ក្រុម​ភ្នំពេញ​ក្រោ​ន ចែកផ្លូវ​ជាមួយ​គ្រូបង្វឹក ក្រោយ​ឈរ​ចំណាត់ថ្នាក់​លេខ​៥​ក្នុង​លី​គ​កំពូល​កម្ពុជា

​បន្ទាន់​ពី​បញ្ចប់​សកម្មភាព​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League 2018) ក្លិប​ភ្នំពេញ​ក្រោ​ន បានប្រកាស​ចែកផ្លូវ​ជាមួយ​លោក Sean Sainbury ដែលជា​គ្រូបង្វឹក​នៅ​ព្រឹក​ថ្ងៃ​ច័ន្ទ ដើម​សប្ដាហ៍​នេះ​ខណៈ​ក្លិប​ជើងឯក​៦​សម័យកាល​មួយ​នេះ​បាន​ឈរ​ត្រឹម​ចំណាត់ថ្នាក់​លេខ​៥​ប៉ុណ្ណោះ ក្នុងចំណោម​ក្លិប​ជា​សមាជិក​ចំនួន​១២​ក្រុម​ប្រចាំ​រដូវ​កាល​។



ក្លិប​បាល់ទាត់​ភ្នំពេញ​ក្រោ​ន បាន​បញ្ជាក់​នៅលើ​វិ​ប​សាយ​ផ្លូវការ​របស់​ខ្លួន​ថា «​ក្លិប​សូម​អរគុណ​ចំពោះ​ការ​ខិតខំ​ប្រឹងប្រែង​ដឹកនាំ ក៏ដូចជា​បង្វឹក​ក្រុម​កីឡាករ​នៃ​ក្លឹប​បាល់ទាត់​ភ្នំពេញ​ក្រោ​ន ហើយ​យើង​ក៏​សូម​ជូនពរ​ដល់​លោក Sean Sainbury ឲ្យ​ទទួលបាន​ជោគជ័យ​នៅក្នុង​ការ​បំពេញភារកិច្ច​នាពេល​អនាគត​ខាងមុខ​»​។



ចំពោះ​ពានរង្វាន់​លី​គ​កំពូល​កម្ពុជា ក្រុម​ភ្នំពេញ​ក្រោ​ន រក្សា​ចំណាត់ថ្នាក់​លេខ​៥​ក្រោយ​ប្រកួត​បាន​២២​លើក ឈ្នះ​បាន​១១​លើក ស្មើគ្នា​៣​លើក​និង​ចាញ់​៨​លើក​មាន​៣៦​ពិន្ទុ ពោលគឺ​ចាញ់​ក្រុម​កំពូល​តារាង​ណាហ្គា​វើ​ល រហូតដល់​២០​ពិន្ទុ​។ ភ្នំពេញ​ក្រោ​ន ទាត់​បញ្ចូល​ទី​គូប្រកួត​បាន​៤១​គ្រាប់ ហើយ​គេ​ទាត់​ចូល​វិញ​ចំនួន​៣៣​គ្រាប់​។ ចំណែក​នៅក្នុង​ពានរង្វាន់​សម្តេច​តេ​ជោ ហ៊ុន សែន (Hun Sen Cup)​វិញ​ក្រុម​ក្រុម​ភ្នំពេញ​ក្រោ​ន បាន​ធ្លាក់​ចេញ​ត្រឹម​វគ្គ​៨​ក្រុម​ចុងក្រោយ បន្ទាប់ពី​ចាញ់​ក្រុម​អង្គ​រថា​យ​ហ្គឺ​រ ដែល​មកពី​ខេត្តសៀមរាប ដោយ​បាល់​ប៉េ​ណាំង​ទី​កាត់សេចក្តី​៤​ទល់​៣ ក្រោយ​ប្រកួត​ស្មើគ្នា​ទាំង​២​ជើង​៤​ទល់​៤​។



លោក Sean Sainbury ជា​ជនជាតិ​អង់គ្លេស ហើយ​លោក​ធ្លាប់ជា​គ្រូបង្វឹក​កីឡាបាល់ទាត់​ដែលមាន​បទពិសោធន៍​ប្រមាណ​ជា​១៨​ឆ្នាំ​មកហើយ ថែមទាំង​ធ្លាប់បាន​ដឹកនាំ​ក្រុមយុវជន​ជម្រើសជាតិ​ថៃ​អាយុ​ក្រោម ២១​ឆ្នាំ​, ក្រុម​ថ្នាល​យុវជន​នៅ​ក្លិប Muangthong United FC ព្រមទាំង​ជា​គ្រូ​បង្គោល​នៅ​ក្លឹប Nakhon Nayok FC ក្លិប Pattaya United នៅក្នុង​ប្រទេស​ថៃ​។

លោក បានធ្វើ​ដំណើរ​មកកាន់​ប្រទេស​កម្ពុជា កាលពី​ឆ្នាំ​២០១៧ កន្លង​ទៅដោយ​កាន់​តួរ​នាទី​ជា​នាយក​បច្ចេកទេស​(Technical Director)​។ ក្រោយ​ការចាកចេញ​របស់លោក Oleg Starynskyi ជា​ជនជាតិ​អ៊ុយ​ក្រែង ដែលជា​គ្រូបង្វឹក​ចាស់ នៅ​ចុងឆ្នាំ​២០១៧ ទើប​លោក Sean Sainbury​ត្រូវ​ក្លិប​តែងតាំង​ឲ្យ​ធ្វើជា​គ្រូ​បង្វឹក​ជំនួស​តែម្តង៕

Source: Kampuchea Thmey Daily