ទេ ដែល​ត្រូវ​ធ្វើការ​ត្រួតពិនិត្យ មន្ទីរបានធ្វើការត្រួតពិនិត្យ ថែទាំនិងជួសជុលជាប្រចាំ ទាំងផ្លូវជាតិ ​និងផ្លូវខេត្ត​ក្នុង​ដែន​សមត្ថកិច្ច​របស់​ខ្លួន​ឲ្យ​កាន់​តែ​មាន​គុណភាព ប្រសិទ្ធភាព តាម​លក្ខណៈ​បច្ចេកទេស និង​ធ្វើ​ឲ្យ​ការ​ធ្វើ​ដំណើរ​របស់​បងប្អូន​ប្រជាពលរដ្ឋ​ប្រកប​ដោយ​សុវត្ថិភាព។

 

មុនីខេ​មចាន់ រកបាន​៣​ពិន្ទុ​បន្ថែម ខណៈ​ចាន់ សាន់ បាន​១​ពិន្ទុ ក្នុងការ​ប្រកួត​ជម្រុះ​ជុំ​ទី​៤​ខ្សែក្រវាត់​គូ​បូ​តា​ការប្រកួត​ជម្រុះ​ដណ្តើម​ខ្សែក្រវាត់​ជើងឯក​លេខ ១ គូ​បូ​តា​ទម្ងន់​៥៤​គីឡូក្រាម នៅ​សង្វៀន​បាយ័ន​ស្ទឹងមានជ័យ កាលពី​យប់​ថ្ងៃ​សុក្រ​ទី​២៦​តុលា​២០១៨ ដែលជា​ការប្រកួត​ជុំ​ទី​៤ នោះ ខេ​ម ចាន់ អ្នក​ប្រដាល់​ក្លិប​កងពលតូច​ទ័ព​ឆ័​ត្រ​យោង​៩១១ រកបាន​៣​ពិន្ទុ​បន្ថែម ខណៈ ដែល​ចាន់ សាន់ អ្នក​ប្រដាល់​ក្លិប​និរោធ​មានជ័យ បាន​១​ពិន្ទុ​ប៉ុណ្ណោះ។​ ខេ​ម ចាន់ គេ​បាន​ផ្តួល​អ្នក​ប្រដាល់​ថៃ Anuntasak Site Phukhorngyus អោយ​បោះបង់​ការប្រកួត​ក្នុង​ទឹក​ទី​៣ ហើយ ចាន់ សាន់ គេ​វាយ​ចាញ់ អ្នក​ប្រដាល់​ឡាវ Wangngeun Rungrean ដោយ​ពិន្ទុ ។​

​

ក្នុងការ​ប្រកួត​ចុង​ទឹក​ទឹក​ទី​២​នោះ ខេ​មចាន់ បាន​ទាត់​ជើងឆ្វេង​របស់ Anuntasak អោយ​ឈឺ​ដួល​លើ​រេញ ត្រូវ​អាជ្ញាកណ្តាល​រាប់​៨ ។ ឈានចូល​ដល់​ទឹក​ទី​៣ ខេ​ម ចាន់ បាន​ព្យាយាម​ទាត់​ជើង​ឈឺ​របស់​Anuntasak រហូតដល់​ដួល ត្រូវ​អាជ្ញាកណ្តាល​រាប់​៨​ជា​លើក​ទី​២ ។​ក្រោយពី​រាប់ Anuntasak បាន​ក្រោក​ឡើង​តស៊ូ​ទៀត តែ​ត្រូវ​ខេ​ម ចាន់​ទាត់​ជើង​ឈឺ​ដដែល បណ្តាលអោយ Anuntasak ក្រោក​លែងរួច ហើយ​ត្រូវ​អាជ្ញាកណ្តាល​បញ្ឈប់​លែងអោយ​ប្រកួត​តែម្តង ដែល​ធ្វើ​ឲ្យ​ខេ​មចាន់​ទទួលបាន​ជ័យជម្នះ​ក្នុង​ទឹក​ទី​៣។ ជាមួយនឹង​លទ្ធផល​ជ័យជម្នះ​នេះ ខេ​ម ចាន់​បាន​១០​ពិន្ទុ ក្នុង​៤​ប្រកួត​ដោយ​ឈ្នះ​៣​ចាញ់​១​ប្រកួត ហើយ​អ្នក​ប្រដាល់​ថៃ Anuntasak គេ​បាន​៥​ពិន្ទុ ក្នុងការ​ប្រកួត​៤​ប្រកួត​ដូចគ្នា គឺ​ឈ្នះ​១​ចាញ់​៣​ប្រកួត ។​

