ភ្នំពេញ ៖ វិមានឈ្នះឈ្នះ ស្ថិតនៅក្នុងសង្កាត់ព្រែកតាសេក ខណ្ឌជ្រោយចង្វារាជធានីភ្នំពេញ នឹងត្រូវសម្ពោធជាផ្លូវការនៅចុងឆ្នាំនេះរយៈពេល៣ថ្ងៃគឺថ្ងៃទី២៩និង៣១ធ្នូឆ្នាំ២០១៨ខាងមុខនេះ។
ក្នុងកិច្ចប្រជុំនាព្រឹកថ្ងៃទី១តុលា លោកឃួង ស្រេង អភិបាលនៃគណៈអភិបាលរាជធានីភ្នំពេញបានដាក់ចេញនូវវិធានការមួយចំនួន ដើម្បីឈានទៅរៀបពិធីសម្ពោធវិមានឈ្នះៗដែលនៅសល់តែរយៈពេលជាងមួយខែទៀតតែប៉ុណ្ណោះ ឲ្យបានល្អប្រសើរ។
លោកបញ្ជាក់ថា វិមានឈ្នះៗដែលរៀបចំកសាងឡើងដោយក្រសួងការពារជាតិគឺជានិមិត្តរូបនៃការបញ្ចប់សង្គ្រាមដ៏រ៉ាំរ៉ៃនៅកម្ពុជា និងអបអរសាទរខួបអនុស្សាវរីយ៍លើកទី២០នៃការបញ្ចប់សង្គ្រាមនៅកម្ពុជាក្រោមនយោបាយឈ្នះៗរបស់សម្តេចអគ្គមហាសេនាបតីតេជោហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជាដែលជាស្ថាបនិកសន្តិភាពតែមួយគត់ និងជាអ្នកពន្លត់ភ្លើងសង្គ្រាមដ៏រ៉ាំរ៉ៃនៅកម្ពុជាដោយពុំមានការបង្ហូរឈាម នាំមកនូវសុខសន្តិភាពពេញផ្ទៃប្រទេស និងការអភិវឌ្ឍន៍។
លោកឃួង ស្រេង បន្តថា រដ្ឋបាលរាជធានីភ្នំពេញបានត្រៀមខ្លួនរួចជាស្រេចដើម្បីចូលរួមរៀបចំកម្មវិធីនេះឲ្យមានប្រសិទ្ធភាពនិងទទួលបានលទ្ធផលល្អប្រសើរ តាមរយៈការត្រៀមរៀបចំអនុគណៈកម្មការទទួលខុសត្រូវតាមភារកិច្ចរៀងៗខ្លួន៕
Source: Kampuchea Thmey Daily
0 Comments