ភ្នំពេញ ៖ កិច្ចប្រជុំពេញអង្គគណៈរដ្ឋមន្ត្រីក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីព្រឹកថ្ងៃទី ២៦ ខែតុលា ឆ្នាំ២០១៨ នេះ បានអនុម័តទាំងស្រុងលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ ដែលបានបង្ហាញថា ចំណាយលើបន្ទុកបុគ្គលិកត្រូវបានគ្រោងចំនួន៧.៨៦២.៥៣៧លានរៀល ស្មើប្រមាណជាង ១៩២៥ លានដុល្លារអាមេរិក ។
សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ បានបង្ហាញថាការចំណាយលើបន្ទុកបុគ្គលិកត្រូវបានគ្រោងចំនួន ៧ ៨៦២ ៥៣៧ លានរៀល ស្មើប្រមាណជាង ១៩២៥ លានដុល្លារអាមេរិកសម្រាប់៖
ទី១-ការដំឡើងបៀវត្សមូលដ្ឋានក្នុងអត្រា១០% តាមតម្លៃឯកតាសន្ទស្សន៍ ២៣៤០ រៀល ដោយអនុវត្តចាប់ពីខែមករាឆ្នាំ២០១៩ ។
ទី២-ការដំឡើងប្រាក់បំណាច់មុខងារនឹងត្រូវអនុវត្តចាប់ពីខែមេសា ឆ្នាំ២០១៩ ដោយ ផ្តល់បន្ថែម៣០.០០០ រៀលជូនមន្ត្រីរាជការស៊ីវិលនិងកងកម្លាំងប្រដាប់អាវុធគ្រប់ប្រភេទ ដែលមានប្រាក់បំណាច់មុខងារក្នុងកម្រិតចាប់ពី ៧៥០.០០០រៀលចុះក្រោម ។
ទី៣-ការដំឡើងប្រាក់ឧបត្ថម្ភប្រចាំខែសម្រាប់មន្ត្រីជាប់កិច្ចសន្យាពី ៦០០.០០០ រៀល ទៅដល់ ៦៥០.០០០ ដោយអនុវត្តចាប់ពីខែមករា ដល់ខែធ្នូ ឆ្នាំ ២០១៩ ។
ជារួមឆ្នាំ២០១៩ បៀវត្សអបប្បរិមារបស់មន្ត្រីរាជការស៊ីវិលនិងកងកម្លាំងប្រដាប់អាវុធនឹងមានស្ថានភាពផ្លាស់ប្តូរដូចតទៅ ៖ ១.បៀវត្សមន្ត្រីរាជការស៊ីវិលនឹងត្រូវបានដំឡើងពីចំនួន ១.០១៤.៤៥០ រៀលនៅឆ្នាំ ២០១៨ ដល់ប្រមាណ ១.០៧០.១០០ រៀលនៅខែមករាឆ្នាំ២០១៩ហើយនឹងត្រូវបានដំឡើងដល់ប្រមាណ ១.១០០.១០០រៀល ចាប់ពីខែមេសាឆ្នាំ២០១៩ ។ ២-បៀវត្សគ្រូបង្រៀននិងគ្រូពេទ្យនឹងត្រូវដំឡើងពីចំនួន ១ ១១៤ ៤៥០ រៀលនៅឆ្នាំ២០១៨ ដល់ប្រមាណ ១ ១៧០ ១០០ រៀល នៅខែមករា ឆ្នាំ២០១៩ ហើយនឹងត្រូវដំឡើងដល់ប្រមាណ ១ ២០០ ១០០ រៀល ចាប់ពីខែមេសា ឆ្នាំ២០១៩ ។ ៣-បៀវត្សនគរបាលជាតិ ដោយពលបាលត្រី នឹងត្រូវដំឡើងពីចំនួន ១ ០៩៨ ៩២៧ រៀល ( គិតបញ្ចូលទាំងរបបអង្ករ ) នៅឆ្នាំ២០១៨ ដល់ប្រមាណ ១ ១៥៤ ៥៧៧ រៀល ( គិតបញ្ចូលទាំងរបបអង្ករ ) នៅខែមករាឆ្នាំ២០១៩ ហើយនឹងត្រូវដំឡើងដល់ប្រមាណ១.១៨៤.៥៧៧រៀល( គិតបញ្ចូលទាំងរបបអង្ករ )ចាប់ពីខែមេសាឆ្នាំ២០១៩។ ៤-បៀវត្សយោធិនដោយពលទោនឹងត្រូវដំឡើងពីចំនួន ៩៧៦ ៥៥០ រៀល( មិនគិតបញ្ចូលរបបអង្ករ ) នៅឆ្នាំ២០១៨ ដល់ប្រមាណ ១ ០២៥ ៩០០ រៀល( មិនគិតបញ្ចូលរបបអង្ករ )នៅខែមករា ឆ្នាំ២០១៩ ហើយនឹងត្រូវដំឡើងដល់ប្រមាណ ១ ០៥៥ ៩០០ រៀល ( មិនគិតបញ្ចូលរបបអង្ករ ) ហើយបើគិតបញ្ចូលរបបអង្ករត្រូវជាប្រមាណ ១ ១១៤ ៣៧៧ រៀល ចាប់ពីខែមេសា ឆ្នាំ២០១៩។
សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ បង្ហាញថា ការដំឡើងបៀវត្សជូនមន្ត្រីសាធារណៈសម្រាប់ឆ្នាំ ២០១៩ នេះ រាជរដ្ឋាភិបាលបានគ្រោងថវិកាចំនួន ២០ ប៊ីលានរៀល ដោយឡែកផ្សេងទៀតសម្រាប់ផ្តល់លទ្ធភាពដល់ក្រសួងស្ថាប័នអាចជ្រើសរើសមន្ត្រីមានសមត្ថភាព និងជំនាញខ្ពស់ចូលបម្រើការងាររដ្ឋហើយក្រសួងសេដ្ឋកិច្ចនិងហិរញ្ញវត្ថុនឹងផ្តល់កិច្ចសហការជិតស្និទ្ធជាមួយនឹងក្រសួងមុខងារសាធារណៈ ដើម្បីរៀបចំក្របខណ្ឌនិងគោលការណ៍សម្រាប់ដាក់ឲ្យដំណើរការគម្រោងនេះ។
ក្នុងសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រង ឆ្នាំ២០១៩ ក៏បានលើកឡើងចំពោះប្រាក់សោធននិវត្ត គឺរាជរដ្ឋាភិបាលគ្រោងថវិកាចំនួន ៦០ ប៊ីលានរៀល សម្រាប់ការដំឡើងរបបសោធនប្រចាំខែទាបបំផុត និងការកាត់បន្ថយគម្លាតរបបសោធនរបស់និវត្តជន រវាងអ្នកទទួលបានសោធនទាប និងអ្នកទទួលបានសោធនខ្ពស់ និងរវាងនិវត្តជនថ្មីនិងនិវត្តជនចាស់ជូនដល់និវត្តជនដែលជាអតីតមន្ត្រីរាជការស៊ីវិលនិងកងកម្លាំងប្រដាប់អាវុធ ។ ចំពោះការបើកប្រាក់សោធននិវត្តជូននិវត្តជនក៏នឹងត្រូវធ្វើឡើងចំនួន ២ដង ក្នុង១ខែ តាមប្រព័ន្ធធនាគារដូចគ្នានឹងមន្ត្រីរាជការស៊ីវិលនិងកងកម្លាំងប្រដាប់អាវុធផងដែរ ៕
Source: Kampuchea Thmey Daily
0 Comments