ភ្នំពេញ ៖ សមាជិកក្រុមប្រឹក្សាខណ្ឌឫស្សីកែវ បានលើកឡើងថា ទោះបីជាមានសម្ភារៈពន្លត់អគ្គីភ័យទំនើបយ៉ាងណាក៏ដោយ ប្រសិនបើការទប់ស្កាត់ និងការបង្ការមានភាពធ្វេសប្រហែស នៅតែជាបញ្ហាហានិភ័យខ្ពស់ដដែល ដោយហេតុថា កំប៉ុងហ្គាស៍ភាគច្រើនចាស់ៗ ហើយអ្នកបញ្ចូលហ្គាស៍លក់ចង់កេងចំណេញពេក ដោយមិនគិតពីគ្រោះកាចកើតឡើងជាយថាហេតុ ដែលបង្កពីភាពលោភលន់របស់ពួកគាត់មិនគិតពីផលប៉ះពាល់ឡើយ។
ដូច្នេះសូមអាជ្ញាធរ និងមន្ត្រីពាក់ព័ន្ធគួរមានវិធានការតឹងរ៉ឹងចំពោះអ្នកបញ្ចូលហ្គាស៍ ដោយចុះពិនិត្យតាមជំនាញ ត្រូវចុះអប់រំ និងណែនាំដើម្បីទប់ស្កាត់កុំឱ្យគាត់បន្តយកកំប៉ុងចាស់មកបញ្ចូលទៀត និងត្រូវធ្វើកិច្ចសន្យាជាមួយម្ចាស់អាជីវកម្ម បើឃើញមានបញ្ចូលហ្គាស៍កំប៉ុងចាស់ទៀតត្រូវផាកពិន័យឬធ្វើយ៉ាងណាតាមកិច្ចសន្យាទើបមានប្រសិទ្ធភាព។
ជាមួយគ្នានេះដែរ ក្រុមប្រឹក្សាខណ្ឌក៏បានសំណូមពរ ដល់រដ្ឋបាលខណ្ឌស្នើទៅក្រុមហ៊ុនស៊ិនទ្រីឱ្យបន្ថែមរថយន្តដឹកសំរាមមួយចំនួនទៀតទើបអាចជញ្ជូនសំរាមចេញទាន់ពេលវេលា ព្រោះតាមការសង្កេតឃើញថាពីមុនត្រឹម៣ថ្ងៃយ៉ាងយូរថយន្តមកដឹកចេញអស់ តែបច្ចុប្បន្ននេះឡានយកសំរាមមានការយឺតយ៉ាវជាងមុន មានកន្លែងខ្លះ រយៈពេល៤ទៅ៥ថ្ងៃទើបមកយក។ ប៉ុន្តែមិនមែនក្រុមហ៊ុនស៊ិនទ្រីយឺតយ៉ាវនោះទេ គឺ បណ្ដាលមកពីបរិមាណសំរាមមានកំណើនច្រើនជាងមុន ដោយការរីកចម្រើននៃសង្គមជាតិ ធ្វើឱ្យជីវភាពរស់នៅរបស់បងប្អូនប្រជាពលរដ្ឋធូរធារ សំរាមត្រូវតែកើនឡើង ហើយវិធានការដោះស្រាយមានតែបន្ថែមរថយន្តទើបយកសំរាមបានទៀងទាត់ បញ្ចៀសបានការកកស្ទះ និងរលួយមានក្លិនស្អុយ។ ក្រៅពីនេះសុំឱ្យអាជ្ញាធរគ្រប់សង្កាត់ត្រូវដាក់ទង់ជាតិនៅរាល់ពិធីបុណ្យជាតិ ដើម្បីបញ្ជាក់ពីការអបអរសាទរ និងជាសោភ័ណភាពមួយផងដែរ។
លោក លីន ញ៉ក់ អភិបាលរងខណ្ឌឫស្សីកែវ បានមានប្រសាសន៍ថា រាល់បញ្ហាដែលក្រុមប្រឹក្សាខណ្ឌលើកឡើង រដ្ឋបាលខណ្ឌយកទៅពិភាក្សាជាមួយស៊ិនទ្រី និង អនុវត្ត ដើម្បីធ្វើឱ្យប្រសើរឡើងនូវរាល់ចំណុចខ្វះចន្លោះ។
លោកបានបញ្ជាក់ថា ការងារគ្រប់គ្រងគ្រោះមហន្តរាយកន្លងមកអាជ្ញាធរខណ្ឌឫស្សីកែវ បានចុះអប់រំជាច្រើនលើក នៅតាមសាលារៀនពិសេសមត្តេយ្យសាលា ដែលមានហានិភ័យខ្ពស់ព្រោះសុទ្ធតែជាក្មេង ដោយអប់រំលោកគ្រូ អ្នកគ្រូ ឱ្យទុកច្រកចេញចូលមុខក្រោយបង្ការពេលកើតមានគ្រោះភ័យ។ ចំណែក ភោជនីយដ្ឋាន, ក្លឹបកម្សាន្ត, ផ្ទះសំណាក់, សណ្ឋាគារ, រង្គសាលនិងតាមផ្ទះ យើងបានណែនាំឱ្យពួកគាត់ទិញបំពង់ពន្លត់អគ្គីភ័យសម្រាប់បង្ការគ្រោះកាចកើតឡើង តាំងពីឆ្នាំ២០០៣មកម្ល៉េះ។
លោក ជុំ បាយ័ន្តវិបុល សមាជិកក្រុមប្រឹក្សាខណ្ឌ តំណាងប្រធានក្រុមប្រឹក្សាខណ្ឌឫស្សីកែវ បានឱ្យដឹងថា កិច្ចប្រជុំសាមញ្ញលើកទី៥៣របស់ក្រុមប្រឹក្សាខណ្ឌឫស្សីកែវ អាណត្តិទី២ កាលពីថ្ងៃទី២៦ ខែតុលា មានរបៀបវារៈចំនួន៥ លើកយកមកពិនិត្យ និងអនុម័ត ដើម្បីឱ្យរដ្ឋបាលខណ្ឌអនុវត្តបន្តឲ្យកាន់តែមានប្រសិទ្ធភាព៕
Source: Kampuchea Thmey Daily
0 Comments