​

ចំពោះ​ការប្រកួត​របស់​ចាន់ សាន់​វិញ គឺ​វាយ​ចាញ់​អ្នក​ប្រដាល់​ឡាវ​Wangngeun Rungrean ត្រឹម​ពិន្ទុ បន្ទាប់ពី​ប្រកួត​៥​ទឹក​ពេញ​នោះ ។ ចាន់ សាន់ ចាញ់​កម្ពស់​ឡាវ​ដាច់​តែម្តង ដែល​ធ្វើ​អោយគេ​មិនអាច​ធ្វើ​អ្វី Wangngeun កើត ។

​ចាន់ សាន់ ក្រោយ​ចាញ់​ឡាវ Wangngeun Rungrean នេះ គេ​អស់​ឪ​កាស​ក្នុងការ​បាន​ឡើងទៅ​ប្រកួត​នៅ​ពាក់កណ្តាល​ផ្តាច់ព្រ័ត្រ​ហើយ បើទោះបីជា​នៅសល់​មួយ​ប្រកួត​ទៀត​ក្តី ព្រោះ​ចាន់ សាន់ ចាញ់​៣​ប្រកួត​ទៅហើយ​ក្នុង​ការប្រកួត​៤​ជុំ​នេះ ។ ចំណែក​អ្នក​ប្រដាល់​ឡាវ Wangngeun Rungrean គេ​នៅមាន​ឪ​កាស​ក្នុង​ការរក​ពិន្ទុ​សម្រាប់​ជុំ​បន្ទាប់​ទៀត ដោយសារ​គេ​បាន​៨​ពិន្ទុ​ក្នុង​៤​ប្រកួត​នោះ ។

​

សូមបញ្ជាក់ថា កីឡាករ​ខ្លាំង​ទាំង​១០​រូប ដែល​ចូលរួម​ប្រកួត​ដណ្តើម​ខ្សែក្រវាត់​គូ​បូ​តា​រដូវ​កាល​ថ្មី​ទម្ងន់​៥៤​គីឡូក្រាម​នេះ មាន​អ្នក​ប្រដាល់​ជើង​ខ្លាំង​កម្ពុជា​៥​រូប និង អ្នក​ប្រដាល់​ជើង​ខ្លាំង​ថៃ​-​ឡាវ ៥ រូប ចូលរួម​វាយ​ដណ្តើមយក​ខ្សែក្រវាត់​នេះ ។​

​

អ្នក​ប្រដាល់​មួយរូបៗ ទាំង​ខ្មែរ ទាំង​ថៃ និង​ឡាវ គឺ​ត្រូវ​ឆ្លងកាត់​ការប្រកួត​ក្នុង​ម្នាក់ៗ ចំនួន ៤ ប្រកួត​ម្នាក់ ហើយ​អ្នក​ដែលមាន​ពិន្ទុ​ច្រើន​២​រូប​ក្នុង​មួយ​ពូ​ល ទាំង​ពូ​ល​ខ្មែរ និង ពូ​ល​ថៃ​-​ឡាវ នឹងត្រូវ​បាន​ឡើងទៅ​ប្រកួត​វគ្គ​ពាក់កណ្តាល​ផ្តាច់ព្រ័ត្រ និង ផ្តាច់ព្រ័ត្រ ។​

​

ដោយឡែក ការប្រកួត​រវាង​អ្នក​ប្រដាល់​រួម​ជាតិ​វិញ ស៊ឹម ប៊ុនឆៃ អ្នក​ប្រដាល់​ក្លិប​ព្រៃទទឹង​ខេត្តបាត់ដំបង បាន​ប្រកួត​ឈ្នះ តាំង តាក់ ដោយ​ពិន្ទុ ហើយ​ម៉ិ​ល សារុន អ្នក​ប្រដាល់​ក្លិប​កងចក្រ​រាជសីហ៍​មាន​រិ​ទ្ធ វាយ​ឈ្នះ អៀ​ប ឆា អ្នក​ប្រដាល់​ក្លិប​យុវ​វាល​ស្បូវ​ខណ្ឌ​ច្បារអំពៅ ដោយ​ពិន្ទុ​ដែរ៕

 

 

 

​

Source: Kampuchea Thmey Daily